Chim-giân 11

Chim-giân 11 - 現代台語譯本羅馬字版(TTVR)-闽南语

1Khi-phiàn ê thian-phêng, Siōng Chú iàm-ò͘ⁿ;

kong-pêng ê chhìn-thûi, I só͘ ì-ài.

2Ū kiau-ngō͘ chiū ū kiàn-siàu;

ū khiam-pi chiū ū tì-hūi.

3Chèng-ti̍t ê lâng ū sêng-si̍t teh ín-chhōa;

khúi-khiat ê lâng in-ūi kan-chà tì-kàu húi-bia̍t.

4Siōng Chú tōa siū-khì ê ji̍t, chîⁿ-châi bô lō͘-ēng,

chí-ū kong-gī ōe kiù lâng thoat-lī sí-bông.

5Bô thang chí-chek ê gī-lâng, i ê lō͘ ti̍t, hó kiâⁿ;

pháiⁿ-lâng ōe in-ūi ka-kī ê siâ-ok poa̍h-tó sit-pāi.

6Chèng-ti̍t ê lâng ōe hō͘ ka-kī ê gī kiù--tio̍h;

kan-chà ê lâng ōe hām-lo̍h ka-kī ê pháiⁿ só͘ siat ê lô-bāng.

7Pháiⁿ-lâng chi̍t-ē sí, i ê ǹg-bāng chiū bô--khì,

i só͘ kî-thāi--ê mā ōe siau-sit.

8Gī-lâng ōe-tàng thoat-lī hoān-lān;

pháiⁿ-lâng hoán-tńg hām-lo̍h hit lāi-bīn.

9Gán-tiong bô Siōng-tè ê lâng kóng-ōe hāi chhù-piⁿ;

gī-lâng in-ūi tì-sek tit-tio̍h kái-kiù.

10Gī-lâng sūn-lī heng-thong, thong-siâⁿ hoaⁿ-hí;

pháiⁿ-lâng bia̍t-bông, lâng lóng tōa-siaⁿ khèng-chiok.

11Siâⁿ in-ūi chèng-ti̍t-lâng ê chiok-hok heng-khí,

in-ūi pháiⁿ-lâng ê ōe tó-hoāi.

12Biáu-sī chhù-piⁿ ê lâng bô siông-sek;

bêng-lí ê lâng chēng-chēng bô chhut-siaⁿ.

13Sì-kòe kóng lâng sī-hui--ê, ōe lāu-sia̍p lâng ê pì-bi̍t;

sêng-si̍t khó-khò ê lâng khǹg-ba̍t tāi-chì.

14Bô hó ê léng-tō, kok-ka chiū soe-pāi;

kò͘-būn chōe, jîn-bîn chiū an-ún.

15Kā siⁿ-hūn-lâng pó-chèng ōe siū tōa khek-khui;

kū-choa̍t kā lâng tam-pó chiū an-choân.

16Hiân-hūi ê hū-jîn-lâng siū lâng kèng-tiōng;

pāi-tek ê hū-jîn-lâng chū-chhú-thí-jio̍k.

Pîn-tōaⁿ ê ta-po͘-lâng ōe sàn-chhiah;

kian-kiông ê ta-po͘-lâng ōe hó-gia̍h.

17Jîn-chû ê lâng ka-kī tit-tio̍h lī-ek;

chân-jím ê lâng ka-kī siū siong-hāi.

18Pháiⁿ-lâng tit--tio̍h ê kang-chîⁿ sī khang-khang;

iā gī ê chéng-chí tit--tio̍h ê pò-siúⁿ chiah sī si̍t-chāi.

19Kian-chhî kong-gī, tit-tio̍h sìⁿ-miā;

kè-sio̍k chòe pháiⁿ, tì-kàu sí-bông.

20Oai-khiok sī-hui ê sim, Siōng Chú iàm-ò͘ⁿ;

hêng-ûi chèng-ti̍t, I só͘ ì-ài.

21Pháiⁿ-lâng it-tēng siū hêng-hoa̍t;

gī-lâng ê hō͘-tāi ōe tit-tio̍h kái-kiù.

22Hū-jîn-lâng súi nā bô bêng-lí,

chhin-chhiūⁿ kim-khoân kòa tī ti ê phīⁿ.

23Gī-lâng só͘ ì-ài--ê, chòe-āu lóng sī hó;

pháiⁿ-lâng tui-kiû--ê, jiá Siōng-tè siū-khì.

24Lâng ná si-sià chiū ná hó-gia̍h;

lâng ná tàng-sng chiū ná sàn-chhiah.

25Ài si-sià--ê, jú hong-sēng;

pang-chān lâng--ê, tit-tio̍h pang-chān.

26Tún-chek ngó͘-kok m̄ bōe, ōe siū chiù-chó͘;

hoaⁿ-hí bōe-chhut, ōe siū chiok-hok.

27Chhut-la̍t chòe hó, ōe tit-tio̍h un-hūi;

tui-kiû siâ-ok, ōe tú-tio̍h chai-hō.

28Óa-khò ka-kī ê chîⁿ-châi, ōe poa̍h-tó sit-pāi;

gī-lâng ōe heng-ōng chhin-chhiūⁿ chhiⁿ-chhùi ê chhiū-hio̍h.

29Jiá-khí ka-têng hun-cheng ê lâng, sím-mi̍h lóng tit bōe tio̍h;

gōng-lâng ōe chòe chhong-bêng-lâng ê lô͘-po̍k.

30Gī-lâng kiat ê ké-chí sī sìⁿ-miā;

kiông-pō ê lâng chân-hāi sìⁿ-miā.

31Gī-lâng tī sè-kan tit-tio̍h pò-siúⁿ;

ū-chōe ê pháiⁿ-lâng it-tēng siū pò-èng.

Chim-giân 11 - 現代台語譯本羅馬字版(TTVR)-闽南语

Learn More About Us