Si-phian 68

Si-phian 68 - 現代台語譯本羅馬字版(TTVR)-闽南语

Tāi-pi̍t ê si-koa, kau hō͘ sèng-ga̍k-tiúⁿ.Sèng-lī ê Koa

1Goān Siōng-tè khí--lâi, hō͘ I ê tùi-te̍k sì-sòaⁿ,

hō͘ oàn-hūn I ê lâng tùi I ê bīn-chêng tô-cháu.

2Lí kā in kóaⁿ-sòaⁿ, chhin-chhiūⁿ kā ian chhe-sòaⁿ;

in chhin-chhiūⁿ la̍h kìⁿ-tio̍h hé chiū iûⁿ--khì,

pháiⁿ-lâng kìⁿ-tio̍h Siōng-tè ê bīn chiū siau-bia̍t.

3Goān gī-lâng tī Siōng-tè bīn-chêng hoaⁿ-hí khoài-lo̍k;

goān in hoaⁿ-hoaⁿ-hí-hí.

4Tio̍h tùi Siōng-tè gîm-si, chhiùⁿ-koa chheng-chàn I ê miâ,

tōa-tōa chheng-chàn chē-hûn lâi--ê Hit-ūi;

I ê chheng-ho͘ sī Siōng Chú.

Tio̍h tī I ê bīn-chêng khoài-lo̍k.

5Siōng-tè tī I sèng ê só͘-chāi

chòe ko͘-jî ê pē, kóaⁿ-hū ê pó-hō͘-chiá.

6Siōng-tè hō͘ ko͘-toaⁿ ê lâng ū chhù thang tòa,

chhōa koaiⁿ-kaⁿ ê lâng chhut-lâi tit-tio̍h chū-iû hióng-hok;

m̄-kú I hō͘ pōe-ge̍k ê lâng tiàm tī khòng-hān ê tōe.

7Siōng-tè ah, chá lí kiâⁿ tī lí ê chú-bîn thâu-chêng,

keng-kè khòng-iá;

8tōe kìⁿ-tio̍h Se-nāi ê Siōng-tè, tōa tín-tāng;

thiⁿ tī Í-sek-lia̍t ê Siōng-tè bīn-chêng lo̍h tōa-hō͘.

9Siōng-tè ah, lí lo̍h tōa-hō͘,

hō͘ ta-sò ê thó͘-tōe tit-tio̍h lūn-te̍k,

10hō͘ lí ê cho̍k-kûn tī hia khiā-khí.

Siōng-tè ah, lí hō͘ sàn-chhiah-lâng tit-tio̍h un-hūi.

11Chú chhut bēng-lēng;

chi̍t tōa-tīn hū-lú thoân hó siau-sit,

12“Kun-ông kap in ê kun-tūi lóng tô-cháu lah, tô-cháu lah!”

Lâu tī chhù-lāi ê hū-lú mā pun-tio̍h chiàn-lī-phín.

13Lín an-ún tó tī iûⁿ-tiâu lāi ê sî,

chhin-chhiūⁿ hún-chiáu ê si̍t siuⁿ pe̍h-gûn, mn̂g siuⁿ n̂g-kim.

14Choân-lêng-chiá tī kéng-lāi kóaⁿ-sòaⁿ lia̍t-ông ê sî,

sè-bīn chhin-chhiūⁿ Sat-bûn-soaⁿ teh lo̍h-seh.

15 Pa-san-soaⁿ sī ke̍k-kî koân-tōa ê soaⁿ;

Pa-san-soaⁿ sī ū chin chōe soaⁿ-niá ê soaⁿ.

16Ū chin chōe soaⁿ-chiam ê soaⁿ ah,

lín sī-án-chóaⁿ oàn-tò͘ teh khòaⁿ Siōng-tè só͘ ài khiā-khí ê soaⁿ?

Siōng Chú ōe tiàm tī hia kàu éng-oán.

17Siōng-tè ū chiàn-chhia chheng-chheng-bān-bān;

Chú tùi Se-nāi chhut--lâi, lâi kàu I ê sèng-só͘.

18Lí í-keng chiūⁿ kàu koân ê só͘-chāi, kā hu-ló͘ lia̍h--lâi;

lí tùi lâng chiap-siū kòng-phín, sīm-chì chiap-siū pōe-poān ê lâng ê lé-mi̍h,

hō͘ Chú Siōng-tè lí tī in tiong-kan khiā-khí.

19Chú eng-kai siū chheng-chàn, I ji̍t-ji̍t pē lán ê tàⁿ;

I chiū-sī kiù lán ê Siōng-tè.

20Lán ê Siōng-tè sī chín-kiù ê Siōng-tè;

chí-ū Chú Siōng-tè ōe kiù lán thoat-lī sí-bông.

21Chóng-sī Siōng-tè beh phah-phòa tùi-te̍k ê thâu-khak,

chiū-sī kè-sio̍k hoān-chōe ê lâng ê thâu-khak.

22Chú kóng, “Góa beh kā in tùi Pa-san chhōa--lâi,

tùi hái siōng-chhim ê só͘-chāi chhōa tò-tńg--lâi,

23hō͘ lín tùi in ê huih tiong kiâⁿ--kè,

hō͘ lín ê káu chī in ê huih.”

24Siōng-tè ah, lí sī góa ê Siōng-tè, góa ê Kun-ông.

Lâng í-keng khòaⁿ-kìⁿ lí teh kiâⁿ, kiâⁿ-ji̍p sèng-só͘.

25Chhiùⁿ-koa--ê kiâⁿ tī thâu-chêng, chàu-ga̍k--ê tè tī āu-bīn,

iô lin-long-kó͘ ê cha-bó͘ gín-á kiâⁿ tī tiong-kan.

26Tio̍h tī tāi-hōe tiong chheng-chàn Siōng-tè,

chiū-sī Siōng Chú, Í-sek-lia̍t ê goân-thâu.

27Siōng-sòe ê Piān-ngá-bín chòe thâu teh chhōa,

Iû-tāi kui-kûn ê cho̍k-tiúⁿ,

Se-pò͘-lûn ê cho̍k-tiúⁿ, Ná-hut-tha-lī ê cho̍k-tiúⁿ tè tī āu-bīn.

28Siōng-tè ah, kiû lí hián-chhut khùi-la̍t;

kiû lí hián-sī lí kā goán chòe ê sū.

29Ūi-tio̍h lí tī Iâ-lō͘-sat-léng ê tiān,

lia̍t-ông beh tòa lé-mi̍h hiàn hō͘ lí.

30Kiû lí chek-pī Ai-ki̍p, i chhin-chhiūⁿ tī lô͘-úi tiong ê iá-siù;

kiû lí chek-pī lia̍t-pang, in chhin-chhiūⁿ kui-kûn ê gû-káng kap gû-á.

Kiû lí hō͘ tham-ài kòng-phín ê lâng khut-ho̍k tī lí kha-ē;

kiû lí kóaⁿ-sòaⁿ hò͘ⁿ-chiàn ê lia̍t-pang.

31Te̍k-sài beh tòa kòng-phín tùi Ai-ki̍p lâi;

Kó͘-si̍t beh kóaⁿ-kín tùi Siōng-tè hiàn lé-mi̍h.

32Sè-chiūⁿ ê lia̍t-kok ah, tio̍h tùi Siōng-tè chhiùⁿ-koa,

gîm-si chheng-chàn Chú,

33chheng-chàn chē tī tùi kó͘-chá chiū ū, ke̍k-koân ê thiⁿ Hit-ūi.

I hoat-chhut ke̍k-tōa ū-la̍t ê siaⁿ.

34Lín tio̍h chiong koân-lêng kui hō͘ Siōng-tè.

I ê ui-giâm tī Í-sek-lia̍t ê téng-bīn;

I ê koân-lêng hián-sī tī kiong-chhong.

35Siōng-tè ah, lí tī lí ê sèng-só͘ si̍t-chāi thang kèng-ùi;

Í-sek-lia̍t ê Siōng-tè sù khùi-la̍t koân-lêng hō͘ I ê chú-bîn.

Siōng-tè eng-kai siū chheng-chàn!

Si-phian 68 - 現代台語譯本羅馬字版(TTVR)-闽南语

Learn More About Us