Í-se-kiat-su 41

Í-se-kiat-su 41 - 現代台語譯本羅馬字版(TTVR)-闽南语

1Hit-ê lâng chhōa góa khì kàu sèng-tiān; i niû piah-thiāu, nn̄g pêng ê khoah lóng sī saⁿ kong-chhioh.

2Ji̍p-kháu ê mn̂g khoah gō͘ kong-chhioh, mn̂g nn̄g pêng ê piah, chit-pêng nn̄g kong-chhioh-pòaⁿ, hit-pêng nn̄g kong-chhioh-pòaⁿ. I koh niû sèng-tiān, tn̂g jī-cha̍p kong-chhioh, khoah cha̍p kong-chhioh.

3Jiân-āu, i ji̍p-khì lōe-tiān. I niû hiah-ê piah-thiāu, kāu chi̍t kong-chhioh; ji̍p-kháu pún-sin khoah saⁿ kong-chhioh, nn̄g pêng ê piah khoah lóng sī saⁿ kong-chhioh-pòaⁿ.

4I koh niû lōe-tiān, tn̂g kap khoah lóng sī cha̍p kong-chhioh. I kā góa kóng, “Che sī Chì-sèng-só͘.”

Óa Sèng-tiān Piah-piⁿ ê Pâng-keng

5Hit-ê lâng niû sèng-tiān ê piah, kāu saⁿ kong-chhioh. Sèng-tiān chiu-ûi ū siuⁿ-pâng, ta̍k-keng khoah nn̄g kong-chhioh.

6Siuⁿ-pâng ū saⁿ chàn, chi̍t chàn tha̍h chi̍t chàn, ta̍k-chàn ū saⁿ-cha̍p keng siuⁿ-pâng. Sèng-tiān gōa-piah sì-ûi ū png-chhiûⁿ, kā siuⁿ-pâng thuh--teh, chiah bián siuⁿ-pâng kan-ta khò sèng-tiān ê piah.

7Sèng-tiān chiu-ûi ê siuⁿ-pâng, ná koân ná khoah. Ū lâu-thui thang tùi it-lâu chiūⁿ kàu jī-lâu, koh kàu saⁿ-lâu. Sèng-tiān ê kiat-kò͘ jú koân jú khoah.

8Góa koh khòaⁿ-kìⁿ sèng-tiān chiu-ûi ū koân ê pîⁿ-tâi, chòe siuⁿ-pâng ê tōe-ki; pîⁿ-tâi saⁿ kong-chhioh koân.

9-10Chiah-ê siuⁿ-pâng ê gōa-piah kāu nn̄g kong-chhioh-pòaⁿ. Sèng-tiān ê siuⁿ-pâng kap chè-si ēng ê pâng-keng tiong-kan ê sì-chiu-ûi ū khàng-tōe, khoah cha̍p kong-chhioh.

11Siuⁿ-pâng ê mn̂g lóng ǹg khàng-tōe; chi̍t ê mn̂g ǹg pak, chi̍t ê mn̂g ǹg lâm. Sì-chiu-ûi ê khàng-tōe khoah nn̄g kong-chhioh-pòaⁿ.

Sai-pêng ê Chhù

12Sèng-tiān sai-pêng hit-phiàn khàng-tōe ê āu-bīn ū chi̍t keng chhù, tn̂g sì-cha̍p-gō͘ kong-chhioh, khoah saⁿ-cha̍p-gō͘ kong-chhioh, sì-ûi ê piah kāu nn̄g kong-chhioh-pòaⁿ.

Sèng-tiān ê Chhùn-chhioh

13Hit-ê lâng niû sèng-tiān, tn̂g gō͘-cha̍p kong-chhioh; tùi sèng-tiān āu-piah kàu khàng-tōe sai-pêng hit-keng chhù, kū-lī tn̂g gō͘-cha̍p kong-chhioh.

14Sèng-tiān ê thâu-chêng, chiū-sī tang-pêng ê khàng-tōe, khoah gō͘-cha̍p kong-chhioh.

15I koh niû sai-pêng hit-keng chhù, pau-koat nn̄g pêng ê cháu-lông, tn̂g gō͘-cha̍p kong-chhioh.

Sèng-tiān ê Lāi-pō͘

Sèng-tiān ê lōe-tiān, gōa-bīn ê cháu-lông,

16hō͘-tēng, thang-á, í-ki̍p hō͘-tēng tùi-bīn saⁿ chàn ê cháu-lông, tùi thô͘-kha kàu thang-á lóng ēng chhâ-pang pau--teh. Chiah-ê thang-á lóng koaiⁿ--teh.

17Lōe-tiān kap gōa-tiâⁿ chiu-ûi ê piah, tùi thô͘-kha kàu mn̂g ê téng-bīn, lóng chiàu chhùn-chhioh ēng chhâ-pang pau--teh.

18Ta̍k-bīn piah ū khek ki-lō͘-pek kap chang-chhiū; ki-lō͘-pek kap ki-lō͘-pek tiong-kan ū chi̍t châng chang-chhiū; ta̍k-ê ki-lō͘-pek ū nn̄g khoán bīn:

19Chi̍t ê bīn sī lâng ê bīn, ǹg chit-pêng ê chang-chhiū; chi̍t ê bīn sī sai ê bīn, ǹg hit-pêng ê chang-chhiū. Sèng-tiān chiu-ûi ê piah lóng kâng-khoán.

20Án-ni, sèng-tiān ê piah, tùi thô͘-kha kàu mn̂g ê téng-bīn, lóng ū ki-lō͘-pek kap chang-chhiū.

21Sèng-só͘ ê mn̂g-thiāu sī sì-kak--ê.

Bo̍k-chō ê Chè-tôaⁿ

Tī Chì-sèng-só͘ ê thâu-chêng ū chi̍t ê

22khòaⁿ--khí-lâi chhin-chhiūⁿ bo̍k-chō ê chè-tôaⁿ, koân chi̍t kong-chhioh-pòaⁿ, khoah chi̍t kong-chhioh. Chè-tôaⁿ ê sì ki kak, tôaⁿ ê chō, sì ê bīn lóng sī ēng chhâ chòe--ê. Hit-ê lâng kā góa kóng, “Che sī hē tī Siōng Chú bīn-chêng ê toh-á.”

Mn̂g

23Sèng-tiān kap Chì-sèng-só͘ ê mn̂g lóng sī nn̄g sìⁿ--ê.

24Ta̍k-sìⁿ mn̂g kok ū nn̄g phìⁿ, sī ōe-áu--tit-ê.

25Sèng-tiān ê mn̂g-sìⁿ ū khek ki-lō͘-pek kap chang-chhiū, kap piah-thiāu ê tiau-khek kâng-khoán. Cháu-lông ǹg gōa hit-bīn ū chhâ chòe ê pîⁿ-á.

26Mn̂g ê cháu-lông nn̄g pêng lóng ū thang-á kap chang-chhiū ê tiau-khek. Sèng-tiān ê siuⁿ-pâng kap pîⁿ-á mā-sī án-ni.

Í-se-kiat-su 41 - 現代台語譯本羅馬字版(TTVR)-闽南语

Learn More About Us