Tān-í-lí-su 3

Tān-í-lí-su 3 - 現代台語譯本羅馬字版(TTVR)-闽南语

Ông Hā-lēng Pài Kim-siōng

1 Nî-pò͘-kah-nî-sat-ông chō chi̍t chō kim-siōng, koân jī-cha̍p-chhit kong-chhioh, khoah saⁿ kong-chhioh, chhāi tī Pa-pí-lûn-séng ê Tō͘-la Pêng-goân.

2I tiàu-chi̍p choân-thé chóng-tok, séng-tiúⁿ, koān-tiúⁿ, chham-bô͘, châi-bū-koaⁿ, hoat-koaⁿ, kap tōe-hng koaⁿ-oân, lâi chham-ka i só͘ chō kim-siōng ê khai-kong tián-lé.

3Chiah-ê koaⁿ-oân lóng lâi chham-ka, khiā tī Nî-pò͘-kah-nî-sat-ông só͘ chō kim-siōng ê thâu-chêng.

4Thoân-lēng-koaⁿ tōa-siaⁿ soan-pò͘, “Ta̍k-cho̍k, ta̍k-kok, kóng ta̍k-chióng gú-giân ê jîn-bîn! Tio̍h chù-ì thiaⁿ chit-ê bēng-lēng:

5Lín nā thiaⁿ-tio̍h hō-kak, phín-á, khîm, sek, khiā-khîm, kó͘, kap ta̍k-chióng ga̍k-khì ê siaⁿ, chiū tio̍h sûi-sî phak-pài Nî-pò͘-kah-nî-sat-ông só͘ chō ê kim-siōng.

6Nā ū lâng bô beh phak-pài, chiū beh chek-sî kā i lia̍h-khì hiat-lo̍h iām-hé teh sio ê iô.”

7Só͘-ū ê jîn-bîn, bô-lūn sio̍k tó chi̍t cho̍k, tó chi̍t kok, kóng tó chi̍t khoán gú-giân, chi̍t-ē thiaⁿ-tio̍h chiah-ê ga̍k-khì ê siaⁿ, chiū lóng phak-pài ông chō ê kim-siōng.

Tān-í-lí Saⁿ Ê Pêng-iú Siū Khòng-kò

8Hit-sî, ū kúi ê Pa-pí-lûn-lâng lī-iōng ki-hōe ok-ì khòng-kò Iû-thài-lâng,

9tùi Nî-pò͘-kah-nî-sat-ông kóng, “Goān ông bān-sòe!

10Hông-siōng, lí ū hā-lēng, só͘-ū thiaⁿ-tio̍h hō-kak, phín-á, khîm, sek, khiā-khîm, kó͘, kap ta̍k-chióng ga̍k-khì ê siaⁿ ê lâng, lóng tio̍h phak-pài kim-siōng;

11nā ū lâng bô beh phak-pài, chiū kā i hiat-lo̍h iām-hé teh sio ê iô.

12Hiān-chāi, hông-siōng, lí phài-lâi koán-lí Pa-pí-lûn-séng sū-bū chit saⁿ ê Iû-thài-lâng Sa-tek-la, Bí-sa, A-pek-nî-ko, in bô ho̍k-chiông lí ê bēng-lēng, bô beh ho̍k-sāi lí ê sîn-bêng, bô phak-pài lí chō ê kim-siōng.”

13 Nî-pò͘-kah-nî-sat-ông thiaⁿ-liáu hui-siông siū-khì, chiū hā-lēng, chiong Sa-tek-la, Bí-sa, A-pek-nî-ko tòa-lâi kàu i ê bīn-chêng.

14Ông mn̄g in, “Sa-tek-la, Bí-sa, A-pek-nî-ko, lín kiám chin-chiàⁿ bô ho̍k-sāi góa ê sîn-bêng, bô phak-pài góa chhāi ê kim-siōng?

15Taⁿ, lín tio̍h siūⁿ hō͘ hó-sè, lín chi̍t-ē thiaⁿ-tio̍h hō-kak, phín-á, khîm, sek, khiā-khîm, kó͘, kap ta̍k-chióng ga̍k-khì ê siaⁿ, nā phak-pài góa chō ê siōng, chiū bô tāi-chì; nā bô, chiū beh chek-sî kā lín hiat-lo̍h teh sio ê hé-iô. Kàu-sî, ū siáⁿ sîn-bêng ōe-tàng tùi góa ê chhiú-thâu kā lín kái-kiù chhut--khì?”

16 Sa-tek-la, Bí-sa, A-pek-nî-ko ìn ông kóng, “Nî-pò͘-kah-nî-sat, chit-ê tāi-chì goán m̄-bián kā lí hôe-tap.

17Goán nā hō͘ lí hiat-lo̍h hé-iô, goán ho̍k-sāi kèng-pài ê Siōng-tè ōe kā goán tùi iām-hé teh to̍h ê hé-iô kiù--chhut-lâi; hông-siōng, I mā ōe kiù goán thoat-lī lí ê chhiú.

18Chiū-sǹg-kóng m̄-sī án-ni, hông-siōng, lí tio̍h chai, goán mā it-tēng bô beh ho̍k-sāi lí ê sîn-bêng, bô beh phak-pài lí chhāi ê kim-siōng.”

Tān-í-lí Saⁿ Ê Pêng-iú tī Hé-iô

19 Nî-pò͘-kah-nî-sat chi̍t-ē thiaⁿ--tio̍h, tùi Sa-tek-la, Bí-sa, A-pek-nî-ko hui-siông siū-khì, tùi in pìⁿ-bīn, chiū bēng-lēng lâng kā hé-iô hiâⁿ khah jia̍t, pí pêng-siông ke chhit pē sio;

20koh bēng-lēng kúi-nā ê ióng-béng ê chiàn-sū kā Sa-tek-la, Bí-sa, A-pek-nî-ko pa̍k--khí-lâi, hiat lo̍h-khì iām-jia̍t ê hé-iô.

21Chit saⁿ ê lâng hō͘ lâng pa̍k khí-lâi hiat-lo̍h hé-iô ê sî, iáu chhēng gōa-phàu, tn̂g-khò͘, thâu-kun, kap kî-tha ê saⁿ.

22In-ūi ông ê bēng-lēng chin kín-kip, hé-iô koh chin iām-jia̍t, hiah-ê chiong in hiat-lo̍h hé-iô ê lâng soah hō͘ hé sio--sí.

23Sa-tek-la, Bí-sa, A-pek-nî-ko lóng hō͘ lâng pa̍k--teh, hiat lo̍h-khì hé-iô lāi-bīn.

24Hit-sî, Nî-pò͘-kah-nî-sat kiaⁿ-chi̍t-tiô, kóaⁿ-kín khiā--khí-lâi, tùi i ê chham-bô͘ kóng, “Hō͘ lán pa̍k--khí-lâi, hiat lo̍h-khì hé-iô--ê, kiám m̄-sī saⁿ ê lâng?”

In kóng, “Hông-siōng, sī.”

25Ông kóng, “Lín khòaⁿ! Góa ū khòaⁿ-tio̍h sì ê lâng, bô pa̍k--teh, tī hé-iô lāi-bīn kiâⁿ-lâi-kiâⁿ-khì, koh lóng bô tio̍h-siong. Hit-ê tē-sì ê khòaⁿ--khí-lâi chhin-chhiūⁿ sîn-bêng ê kiáⁿ.”

Hit Saⁿ Ê Lâng Tit-tio̍h Tháu-pàng koh Seng-koaⁿ

26 Nî-pò͘-kah-nî-sat kiâⁿ-kūn iām-jia̍t ê hé-iô kháu, kóng, “Chì-koân Siōng-tè ê po̍k-jîn Sa-tek-la, Bí-sa, A-pek-nî-ko, chhiáⁿ chhut--lâi! Lâi góa chia.” Hit saⁿ ê lâng chiū tùi hé-iô chhut--lâi.

27Hiah-ê chóng-tok, séng-tiúⁿ, koān-tiúⁿ, kap ông ê chham-bô͘ lóng chū-chi̍p óa-lâi khòaⁿ chit saⁿ ê lâng, khòaⁿ-tio̍h in seng-khu bô hō͘ hé sio--tio̍h, liân thâu-mn̂g mā bô sio--tio̍h, saⁿ kap khò͘ bô piàn-sek, koh bô tio̍h-hé-sio ê bī.

28 Nî-pò͘-kah-nî-sat chiū kóng, “Tio̍h chheng-chàn Sa-tek-la, Bí-sa, A-pek-nî-ko ê Siōng-tè! I phài I ê sù-chiá chín-kiù pó-hō͘ só͘-ū óa-khò I ê po̍k-jîn. In káⁿ bô ho̍k-chiông góa ê bēng-lēng, kam-goān hi-seng sìⁿ-miā, ka-kī ê Siōng-tè í-gōa, bô beh sū-hōng kèng-pài kî-tha jīm-hô sîn-bêng.

29“Só͘-í góa hā-lēng, bô-lūn tó chi̍t ê bîn-cho̍k, tó chi̍t ê pang-kok, kóng tó chi̍t khoán gú-giân ê jîn-bîn, nā ū lâng siat-to̍k Sa-tek-la, Bí-sa, A-pek-nî-ko ê Siōng-tè, it-tēng tio̍h kā in chām-tn̄g kha-chhiú; in ê chhù beh pìⁿ-chòe pùn-sò-tui, in-ūi bô pa̍t-ê sîn-bêng ōe-tàng chhin-chhiūⁿ Siōng-tè án-ni kái-kiù lâng.”

30Āu-lâi, ông chiū ko-seng Sa-tek-la, Bí-sa, A-pek-nî-ko tī Pa-pí-lûn-séng ê tōe-ūi.

Tān-í-lí-su 3 - 現代台語譯本羅馬字版(TTVR)-闽南语

Learn More About Us