Iok-su-a-kì 3

Iok-su-a-kì 3 - 現代台語譯本羅馬字版(TTVR)-闽南语

Í-sek-lia̍t-lâng Kè Iok-tàn-hô

1Keh-ji̍t, Iok-su-a thàu-chá khí--lâi, kap só͘-ū ê Í-sek-lia̍t-lâng lī-khui Si̍p-têng, lâi kàu Iok-tàn hô-piⁿ; in tī hia chat-iâⁿ, thèng-hāu kè-hô.

2Kè saⁿ ji̍t, koaⁿ-tiúⁿ kàu iâⁿ-tiong ta̍k só͘-chāi,

3hoan-hù jîn-bîn, kóng, “Lín nā khòaⁿ-tio̍h Lī-bī-lâng chòe chè-si--ê kng Siōng Chú — lín ê Siōng-tè ê iok-kūi, tio̍h khí-sin lī-khui lín ê só͘-chāi, tè tī iok-kūi ê āu-bīn,

4hō͘ lín chai tio̍h kiâⁿ tó chi̍t tiâu lō͘, in-ūi lín iáu m̄-bat kiâⁿ chit-tiâu lō͘; m̄-kú lín kap iok-kūi tāi-iok tio̍h lī chi̍t kong-lí hn̄g, m̄-thang óa siuⁿ kūn.”

5 Iok-su-a tùi jîn-bîn kóng, “Lín tio̍h kā ka-kī hun-pia̍t-choh-sèng, in-ūi bîn-á-chài Siōng Chú beh tī lín tiong-kan kiâⁿ kî-sū.”

6Iok-su-a koh tùi chè-si kóng, “Lín kng iok-kūi khí--lâi, kiâⁿ tī jîn-bîn ê thâu-chêng.” In chiū chiong iok-kūi kng--khí-lâi, kiâⁿ tī jîn-bîn ê thâu-chêng.

7Siōng Chú tùi Iok-su-a kóng, “Tùi kin-á-ji̍t khí, góa beh hō͘ lí tit-tio̍h só͘-ū Í-sek-lia̍t-lâng ê chun-kèng, hō͘ in chai góa kap lí tông-chāi, chhin-chhiūⁿ í-chêng kap Mô͘-se tông-chāi kâng-khoán.

8Lí tio̍h hoan-hù kng iok-kūi ê chè-si, kóng, ‘Lín kàu Iok-tàn hô-piⁿ ê sî, chiū thêng tī hia.’”

9 Iok-su-a tùi Í-sek-lia̍t-lâng kóng, “Lín khiā chìn-chêng, thiaⁿ Siōng Chú — lín ê Siōng-tè ê ōe.”

10Iok-su-a koh kóng, “I beh tī lín ê thâu-chêng chiong Ka-lâm-lâng, Hek-lâng, Hi-bī-lâng, Pí-lī-sé-lâng, Kek-ka-sat-lâng, A-mô͘-lī-lâng, Iâ-pò͘-su-lâng kóaⁿ--chhut-khì; án-ni lín chiū ōe chai éng-oa̍h ê Siōng-tè tī lín tiong-kan.

11Choân-tōe ê Chú ê iok-kūi beh tī lín ê thâu-chêng kiâⁿ-ji̍p Iok-tàn-hô.

12Hiān-chāi lín tio̍h tùi Í-sek-lia̍t chi-cho̍k tiong kéng cha̍p-jī lâng, múi chi-cho̍k chi̍t ê.

13Kng Choân-tōe ê Chú — Siōng Chú iok-kūi ê chè-si ê kha chi̍t-ē ta̍h-tio̍h Iok-tàn-hô ê chúi, Iok-tàn-hô siōng-liû ê chúi ōe chiâⁿ-chòe chúi-chhiûⁿ, bōe koh lâu--lo̍h-lâi.”

14Jîn-bîn lī-khui pò͘-pîⁿ, beh kè Iok-tàn-hô ê sî, chè-si kng iok-kūi kiâⁿ tī in ê thâu-chêng.

15Hit-sî sī siu-sêng ê kî, Iok-tàn-hô ê chúi siông-siông lâu-kè khoe-hōaⁿ. Chè-si kng iok-kūi lâi kàu Iok-tàn-hô, in ê kha chi̍t-ē ùn-tio̍h chúi,

16siōng-liû ê chúi chiū bô koh lâu--lo̍h-lâi, tī lī chin hn̄g ê Sat-la-tàn hù-kūn ê A-tong-siâⁿ chiâⁿ-chòe chúi-chhiûⁿ; bô koh ū chúi lâu-ji̍p A-la-pa-hái, chiū-sī Iâm-hái. Jîn-bîn chiū tùi Iâ-lī-ko ê tùi-bīn kè Iok-tàn-hô.

17Kng Siōng Chú iok-kūi ê chè-si tī Iok-tàn-hô ê ta-tōe khiā-tiāⁿ-tiāⁿ; Í-sek-lia̍t choân-thé jîn-bîn lóng kiâⁿ ta-tōe kè Iok-tàn-hô.

Iok-su-a-kì 3 - 現代台語譯本羅馬字版(TTVR)-闽南语

Learn More About Us