Si-phian 127 - 現代台語譯本羅馬字版(TTVR)-闽南语

Peh-kiā chiūⁿ Iâ-lō͘-sat-léng ê si; Só͘-lô-bûn só͘ chòe.Sìn-khò Siōng Chú ê Koàn-kò͘

1Chhù-the̍h nā m̄-sī Siōng Chú kiàn-chō,

kiàn-chō ê lâng chiū khang-khang lô-khó͘.

Siâⁿ nā m̄-sī Siōng Chú kò͘-siú,

siú-bōng ê lâng chiū pe̍h-pe̍h kéng-séng.

2Lín chá-chá khí--lâi, òaⁿ-òaⁿ chiah khùn,

thoa-bôa thàn-chia̍h mā bô-chhái-kang.

Siōng Chú só͘ thiàⁿ ê lâng,

I hō͘ in hó khùn.

3Kiáⁿ-jî sī Siōng Chú só͘ sù ê sán-gia̍p,

eⁿ-á sī I ê pò-siúⁿ.

4Siàu-liân ê sî siⁿ ê kiáⁿ-jî

chhin-chhiūⁿ ióng-sū chhiú-tiong ê chìⁿ.

5Chìⁿ-tē pá-pá ê lâng chin ū hok-khì!

In tī siâⁿ-mn̂g-kháu kap tùi-te̍k cheng-piān lóng bōe tì-kàu kiàn-siàu.

Learn More About Us