Í-sài-a-su 32

Í-sài-a-su 32 - 現代台語譯本羅馬字版(TTVR)-闽南语

Kong-chèng ê Ông

1Lín khòaⁿ, ū chi̍t ê ông ēng kong-chèng tī-kok,

ū koaⁿ-tiúⁿ chiàu chèng-ti̍t tī-lí;

2in múi chi̍t ê lóng ōe chhin-chhiūⁿ pī-hong-káng,

pō-hong-ú tiong ê pī-lān-só͘;

chhin-chhiūⁿ soa-bô͘ tiong ê khoe-chúi,

hong-po͘ tiong tōa chio̍h-pôaⁿ ê ìm-ńg.

3Hit-sî, ba̍k-kng ê lâng ōe kim-kim-khòaⁿ;

hī-khang ū thiaⁿ--tio̍h ê lâng ōe chù-ì thiaⁿ.

4Chhong-pōng ê lâng ū hó phòaⁿ-toàn;

chhùi-chi̍h tūn ê lâng kóng-ōe sūn koh chheng-chhó.

5Bô lâng ōe koh kóng gōng-lâng sī ko-sióng;

bô lâng ōe chheng siáu-jîn chòe kun-chú.

6Gōng-lâng kóng gōng-ōe,

sim chí-ū siūⁿ-beh chòe pháiⁿ.

I chòe siat-to̍k ê sū, kóng pháiⁿ-ōe kong-kek Siōng Chú;

i hō͘ iau-gō ê lâng bô mi̍h thang chia̍h,

pàng chhùi-ta ê lâng bô chúi thang lim.

7Kan-kúi ê lâng ēng ê hong-hoat khúi-chà;

in kè-bô͘ siâ-ok,

sui-jiân khùn-khó͘-lâng iau-kiû kong-chèng,

in iáu ēng gūi-chèng húi-bia̍t sàn-chhiah-lâng.

8M̄-kú kun-chú kè-ōe ko-sióng ê sū,

kian-chhî chòe ko-sióng ê tāi-chì.

Sím-phòaⁿ kap Ho̍k-heng

9Chheng-êng ê hū-jîn-lâng ah, khí--lâi,

lâi thiaⁿ góa ê ōe;

bô-khòa-bô-lū ê cha-bó͘ gín-á ah,

tio̍h chù-ì thiaⁿ góa kóng ê ōe.

10Lín chiah-ê bô-khòa-bô-lū ê cha-bó͘ gín-á ah,

koh kè chi̍t nî gōa, lín ōe kiaⁿ-hiâⁿ,

in-ūi bô phû-tô thang bán,

bô ké-chí thang siu-sêng.

11Chheng-êng ê hū-jîn-lâng ah, tio̍h phi̍h-phi̍h-chhoah;

bô-khòa-bô-lū ê cha-bó͘ gín-á ah, tio̍h kiaⁿ-kiaⁿ-hiâⁿ-hiâⁿ!

Tio̍h chhiah-sin-lō͘-thé,

io hâ môa-pò͘.

12Tio̍h ūi-tio̍h hó ê chhân-tōe,

ūi-tio̍h kiat chi̍t-pha chi̍t-pha ê phû-tô-chhiū tûi-heng ai-khàu.

13Góa chú-bîn ê thó͘-tōe ōe hoat chhì-phè kap cha̍p-chháu,

khoài-lo̍k ê siâⁿ-chhī, hoaⁿ-hí ê ka-hn̂g mā ōe án-ni.

14Ông-kiong ōe hō͘ lâng pàng-sak,

lāu-jia̍t ê siâⁿ-chhī bô lâng tòa,

siâⁿ-pó kap siú-bōng-thah lóng ōe

éng-oán pìⁿ-chòe tōng-hia̍t,

chiâⁿ-chòe iá-lû kap gû iûⁿ hoaⁿ-hí ê chháu-po͘.

15Kàu Siōng-tè chhe I ê sîn tùi téng-bīn piàⁿ lo̍h-lâi hō͘ lán,

hit-sî, khòng-iá ōe pìⁿ-chòe pûi ê hn̂g,

pûi ê hn̂g ōe chhin-chhiūⁿ chhiū-nâ.

16Hit-sî, kong-pêng beh tòa tī khòng-iá,

kong-gī beh hioh tī pûi-nńg ê thó͘-tōe.

17Kong-gī ê kong-hāu sī hô-pêng,

kong-gī ê hāu-kó sī pêng-chēng an-ún, ti̍t-kàu éng-oán.

18Góa ê chú-bîn ōe tòa tī hô-bo̍k ê ke,

an-ún ê chhù-the̍h,

thang hioh-khùn bô siū kiáu-jiáu ê só͘-chāi.

19Sui-jiân chhiū-nâ siū peng-pha̍uh húi-hoāi,

siâⁿ-chhī siū thiah-húi pìⁿ-chòe pîⁿ-tōe,

20m̄-kú lín chiah-ê tī khoe-piⁿ iā-chéng,

hō͘ gû lû ōe-tàng chū-chāi chia̍h-chháu ê lâng, si̍t-chāi ū hok-khì!

Í-sài-a-su 32 - 現代台語譯本羅馬字版(TTVR)-闽南语

Learn More About Us