Iâ-lī-bí-su 9

Iâ-lī-bí-su 9 - 現代台語譯本羅馬字版(TTVR)-闽南语

1Khó͘-bōe-tit góa ê thâu pìⁿ-chòe chúi-goân,

góa ê ba̍k-chiu pìⁿ-chòe ba̍k-sái ê chôaⁿ-goân,

mî-ji̍t ūi-tio̍h hō͘ lâng thâi-sí ê tông-pau ai-khàu.

2Chiok hi-bāng tī khòng-iá ū kheh-chàn thang tòa,

hō͘ góa thang pàng-sak góa ê tông-pau, lī-khui in hn̄g-hn̄g;

in-ūi in sī chi̍t kûn kiâⁿ-îm pōe-poān ê pháiⁿ-lâng.

3In ê chi̍h kńg--khí-lâi chhin-chhiūⁿ keng,

ūi-tio̍h beh kóng pe̍h-chha̍t;

in tī kok-lāi ū koân-sè,

m̄-sī khò chin-si̍t, sī khò khúi-chà.

Siōng Chú kóng:

Góa ê chú-bîn ok-siōng-ka-ok,

in m̄ bat góa.

4Lín ta̍k-ê lâng tio̍h tî-hông lín ê chhù-piⁿ,

liân chhin hiaⁿ-tī to m̄-thang sìn-jīm;

hiaⁿ-tī-á lóng teh kóng pe̍h-chha̍t,

chhù-piⁿ mā teh chō-iâu húi-pòng.

5In hō͘-siōng khi-phiàn,

bô beh kóng chin-si̍t;

in hùn-liān chhùi-chi̍h kóng pe̍h-chha̍t,

phah-piàⁿ chòe pháiⁿ.

6In koàn-sì kóng pe̍h-chha̍t,

m̄ sêng-jīn góa sī in ê Siōng-tè.

Siōng Chú án-ni kóng.

7Siōng Chú — Bān-kun ê Thóng-sòe kóng:

Góa beh thoàn-liān góa ê chú-bîn, kā in bôa-liān;

nā bô án-ni, góa beh án-chóaⁿ chhú-lí in?

8In ê chi̍h chhin-chhiūⁿ to̍k-chìⁿ, kóng-ōe khúi-chà;

ta̍k-ê lâng tùi chhù-piⁿ kóng hó-thiaⁿ-ōe,

m̄-kú sim-lāi beh bô͘-hāi in.

9In chòe chiah-ê sū, góa kiám m̄-bián pān in?

Chhin-chhiūⁿ chit-khoán bîn-cho̍k, góa kiám m̄-bián kā in pò-ho̍k?

Siōng Chú án-ni soan-kò.

10Góa beh ūi-tio̍h soaⁿ-niá thî-khàu pi-siong,

ūi-tio̍h khòng-iá ê chháu-po͘ chhiùⁿ ai-ko;

in lóng hō͘ hé sio-liáu-liáu,

bô lâng kiâⁿ tùi hia khì.

Gû iûⁿ ê siaⁿ bô koh thiaⁿ--tio̍h;

pe-chiáu kap iá-siù ê iáⁿ bô koh khòaⁿ--tio̍h.

11Góa beh hō͘ Iâ-lō͘-sat-léng pha-hng,

chiâⁿ-chòe chhâi-lông ê siū;

beh hō͘ Iû-tāi ê siâⁿ-tìn pìⁿ-chòe hong-po͘,

bô koh ū lâng tòa.

12Siáⁿ-lâng ū-kàu chhong-bêng, thang liáu-kái chit-ê sū? Siōng Chú thang chí-sī siáⁿ-lâng, hō͘ i kóe-seh: Chit-ê tōe sī-án-chóaⁿ húi-hoāi, pha-hng chhin-chhiūⁿ khòng-iá, bô lâng tùi hia keng-kè?

13Siōng Chú kóng: Che sī in-ūi in pàng-sak góa sù hō͘ in ê lu̍t-hoat, bô thiaⁿ-thàn góa ê ōe, m̄ si̍t-hêng góa ê lu̍t-hoat;

14in kò͘-chip chiàu ka-kī ê ì-sù choh-sū, chiàu in ê chó͘-sian kà--in-ê khì pài Pa-le̍k.

15Só͘-í, Siōng Chú — Bān-kun ê Thóng-sòe, Í-sek-lia̍t ê Siōng-tè soan-pò͘: Góa beh hō͘ in chia̍h khó͘-kó, lim to̍k-chúi.

16Góa beh kā in liû-hòng khì in kap in ê chó͘-sian m̄-bat ê lia̍t-kok, hō͘ in siū tui-sat kàu oân-choân siau-bia̍t.

Iâ-lō͘-sat-léng Ai-kiû Oān-chō͘

17Siōng Chú — Bān-kun ê Thóng-sòe kóng:

Lín tio̍h chai-sí!

Khì chhiàⁿ hiah-ê chhiùⁿ ai-ko ê hū-jîn-lâng lâi,

khì chio hiah-ê gâu khàu ê cha-bó͘-lâng lâi.

18Jîn-bîn kóng:

In tio̍h kóaⁿ-kín lâi, kā lán chhiùⁿ ai-ko,

hō͘ lán ba̍k-sái ti̍t-ti̍t lâu,

hō͘ lán ê ba̍k-sái pé bōe lī.

19Thiaⁿ leh, Sek-an thoân-chhut khàu-siaⁿ:

Goán kèng-jiân chiah-ni̍h lo̍k-phek!

Goán ū-kàu kiàn-siàu!

Goán soah tio̍h pàng-lo̍h chit-tè thó͘-tōe!

Goán ê chhù soah hō͘ lâng thiah-húi!

20Hū-jîn-lâng ah, tio̍h thiaⁿ Siōng Chú ê siaⁿ,

thiaⁿ-thàn I ê ōe;

tio̍h kà lín ê cha-bó͘-kiáⁿ ai-khàu,

kà lín ê cha-bó͘-phōaⁿ chhiùⁿ ai-ko.

21Sí-bông ōe tùi thang-á ji̍p--lâi,

ji̍p-lâi lán ê pó-lúi,

tī koe-lō͘ sat-hāi lán ê gín-á,

tī kóng-tiûⁿ thâi-sí lán ê siàu-liân-lâng.

22Siōng Chú bēng-lēng góa kā lín kóng:

Lâng ê sin-si ōe tó tī iá-gōa chhin-chhiūⁿ pùn-sò,

chhin-chhiūⁿ siu-koah ê lâng lak--lo̍h-lâi ê be̍h-sūi, bô lâng khioh.

23Siōng Chú kóng:

Tì-hūi ê lâng m̄-thang khoa-kháu ka-kī ê tì-hūi;

ióng-béng ê lâng m̄-thang khoa-kháu i ê khùi-la̍t;

hó-gia̍h-lâng m̄-thang khoa-kháu i ê châi-hù.

24Lâng nā beh khoa-kháu,

tio̍h khoa-kháu i bat góa, sêng-jīn góa sī Siōng Chú;

góa ài tī sè-kan si chû-ài, kong-gī, kap kong-pêng.

Siōng Chú án-ni soan-pò͘.

25Siōng Chú kóng, “Lín tio̍h chù-ì, sî-ji̍t chi̍t-ē kàu, góa beh hêng-hoa̍t kan-ta jio̍k-thé chiap-siū kat-lé ê lâng,

26chiū-sī Ai-ki̍p-lâng, Iû-tāi-lâng, Í-tong-lâng, A-bûn-lâng, Mô͘-ap-lâng, í-ki̍p só͘-ū tòa tī khòng-iá, thì pìn-piⁿ ê lâng; chiah-ê bîn-cho̍k lóng bô siū kat-lé, Í-sek-lia̍t choân-thé jîn-bîn ê sim mā bô siū kat-lé.”

Iâ-lī-bí-su 9 - 現代台語譯本羅馬字版(TTVR)-闽南语

Learn More About Us