Í-se-kiat-su 11

Í-se-kiat-su 11 - 現代台語譯本羅馬字版(TTVR)-闽南语

Iâ-lō͘-sat-léng Siū Tēng-chōe

1Siōng-tè ê sîn kā góa giâ--khí-lâi, tòa góa kàu Siōng Chú sèng-tiān ǹg tang-pêng ê chiàⁿ-mn̂g. Góa tī mn̂g ê ji̍p-kháu khòaⁿ-kìⁿ jī-cha̍p-gō͘ ê lâng, kî-tiong ū Ap-sok ê kiáⁿ Ngá-sat-nî-a kap Pí-ná-ngá ê kiáⁿ Pí-la-thê chit nn̄g ê bîn-kan ê léng-siù.

2Siōng-tè kā góa kóng, “Jîn-chú ah, in chiū-sī tī siâⁿ-lāi tô͘-bô͘ siâ-ok, chhut pháiⁿ chú-ì ê lâng.

3In kóng, ‘Hiān-chāi iáu m̄-sī khí-chhù ê sî. Chit-chō siâⁿ chhin-chhiūⁿ e-á, lán chhin-chhiūⁿ lāi-bīn ê bah.’

4Só͘-í, jîn-chú ah, lí tio̍h kóng, tio̍h soan-káng chí-chek in ê ōe.”

5Siōng Chú ê sîn lîm-kàu góa. I tùi góa kóng, “Lí tio̍h kā jîn-bîn kóng, ‘Siōng Chú án-ni kóng: Í-sek-lia̍t-lâng, lín teh kóng sím-mi̍h, teh siūⁿ sím-mi̍h, góa lóng chai.

6Lín tī chit-ê siâⁿ thâi-sí chiah chōe lâng, si-thé móa koe-lō͘.’

7“Só͘-í, góa — Chì-koân ê Siōng Chú án-ni kóng: Chit-chō siâⁿ chiū-sī e-á, e-á lāi ê bah chiū-sī lín tī siâⁿ-lāi thâi-sí ê lâng ê sin-si. Góa beh kā lín kóaⁿ-chhut chit-ê siâⁿ.

8Lín kiaⁿ to-kiàm, góa beh ēng to-kiàm kong-kek lín. Che sī Chì-koân ê Siōng Chú kóng--ê.

9Góa beh kā lín kóaⁿ-chhut chit-ê siâⁿ, chiong lín kau hō͘ gōa-kok-lâng, koh kā lín sím-phòaⁿ.

10Lín beh sí tī to-ē; góa beh tī Í-sek-lia̍t ê pian-kài sím-phòaⁿ lín, án-ni lín chiū chai góa sī Siōng Chú.

11Chit-chō siâⁿ bô beh koh pó-hō͘ lín, chhin-chhiūⁿ e-á pó-hō͘ lāi-bīn ê bah. Góa beh tī Í-sek-lia̍t ê pian-kài sím-phòaⁿ lín.

12Án-ni, lín chiū chai góa sī Siōng Chú. Lín bô chun-siú góa ê kui-lē, bô sūn-thàn góa ê bēng-lēng, tian-tò chiàu lín chiu-ûi lia̍t-kok ê kui-kú khì chòe.”

13Góa tú-teh soan-káng ê sî, Pí-ná-ngá ê kiáⁿ Pí-la-thê hut-jiân sí--khì. Góa bīn phak tī thô͘-kha tōa-siaⁿ hoah, “Ài, Chì-koân ê Siōng Chú, lí beh chiong Í-sek-lia̍t só͘ chhun ê lâng lóng siau-bia̍t sī--bô?”

Siōng-tè tùi Siū Hòng-tio̍k ê Lâng ê Èng-ún

14Siōng Chú tùi góa kóng,

15“Jîn-chú ah, Iâ-lō͘-sat-léng ê chū-bîn teh tâm-lūn lí ê hiaⁿ-tī, lí ê chhin-cho̍k, lí ê tông-pau, chiū-sī só͘-ū siū hòng-tio̍k ê Í-sek-lia̍t-lâng. In kóng, ‘Hiah-ê siū hòng-tio̍k ê lâng lī-khui Siōng Chú chin hn̄g lah. Siōng Chú í-keng chiong chit-tè thó͘-tōe sù hō͘ goán chòe sán-gia̍p.’

16“Só͘-í, lí tio̍h kóng, ‘Chì-koân ê Siōng Chú án-ni kóng: Góa sui-jiân chiong Í-sek-lia̍t-lâng hòng-tio̍k khì iâu-oán ê lia̍t-kok, kā in hun-sòaⁿ tī ta̍k só͘-chāi, góa iû-goân beh tī in tòa ê só͘-chāi chòe in chiām-sî ê sèng-só͘.’

17“Lí tio̍h koh kóng, ‘Chì-koân ê Siōng Chú án-ni kóng: Góa beh tùi bān-bîn ê tiong-kan tiàu-chi̍p lín, tùi lín sì-sòaⁿ--khì ê ta̍k só͘-chāi chū-chi̍p lín, chiong Í-sek-lia̍t ê thó͘-tōe koh sù hō͘ lín.’

18Siū hòng-tio̍k ê lâng tńg--lâi ê sî, in it-tēng ōe tû-khì só͘-ū thang iàm-ò͘ⁿ ê ngó͘-siōng kap thang thòng-hūn pài ngó͘-siōng ê sū.

19Góa beh hō͘ in ha̍p-it ê sim, chiong sin ê sîn khǹg tī in lāi-bīn. Góa beh tùi in ê seng-khu tû-khì chhin-chhiūⁿ chio̍h-thâu hiah-ni̍h tēng ê sim, koh siúⁿ-sù in chhin-chhiūⁿ bah hiah-ni̍h nńg ê sim.

20Án-ni, in chiū ōe chun-siú góa ê kui-lē, sūn-thàn góa ê bēng-lēng. In beh chòe góa ê chú-bîn, góa beh chòe in ê Siōng-tè.

21M̄-kú sim ì-ài thang iàm-ò͘ⁿ ê ngó͘-siōng kap ì-ài pài ngó͘-siōng ê sū hiah-ê lâng, góa beh chiàu in ê hêng-ûi kā in hêng-hoa̍t. Chì-koân ê Siōng Chú án-ni soan-kò.”

Siōng-tè ê Êng-kng Lī-khui Iâ-lō͘-sat-léng

22Ki-lō͘-pek thí-khui si̍t, lián-á tè tī in sin-piⁿ; tī in ê téng-bīn ū Í-sek-lia̍t Siōng-tè ê êng-kng.

23Siōng Chú ê êng-kng tùi siâⁿ-lāi seng-koân, thêng tī siâⁿ tang-pêng ê hit-chō soaⁿ-téng.

24Tī īⁿ-siōng tiong, Siōng-tè ê sîn kā góa giâ--khí-lâi, tòa góa khì siū hòng-tio̍k tī Pa-pí-lûn ê tông-pau hia. Liáu-āu, góa khòaⁿ--kìⁿ ê īⁿ-siōng lī-khui góa.

25Góa chiū chiong Siōng Chú chí-sī góa ê ta̍k-hāng sū lóng kóng hō͘ siū hòng-tio̍k ê tông-pau thiaⁿ.

Í-se-kiat-su 11 - 現代台語譯本羅馬字版(TTVR)-闽南语

Learn More About Us