Í-se-kiat-su 39

Í-se-kiat-su 39 - 現代台語譯本羅馬字版(TTVR)-闽南语

Ko-kek Siū Phah-pāi

1Chì-koân ê Siōng Chú kóng, “Jîn-chú ah, lí tio̍h tùi Bí-siat kap Thó͘-pa chit nn̄g ê kok-ka ê thóng-tī-chiá Ko-kek thoân-ta̍t góa ê sìn-sit, kóng, ‘Chì-koân ê Siōng Chú án-ni kóng: Góa beh kap lí choh-tùi.

2Góa beh kā lí tiàu hoan-thâu, hō͘ lí lī-khui ke̍k pak-pêng ê só͘-chāi, chhōa lí khì kong-táⁿ Í-sek-lia̍t ê soaⁿ.

3Jiân-āu, góa beh kā lí tò-chhiú ê keng kap chiàⁿ-chhiú ê chìⁿ phah lak--khì.

4Lí kap lí ê kun-tūi, í-ki̍p tè lí lâi ê gōa-cho̍k-lâng, lóng beh sí tī Í-sek-lia̍t ê soaⁿ. Góa beh hō͘ lí chòe eng-chiáu kap iá-siù ê chia̍h-mi̍h.

5Góa bat kóng, lí beh sí tī iá-tōe. Góa — Chì-koân ê Siōng Chú án-ni soan-kò.

6Góa beh pàng-hé sio Má-kok kap pêng-an khiā-khí tī iân-hái it-tài ê jîn-bîn. Án-ni, in chiū chai góa sī Siōng Chú.

7Góa beh tī góa ê chú-bîn Í-sek-lia̍t tiong-kan hián-sī góa ê sèng-miâ, choa̍t-tùi bô iông-ún góa ê sèng-miâ koh siū siat-to̍k. Án-ni, lia̍t-kok chiū chai góa sī Siōng Chú — Í-sek-lia̍t sîn-sèng ê Siōng-tè.

8“‘Lín tio̍h chai! Ji̍t-kî kàu lah, góa kóng ê hit-ji̍t lâi lah! Chì-koân ê Siōng Chú án-ni soan-pò͘.

9Í-sek-lia̍t ta̍k siâⁿ-tìn ê chū-bîn beh chhut-khì khioh lâng hiat-ka̍k ê kun-khì chòe hiâⁿ-hé ê chhâ, chiū-sī tún-pâi, keng, chìⁿ, chhiuⁿ, kùn-á; chiah-ê ū-kàu hō͘ in hiâⁿ chhit nî kú.

10In m̄-bián koh khì iá-gōa khioh-chhâ, m̄-bián koh khì chhiū-nâ chhò-chhâ, in-ūi lâng hiat-ka̍k ê kun-khì ōe-tàng hō͘ in hiâⁿ-hé. In beh chhiúⁿ hiah-ê bat chhiúⁿ in ê lâng, beh kiap hiah-ê bat kiap in ê lâng. Chì-koân ê Siōng Chú án-ni soan-pò͘.’”

Ko-kek ê Bâi-chòng

11Siōng Chú kóng, “Tī hit-ji̍t, góa beh tī Sí-hái

ê tang-pêng Í-sek-lia̍t-tōe ê ‘Chhut-gōa-lâng Soaⁿ-kok’, chhē chi̍t tè tōe hō͘ Ko-kek chòe bōng-tōe. Chit-tè bōng-tōe ōe tòng-tio̍h beh tùi hia keng-kè ê lâng, in-ūi Ko-kek kap kun-tè i ê kun-peng bâi-chòng tī hia. Chit-ê soaⁿ-kok beh kiò-chòe ‘Ko-kek Kun-peng-kok’.

12Í-sek-lia̍t-lâng ūi-tio̍h beh kiat-chēng hit-tè tōe, ēng chhit kò-ge̍h ê sî-kan kā in bâi-chòng.

13Hit só͘-chāi ê lâng lóng chhut-lâi chham-ú, tùi án-ni, in tit-tio̍h o-ló. Che sī góa hián-sī êng-kng ê ji̍t. Góa — Chì-koân ê Siōng Chú án-ni soan-pò͘.

14In chhit kò-ge̍h kú phài choan-lâng khì ta̍k só͘-chāi sûn-cha, chiong hiah-ê lâi chhim-hoān Í-sek-lia̍t ê lâng ê si-thé bâi-chòng hó-sè, hō͘ thó͘-tōe kiat-chēng.

15Sûn-cha ê lâng kiâⁿ-thàu ta̍k só͘-chāi, khòaⁿ-tio̍h sí-lâng ê kut-thâu, chiū tī piⁿ--á chòe kì-hō, thèng-hāu lâng chiong hiah-ê kut-thâu bâi-chòng tī ‘Ko-kek Kun-peng-kok’.

16Tī hia mā ū chi̍t chō siâⁿ kiò-chòe Hap-mô͘-ná, ì-sù sī ‘Kun-peng ê siâⁿ’. Án-ni, thó͘-tōe chiū tit-tio̍h kiat-chēng.”

17Chì-koân ê Siōng Chú tùi góa kóng, “Jîn-chú ah, tio̍h tùi ta̍k-chióng ê pe-chiáu kap iá-siù kóng, ‘Lâi, tùi ta̍k só͘-chāi chū-chi̍p óa--lâi, lâi chia̍h góa tī Í-sek-lia̍t ê soaⁿ ūi lín chún-pī ê chè-bah. Lín thang tī hia chia̍h-bah lim-huih.

18Lín beh chia̍h chiàn-sū ê bah, lim sè-kan siú-léng ê huih, chhin-chhiūⁿ teh chia̍h Pa-san pûi ê mî-iûⁿ-káng, iûⁿ-á-kiáⁿ, soaⁿ-iûⁿ-káng, gû-káng siâng-khoán.

19Lín beh chia̍h góa ūi-tio̍h lín chún-pī ê chè-bah; chia̍h-bah chia̍h kah pá, lim-huih lim kah chùi.

20Lín beh tī góa ê iàn-se̍k chia̍h chiàn-bé, bé-peng, chiàn-sū, chiū-sī só͘-ū tāi-kun ê bah, chia̍h kàu pá-pá-pá. Chì-koân ê Siōng Chú án-ni soan-kò.’”

Í-sek-lia̍t Ho̍k-heng

21Siōng Chú kóng, “Góa beh tùi lia̍t-kok hián-sī góa ê êng-kng, bān-bîn chiū beh khòaⁿ-kìⁿ góa án-chóaⁿ hē-chhiú tī in sin-chiūⁿ, si-hêng sím-phòaⁿ.

22Tùi hit-ji̍t khí, Í-sek-lia̍t-lâng beh chai góa sī Siōng Chú — in ê Siōng-tè.

23Lia̍t-kok beh bêng-pe̍k, Í-sek-lia̍t-lâng siū hòng-tio̍k sī in-ūi in ê chōe-kò. In pōe-poān góa, góa chiū bīn oa̍t-cháu bô khòaⁿ-kò͘ in, koh chiong in kau hō͘ in ê tùi-te̍k, hō͘ tùi-te̍k kā in thâi-sí.

24Góa chiàu in ê ù-òe kap chōe-kò tùi-thāi in. Góa bīn oa̍t-cháu bô beh khòaⁿ-kò͘ in.”

25Chì-koân ê Siōng Chú koh kóng, “Taⁿ, góa beh lîn-bín Í-sek-lia̍t só͘-ū ê jîn-bîn, hō͘ siū hòng-tio̍k ê Ngá-kok hō͘-tāi tńg--lâi, koh beh chīn-la̍t ûi-hō͘ góa ê sèng-miâ.

26In tī ka-kī ê hiong-thó͘ an-ku-lo̍k-gia̍p, bô siū ui-hia̍p ê sî, in beh bōe-kì-tit kè-khì só͘ siū ê kiàn-siàu kap pōe-ge̍k góa ê chōe.

27Góa kā in tùi tùi-te̍k ê tōe chū-chi̍p--khí-lâi, tùi lia̍t-kok chhōa tńg--lâi ê sî, lia̍t-kok chiū chai góa sī sîn-sèng.

28Góa kā in hòng-tio̍k khì gōa-pang, āu-lâi koh kā in chū-chi̍p tńg-lâi pún-tōe, bô lâu chi̍t ê tī gōa-pang, in chiū chai góa sī Siōng Chú — in ê Siōng-tè.

29Góa beh chiong góa ê sîn piàⁿ-lo̍h hō͘ Í-sek-lia̍t-lâng, bōe koh oa̍t-tńg-sin bô khòaⁿ-kò͘ in.” Chì-koân ê Siōng Chú án-ni soan-pò͘.

Í-se-kiat-su 39 - 現代台語譯本羅馬字版(TTVR)-闽南语

Learn More About Us