Bí-ka-su 3 - 現代台語譯本羅馬字版(TTVR)-闽南语

Chí-chek Í-sek-lia̍t ê Léng-siù

1Góa kóng: Ngá-kok ê siú-léng, Í-sek-lia̍t-lâng ê koaⁿ-tiúⁿ, tio̍h thiaⁿ!

Lín kiám m̄ chai sím-mi̍h sī kong-pêng?

2Lín iàm-ò͘ⁿ liông-siān, ì-ài siâ-ok;

lín pak lâng ê phê, thek lâng ê kut.

3Lín chia̍h góa chú-bîn ê bah,

pak in ê phê,

kòng-tn̄g in ê kut-thâu,

tok chi̍t-tè chi̍t-tè,

chhin-chhiūⁿ beh lo̍h tiáⁿ chú ê bah.

4Ū chi̍t ji̍t, lín beh kiû-kiò Siōng Chú,

m̄-kú I bōe ìn-tap lín;

hit-sî I ōe bīn oa̍t-cháu m̄ chhap lín,

in-ūi lín ū chòe siâ-ok ê sū.

5Iú-koan chhōa góa ê chú-bîn kiâⁿ bê-lō͘ ê sian-ti, Siōng Chú án-ni kóng:

In ê chhùi nā ū mi̍h thang pō͘, chiū kóng “Pêng-an hô-pêng”;

lâng nā bô ēng mi̍h that in ê chhùi, in chiū tùi hiah-ê lâng soan-chiàn.

6Só͘-í, mî--sî beh kàu, lín khòaⁿ bōe tio̍h īⁿ-siōng;

o͘-àm beh lâi, lín bōe-tàng pok-kòa.

Tùi lín chiah-ê sian-ti,

ji̍t-thâu ōe lo̍h--khì, ji̍t--sî ōe pìⁿ àm-mî.

7Hit-sî, sian-kiàn ōe kiàn-siàu, pok-kòa--ê ōe làu-khùi;

in lóng ng-chhùi tiām--khì,

in-ūi Siōng-tè bô hôe-èng.

8Góa leh, Siōng Chú ê sîn hō͘ góa chhiong-móa khùi-la̍t, chèng-gī-kám, kap ióng-khì,

thang tùi Ngá-kok soan-kò i ê kè-sit,

tùi Í-sek-lia̍t chí-chhut i ê chōe.

9 Ngá-kok ê siú-léng, Í-sek-lia̍t-lâng ê koaⁿ-tiúⁿ, tio̍h chù-ì thiaⁿ!

Lín iàm-ò͘ⁿ chèng-gī,

tian-tò sī-hui.

10Lín ēng huih kiàn-li̍p Sek-an,

ēng chōe-ok khí-chō Iâ-lō͘-sat-léng.

11Lín ê siú-léng sím-phòaⁿ ê sî siu hóe-lō͘,

chè-si ūi-tio̍h kang-chîⁿ kà-sī,

sian-ti ūi-tio̍h chîⁿ kóe-seh Siōng-tè ê chí-sī;

in kèng-jiân káⁿ hōng Siōng Chú ê miâ kóng,

“Siōng Chú tī lán tiong-kan,

chai-hō bōe lîm-kàu lán.”

12Só͘-í, in-ūi lín ê iân-kò͘, Sek-an ōe chhin-chhiūⁿ chhân-hn̂g hō͘ lâng lôe,

Iâ-lō͘-sat-léng ōe pìⁿ-chòe thô͘-tui,

chit-ê tiān ê soaⁿ ōe pìⁿ-chòe chhiū-nâ ê soaⁿ-lûn-á.

Learn More About Us