Ngá-ko 4

Ngá-ko 4 - 現代台語譯本羅馬字版(TTVR)-闽南语

(Lâm)

1Góa ê ài-jîn, lí chin súi, lí si̍t-chāi chin súi!

Lí ê ba̍k-chiu chhin-chhiūⁿ hún-chiáu bih tī phè ê lāi-bīn;

lí ê thâu-mn̂g chhin-chhiūⁿ kui-tīn soaⁿ-iûⁿ tó tī Ki-lia̍t ê soaⁿ-phiâⁿ.

2Lí ê chhùi-khí chhin-chhiūⁿ tú chián-mn̂g kui-kûn ê iûⁿ-bú,

sóe chheng-khì tùi chúi--ni̍h peh--khí-lâi;

ta̍k-chiah lóng siⁿ siang-siⁿ, bô chi̍t chiah phah-sńg.

3Lí ê chhùi-tûn chhin-chhiūⁿ chu-âng ê sòaⁿ;

lí ê chhùi siⁿ-chòe chin hó-khòaⁿ;

lí ê pìn-piⁿ tī phè ê lāi-bīn,

chhin-chhiūⁿ peh-khui ê sia̍h-liû.

4Lí ê ām-kún chhin-chhiūⁿ Tāi-pi̍t ê thah kian-kò͘ hó khòaⁿ,

tiàu móa ióng-sū ê tún-pâi.

5Lí nn̄g lia̍p lin chhin-chhiūⁿ chi̍t tùi lo̍k-á,

chhin-chhiūⁿ lo̍k-bú ê siang-siⁿ-kiáⁿ,

tī pek-ha̍p-hoe tiong teh chia̍h-chháu.

6Ji̍t liâng-léng, iáⁿ chhun-tn̂g ê sî,

góa beh khì bu̍t-io̍h ê soaⁿ, kap jú-hiuⁿ ê soaⁿ-thâu.

7Góa ê ài-jîn, lí si̍t-chāi chin súi,

bô chi̍t-tiám-á thang hiâm.

8Góa ê sin-niû ah, lī-khui Lê-pa-lūn, kap góa chòe-hé lâi-khì;

tùi A-má-ná ê soaⁿ-téng, tùi Sī-nî-ní, chiū-sī Hek-bûn ê soaⁿ-téng,

tùi sai ê hia̍t, tùi pà tòa ê soaⁿ kóaⁿ-kín lo̍h--lâi.

9Góa ê sió-bē, góa ê sin-niû ah, lí ū toa̍t góa ê sim;

lí ba̍k-chiu chi̍t-ē khòaⁿ,

ēng lí ām-kún ê chi̍t tiâu kim-liān-á chiū kā góa ê sim toa̍t--khì.

10Góa ê sió-bē, góa ê sin-niû, lí ê ài-chêng ná hiah bí-biāu.

Lí ê ài-chêng si̍t-chāi pí chiú khah hó;

lí ko-iû ê phang-bī pí só͘-ū ê hiuⁿ-liāu khah phang.

11Góa ê sin-niû ah, lí ê chhùi-tûn tiⁿ chhin-chhiūⁿ tùi phang-pâng tih--lo̍h-lâi ê bi̍t;

lí ê chi̍h ū bi̍t ū lin;

lí ê i-ho̍k ū Lê-pa-lūn ê phang-bī.

12Góa ê sió-bē, góa ê sin-niû, sī só--teh ê hn̂g,

khàm-ba̍t ê chíⁿ, hong-ba̍t ê chúi-chôaⁿ.

13Lí chai-chèng sia̍h-liû ê hn̂g, chhut chin chōe chióng siōng-hó ê ké-chí,

koh ū chńg-kah-hoe kap ná-ta̍t-chhiū.

14Ū ná-ta̍t kap hoan-âng-hoe,

chhiong-pô͘, jio̍k-kùi, kap jú-hiuⁿ,

bu̍t-io̍h, tîm-hiuⁿ, kap it-chhè siōng-téng ê phang-liāu.

15Lí sī hn̂g-tiong ê chúi-chôaⁿ, oa̍h-chúi ê chíⁿ,

tùi Lê-pa-lūn lâu--lo̍h-lâi ê khoe-chúi.

(Lú)

16Pak-hong ah, khí--lâi; lâm-hong ah, chhe--lâi;

chhe-lâi góa ê hn̂g, hō͘ i ê phang-bī piàn-móa ta̍k só͘-chāi;

hō͘ góa chhin-ài--ê ji̍p i ê hn̂g-lāi,

hióng-siū siōng-hó ê ké-chí.

Ngá-ko 4 - 現代台語譯本羅馬字版(TTVR)-闽南语

Learn More About Us