Si-phian 92 - 現代台語譯本羅馬字版(TTVR)-闽南语

An-hioh-ji̍t ê si-koa.Siōng-chàn Siōng Chú ê Kong-chèng kap Chû-ài

1Siōng Chú ah, goán kám-siā lí;

Chì-koân-chiá ah, chhiùⁿ-koa chheng-chàn lí ê miâ si̍t-chāi chin hó!

2Goán chá-khí-sî pò-iông lí ê chû-ài,

ē-hng-sî pò-iông lí ê sìn-si̍t,

3tôaⁿ cha̍p tiâu hiân ê khiā-khîm,

ēng ga̍k-khì bí-biāu ê siaⁿ-im phōaⁿ-chàu.

4Siōng Chú ah, lí ēng lí ê chok-ûi hō͘ góa hoaⁿ-hí;

góa beh in-ūi lí ê chhiú ê só͘-chòe chhiùⁿ-koa khoài-lo̍k.

5Siōng Chú ah, lí ê chok-ûi hiah-ni̍h úi-tāi,

lí ê ì-liām hiah-ni̍h chhim-ò;

6bô tì-sek ê lâng bōe liáu-kái,

gû-gōng ê lâng mā bōe bêng-pe̍k.

7Pháiⁿ-lâng chhin-chhiūⁿ chháu bō͘-sēng;

chòe pháiⁿ ê lâng sui-jiân heng-ōng,

it-tēng lóng ōe bia̍t-bông.

8Chóng-sī Siōng Chú lí chì-chun, éng-oán chiáng-koân.

9Siōng Chú ah, lí ê tùi-te̍k it-tēng bia̍t-bông;

só͘-ū chòe pháiⁿ ê lâng lóng ōe siū phah-sòaⁿ.

10Chóng-sī lí ū ke-thiⁿ góa ê khùi-la̍t, hō͘ góa chhin-chhiūⁿ iá-gû hiah-ni̍h ióng-chòng,

in-ūi lí ū ēng sin ê iû tò tī góa sin-chiūⁿ.

11Góa chhin-ba̍k khòaⁿ-tio̍h góa ê tùi-te̍k siū pò-èng,

chhin-hī thiaⁿ-tio̍h kong-kek góa ê pháiⁿ-lâng siū hêng-hoa̍t.

12Gī-lâng ōe heng-ōng chhin-chhiūⁿ chang-chhiū,

ōe seng-tióng chhin-chhiūⁿ Lê-pa-lūn ê pek-hiuⁿ-chhiū;

13chiah-ê chhiū chai tī Siōng Chú ê tiān,

tī lán Siōng-tè ê tiâⁿ bō͘-sēng.

14Chhiū lāu ê sî iáu ōe kiat ké-chí,

chiap chin chōe, sek chhiⁿ-chhùi,

15teh hián-sī Siōng Chú kong-chèng, lóng bô put-gī;

I sī pó-hō͘ góa ê chio̍h-pôaⁿ.

Learn More About Us