Si-phian 98 - 現代台語譯本羅馬字版(TTVR)-闽南语

Chi̍t phiⁿ si.Siōng-chàn Chiáng-koán Sè-kài ê Siōng-tè

1Lín tio̍h ǹg Siōng Chú chhiùⁿ sin ê koa,

in-ūi I ū chòe kî-biāu ê sū;

I ê chiàⁿ-chhiú,

sèng ê chhiú-kut si-hêng chín-kiù.

2Siōng Chú í-keng soan-pò͘ I ê kiù-un,

tùi lia̍t-pang hián-bêng I ê kong-gī.

3I ōe-kì-tit I tùi Í-sek-lia̍t-ke èng-ún ê chû-ài kap sìn-si̍t;

thiⁿ-piⁿ-hái-kak lóng ū khòaⁿ-kìⁿ lán ê Siōng-tè ê chín-kiù.

4Choân-tōe lóng tio̍h ǹg Siōng Chú chhut hoaⁿ-hí ê siaⁿ;

tio̍h chhut tōa-siaⁿ hoaⁿ-hí chhiùⁿ-koa chheng-chàn I.

5Tio̍h tôaⁿ-khîm chheng-chàn Siōng Chú,

tôaⁿ-khîm chhiùⁿ hó-thiaⁿ ê si-koa o-ló I.

6Tio̍h ēng lat-pah kap sàu-kak,

tī Siōng Chú — lán ê Ông bīn-chêng chhut hoaⁿ-hí ê siaⁿ.

7Goān hái kap hái-tiong ê it-chhè lóng chhut-siaⁿ;

sè-kài kap bān-mi̍h mā chhut tōa-siaⁿ.

8Goān kang-hô phah-pho̍k-á hoaⁿ-hí,

chèng soaⁿ-niá tī Siōng Chú bīn-chêng chòe-hé khoài-lo̍k chhiùⁿ-koa;

9in-ūi I lâi beh sím-phòaⁿ choân-tōe,

I beh chiàu kong-gī sím-phòaⁿ sè-kài,

ēng kong-pêng sím-phòaⁿ bān-bîn.

Learn More About Us