Tān-í-lí-su 11

Tān-í-lí-su 11 - 現代台語譯本羅馬字版(TTVR)-闽南语

1Hit-ê khòaⁿ--khí-lâi chhin-chhiūⁿ lâng--ê koh kóng, “Bí-tí-a ê Tāi-liû-sū choh-ông goân-nî, góa ū khí-lâi hia̍p-chō͘ Bí-ka-le̍k, hō͘ i kian-kiông.

2Hiān-chāi góa beh chiong khak-si̍t ê sū kā i kóng.”

Lâm-hng ê Ông kap Pak-hng ê Ông

“Pho-su ōe ū sì ê ông. Tē-sì ê ông pí í-chêng ê ông khah hù-chiok, koh in-ūi i ê hù-chiok pìⁿ-chòe kiông-sēng, chiū siàn-tōng ta̍k-kok kong-kek Hi-la̍h.

3“Hi-la̍h ōe ū chi̍t ê ióng-béng ê ông chiáng-ak tāi-koân, chiàu i ê ì-sù thóng-tī kok-ka.

4I ê koân-sè chin kiông-sēng ê sî, i ê thian-hā chiū hun-lia̍t, m̄-kú i ê hō͘-tāi lóng bô lâng kè-sêng; hun-lia̍t--chhut-lâi ê kok-ka bô chhin-chhiūⁿ i ū hiah tōa ê koân-le̍k. I ê tè-kok ōe siau-bia̍t, thóng-tī-koân hō͘ gōa-lâng tit--khì.

5“Lâm-hng ê ông ōe kiông--khí-lâi, m̄-kú i ê chiong-kun tiong-kan ōe ū chi̍t ê pí i khah kiông-sēng, chiáng-ak chin tōa ê koân-le̍k.

6Kúi-nā nî āu, lâm-hng kap pak-hng nn̄g kok beh kiat-bêng, lâm-hng ê ông ōe chiong cha-bó͘-kiáⁿ kè hō͘ pak-hng ê ông, m̄-kú lâm-hng ê kong-chú ê éng-hióng-le̍k î-chhî bô-jōa-kú, ông ê sè-le̍k mā tòng bô-jōa-kú. Lâm-hng ê kong-chú kap sū-hāu i ê lâng, i ê kiáⁿ, í-ki̍p hû-chō͘ i ê lâng, lóng ōe siū sat-hāi.

7M̄-kú kong-chú ê āu-thâu ū chi̍t ê khí-lâi choh-ông. I ōe chhōa kun-tūi kong-táⁿ pak-hng ê pó-lúi, tit-tio̍h sèng-lī;

8koh chiong pak-hng ê sîn-bêng, chù ê sîn-siōng, í-ki̍p kim-khì, gûn-khì lóng tòa tńg-khì Ai-ki̍p; kúi-nā nî bô koh kong-kek pak-hng ê ông.

9Āu-lâi pak-hng ê ông ōe chhim-ji̍p lâm-hng ê léng-thó͘, jiân-āu chiah thiat-thè tò-khì pak-hng i ê pún-kok.

10“Pak-hng ê ông ê kiáⁿ ōe tiàu-chi̍p tōa-tūi kun-peng, chún-pī chiàn-cheng; kî-tiong chi̍t ê kiáⁿ ōe chhin-chhiūⁿ tōa-chúi hoàn-lām, chhiong-kek lâm-hng. Āu-lâi, i ōe koh khì chìn-kong, kong-phòa lâm-hng ê pó-lúi.

11Lâm-hng ê ông hui-siông siū-khì, chhut-lâi pâi-tīn kau-chiàn, chiong pak-hng ê tāi-kun phah-pāi.

12Lâm-hng ê ông phah-pāi tùi-te̍k, lia̍h chin chōe lâng, chiū kiau-ngō͘ chū-ko. I sui-jiân thâi-sí kui-bān lâng, m̄-kú i ê sèng-lī î-chhî bô-jōa-kú.

13“Pak-hng ê ông ōe chhōa pí í-chêng koh-khah chōe ê kun-peng chhut-khì kau-chiàn; kúi nî āu, i ōe chhōa kiông-tāi, chong-pī iu-liông ê kun-tūi lâi.

14Hit-sî, ōe ū chin chōe lâng khí-lâi kong-kek lâm-hng ê kok. Lí tông-pau tiong-kan ê pō-le̍k hūn-chú mā ōe pōe-poān lâm-hng ê ông, hō͘ īⁿ-siōng si̍t-hiān, m̄-kú in ōe sit-pāi.

15Pak-hng ê ông ōe koh lâi chō thô͘-tui, kong-táⁿ hông-pī chin kian-kò͘ ê siâⁿ, lâm-hng ê kun-tūi tí-tng bōe tiâu, liân te̍k-soán ê kun-tūi mā bô hoat-tō͘ hông-siú.

16Lâi kong-kek lâm-hng--ê, ōe chhut-chāi i ka-kī ê ì-sù chòe sū, bô lâng ōe-tàng hoán-khòng. I ōe chiàm-léng hit-ê pûi-súi ê tōe, oân-choân khòng-chè hit-ê tōe.

17“Ūi-tio̍h beh thui-hoan lâm-hng ê kok, i koat-tēng ēng choân-kok ê le̍k-liōng cheng-ho̍k lâm-hng, chiū seng kap lâm-hng tēng hô-pêng tiâu-iok, chiong ka-kī ê cha-bó͘-kiáⁿ kè hō͘ lâm-hng ê ông, beh ēng án-ni thui-hoan lâm-hng. M̄-kú i ê kè-chhek bōe sêng-kong, ka-kī mā bōe tit-tio̍h lī-ek.

18Āu-lâi i chiū kái-piàn chú-ì, kong-chhú chin chōe iân-hái tó-sū. M̄-kú ū chi̍t ê gōa-kok ê chiong-kun beh chó͘-chí pak-hng ê ông ê ah-pà, kā i phah-pāi, hō͘ i siū bú-jio̍k.

19Liáu-āu, i ōe thiat-thè tò-khì pún-kok kian-kò͘ ê siâⁿ, m̄-kú ōe hō͘ lâng thâi-sí, chiū éng-oán siau-sit.

20“Í-āu ōe ū chi̍t ê lâng sòa-chiap pak-hng ê ông-ūi. Ūi-tio̍h beh cheng-ka ông-kok ê châi-hù, hit-ê lâng ōe phài koaⁿ-oân tī choân-kok pak-siah. Kè bô-jōa-kú, chit-ê ông sí--khì; m̄-sī in-ūi koat-tàu sí--khì, mā m̄-sī in-ūi chiàn-cheng.”

Pak-hng ê Pō-kun

21“Āu-lâi ōe ū chi̍t ê pi-phí ê lâng khí--lâi. I m̄-sī ha̍p-hoat ê kè-sêng-jîn, m̄-kú thàn lâng bô hông-pī ê sî, ēng khúi-khiat ê chhiú-tōaⁿ toa̍t-chhú ông-ūi.

22I ōe chhin-chhiūⁿ tōa-chúi chiong só͘-ū hoán-tùi i ê sè-le̍k choân-pō͘ chhiong-sòaⁿ, hiah-ê chiàu khè-iok siat-li̍p ê léng-siù mā hō͘ i thâi-sí.

23I kap pa̍t-ê kok-ka kiat-bêng, chiū ēng khúi-chà ê chhiú-tōaⁿ, hō͘ i sió-sió ê kok-ka chiām-chiām kiông-sēng.

24I thàn lâng bô hông-pī ê sî, chhim-ji̍p tùi-hong séng-lāi siōng pûi-súi ê tōe, chòe i ê chó͘-sian m̄-bat chòe--kè ê sū, chiong chhiúⁿ--lâi ê chiàn-lī-phín kap châi-pó pun hō͘ i ê pō͘-hā, koh ēng kè-bô͘ kong-chhú pó-lúi; put-kò chiah-ê lóng sī chiām-sî--ê.

25“Pak-hng ê ông ōe chhōa tāi-kun choân-le̍k kong-kek lâm-hng ê ông, lâm-hng ê ông mā ōe chhōa kiông-tāi ê kun-tūi kap i kau-chiàn. In-ūi ū lâng siat-kè bô͘-hāi lâm-hng ê ông, só͘-í lâm-hng bô hoat-tō͘ tí-khòng.

26Bô͘-hāi lâm-hng ê ông ê lâng sī i ê chhin-sìn, só͘-í i ê kun-tūi chiàn-pāi sì-sòaⁿ, hō͘ lâng thâi-sí--ê chin chōe.

27Chit nn̄g ê ông lóng lāi-sim khúi-khiat; sui-jiân chòe-hé chia̍h-pn̄g, m̄-kú hō͘-siōng kóng pe̍h-chha̍t. In nn̄g pêng ê kè-bô͘ bōe sêng-kong, in-ūi só͘ chí-tēng chiong-kio̍k ê sî-kan iáu-bē kàu.

28Pak-hng ê ông ōe tòa chin chōe châi-pó tńg-khì pún-kok. I sim-lāi hoán-tùi Siōng-tè chú-bîn ê sìn-gióng. I chiàu ka-kī ê ì-sù chòe tāi-chì, liáu-āu chiah tò-khì i ê pún-kok.

29“Kàu chí-tēng ê sî-kan, i ōe koh lâi kong-táⁿ lâm-hng. M̄-kú chit-piàn kap téng-piàn bô siâng-khoán.

30In-ūi Ki-thê ê chiàn-chûn lâi kong-kek pak-hng ê ông, i tio̍h-kiaⁿ thiat-thè.

“I chin m̄ kam-goān, chiū chiàu ka-kī ê ì-sù phò-hoāi i só͘ oàn-hūn ê Siōng-tè chú-bîn ê sìn-gióng, ēng án-ni chhut-khùi. I ōe koh tò-lâi thiaⁿ hiah-ê pōe-poān sìn-gióng ê lâng ê ì-kiàn,

31phài peng lâi chiàm-léng pó-lúi, siat-to̍k sèng-só͘, kìm-chí hiàn ta̍k-ji̍t tio̍h hiàn ê chè hō͘ Siōng-tè, koh chiong khó-ò͘ⁿ ōe tì-kàu húi-bia̍t ê mi̍h chhāi tī sèng-tiān.

32I ōe ēng khúi-kè tit-tio̍h ûi-pōe sìn-gióng ê lâng ê chi-chhî, m̄-kú hiah-ê tùi Siōng-tè tiong-sêng ê lâng ōe ióng-kám chhái-chhú hêng-tōng.

33Ū tì-hūi ê léng-siù ōe kàu-tō chèng-lâng, m̄-kú ū chi̍t tōaⁿ sî-kan in ōe siū sat-hāi, hō͘ lâng sio, hō͘ lâng lia̍h, hō͘ lâng chhiúⁿ-kiap.

34In tī siū pek-hāi ê tiong-kan, kan-ta ōe tit-tio̍h sió-khóa ê oān-chō͘, koh ōe ū chin chōe lâng ké-ì ka-ji̍p in.

35Ū tì-hūi ê lâng ū-ê ōe siū pek-hāi, án-ni sī beh kā kî-tha ê lâng bôa-liān, tī sî-kî kiat-sok í-chêng, kā in kiat-chēng hō͘ in chheng-pe̍k, in-ūi lī Siōng-tè chí-tēng ê sî iáu ū chi̍t tōaⁿ sî-kan.

36“Pak-hng ê ông ōe kè-sio̍k chiàu ka-kī ê ì-sù chòe tāi-chì, chū-ko chū-tāi, khòaⁿ ka-kī pí só͘-ū ê sîn-bêng khah tōa, koh ēng tōa-siaⁿ-ōe siat-to̍k bān-sîn ê Sîn. I chòe chiah-ê tāi-chì, tī Siōng-tè tōa siū-khì kiat-sok í-chêng, lóng chin sūn-lī; m̄-kú Siōng-tè koat-tēng beh chòe ê sū it-tēng ōe si̍t-hiān.

37Pak-hng ê ông bô chun-tiōng i chó͘-sian ê sîn-bêng kap hū-lú kah-ì ê sîn-bêng, bô kā jīm-hô sîn-bêng khàn-chāi-gán-lāi, in-ūi i chū-ko chū-tāi, khòaⁿ ka-kī chhiau-kè it-chhè.

38I kan-ta chông-pài pó-lúi ê sîn-bêng, ēng kim, gûn, pó-chio̍h, kap chun-kùi ê mi̍h-kiāⁿ hiàn hō͘ i chó͘-sian m̄-bat ê sîn-bêng.

39I khò gōa-kok sîn-bêng ê pang-chān, kong-phòa siōng kian-kò͘ ê pó-lúi. Nā ū lâng jīm-tông chàn-sêng i, i chiū kā in chióng-lē, hō͘ in koán chin chōe lâng, koh sù thó͘-tōe hō͘ in.

40“Boa̍t-kî kàu ê sî, lâm-hng ê ông ōe kap pak-hng ê ông kau-chiàn. Pak-hng ê ông ōe phài chiàn-chhia, bé-peng, chin chōe chiàn-chûn, chhin-chhiūⁿ kńg-lê-á-hong kā i hoán-kek, chhin-chhiūⁿ tōa-chúi chhiong-ji̍p hiah-ê kok ê léng-thó͘.

41Pak-hng ê ông koh ōe chhim-ji̍p pûi koh súi ê tōe, thâi-sí kui-chheng kui-bān lâng, m̄-kú Í-tong, Mô͘-ap, kap A-bûn tāi-pō͘-hūn ê lâng ōe tô-thoat bián-sí.

42I beh koh chhun-chhiú kong-kek ta̍k-kok, liân Ai-ki̍p to bōe-tàng tô-thoat.

43I ōe chiáng-ak Ai-ki̍p ê kim-gûn châi-pó kap kùi-tiōng ê mi̍h-kiāⁿ, koh cheng-ho̍k Lī-pí-a kap Kó͘-si̍t.

44M̄-kú tùi tang-pêng kap pak-pêng thoân--lâi ê siau-sit hō͘ i chin hoân-ló, i chiū siū-khì chhut-peng, beh khì siau-bia̍t chin chōe lâng.

45I beh tī hái kap súi ê sèng-soaⁿ tiong-kan tah tông-hông ê pò͘-pîⁿ. M̄-kú i ê kiat-kio̍k í-keng kàu lah, bô lâng ōe-tàng pang-chān i.”

Tān-í-lí-su 11 - 現代台語譯本羅馬字版(TTVR)-闽南语

Learn More About Us