Si-phian 10 - 現代台語譯本羅馬字版(TTVR)-闽南语

1Siōng Chú ah, lí ná ōe khiā-hn̄g-hn̄g?

Hoān-lān ê sî, lí ná ōe bih--teh m̄ chhap goán?

2Pháiⁿ-lâng kiau-ngō͘ hong-kông, kā khùn-khó͘ ê lâng jip-tiâu-tiâu;

tio̍h hō͘ in hām-lo̍h ka-kī só͘ siat ê kè-bô͘.

3Pháiⁿ-lâng khoa-kháu in sim-lāi ê io̍k-bōng;

tham-sim ê lâng siat-to̍k Siōng Chú, biáu-sī I.

4Pháiⁿ-lâng kiau-ngō͘, sim-tiong bô Siōng-tè,

kóng, “Siōng Chú bōe tui-kiù.”

5Pháiⁿ-lâng ê só͘-chòe sū-sū sūn-lī;

Siōng-tè ê sím-phòaⁿ, in bô khàn-chāi-gán-lāi.

Só͘-ū ê tùi-te̍k, in lóng biáu-sī.

6Pháiⁿ-lâng sim-lāi kóng, “Goán it-tēng bōe sit-pāi,

sè-sè-tāi-tāi bōe tú-tio̍h chai-lān.”

7Pháiⁿ-lâng móa-chhùi chiù-mē, kan-chà, khióng-hat;

in ê chi̍h ok-to̍k, hu-ké.

8In tī chng-lāi bâi-ho̍k teh tng-tán,

ba̍k-chiu ti̍t-ti̍t teh siòng bô i-óa ê lâng;

in bih tī ún-ba̍t ê só͘-chāi beh sat-hāi bû-ko͘ ê lâng.

9In bâi-ho̍k tī ún-ba̍t ê só͘-chāi, chhin-chhiūⁿ sai bih tī hia̍t--ni̍h,

tng-tán beh lia̍h sàn-chhiah-lâng,

ēng bāng kā in bāng--teh thoa--khì.

10In khut-teh tng-tán,

hō͘ bô i-óa ê lâng hām-lo̍h in ê jiáu-gê.

11In sim-lāi kóng, “Siōng-tè bōe-kì--tit;

I ng I ê bīn, éng-oán bōe khòaⁿ--kìⁿ.”

12Siōng Chú ah, kiû lí khiā--khí-lâi,

Siōng-tè ah, gia̍h-khí lí ê chhiú;

m̄-thang bōe-kì-tit sàn-chhiah-lâng.

13Pháiⁿ-lâng sī-án-chóaⁿ biáu-sī Siōng-tè,

sim-lāi kóng I bōe tui-kiù?

14Siōng Chú, lí ū khòaⁿ--kìⁿ,

ok-to̍k, oàn-tò͘, lí lóng ū teh kàm-chhat;

lí beh ēng lí ê chhiú pò-èng.

Bô i-óa ê lâng chiong pún-sin kau-tài lí;

lí it-ti̍t ū teh pang-chān ko͘-jî.

15Goān lí phah-tn̄g pháiⁿ-lâng ê chhiú-kut;

goān lí thiat-tóe tui-kiù in ê pháiⁿ.

16Siōng Chú choh-ông, tùi éng-oán kàu éng-oán;

lia̍t-pang lóng tùi I ê tōe siau-bia̍t.

17Siōng Chú ah, sàn-chhiah-lâng ê sim-goān, lí ōe thiaⁿ;

lí beh chòng in ê táⁿ, àⁿ hī-khang thiaⁿ in ê kî-kiû.

18Lí beh thòe ko͘-jî kap siū ap-pek ê lâng sin-oan,

hō͘ sè-kan-lâng bô koh khióng-hat in.

Learn More About Us