Khé-sī-lio̍k 2

Khé-sī-lio̍k 2 - 現代台語譯本羅馬字版(TTVR)-闽南语

Hō͘ Í-hut-só͘ ê Kàu-hōe ê Phoe

1“Lí tio̍h siá-phoe hō͘ Í-hut-só͘ ê kàu-hōe ê thiⁿ-sài, kóng,

“‘Chiàⁿ-chhiú tháⁿ chhit lia̍p chhiⁿ, tī chhit ki kim teng-tâi ê tiong-kan teh kiâⁿ Hit-ūi án-ni kóng:

2Góa chai lí ê só͘-chòe; lí án-chóaⁿ teh lô-khó͘ kap thun-lún. Góa chai lí bōe iông-jím pháiⁿ-lâng; lí mā bat khó-giām hiah-ê chū-chheng sī sù-tô͘ kî-si̍t m̄-sī ê lâng, khòaⁿ-chhut in sī pe̍h-chha̍t--ê.

3Lí ū thun-lún, bat ūi-tio̍h góa ê miâ jím-siū kan-khó͘, lóng bô ià-siān.

4M̄-kú, ū chi̍t hāng tāi-chì góa beh kā lí chek-pī, chiū-sī lí í-keng pàng-sak lí tong-chho͘ ê thiàⁿ-sim.

5Só͘-í, tio̍h ōe-kì-tit lí tùi tó-ūi tūi-lo̍h; tio̍h hóe-kái, chòe lí tong-chho͘ só͘ chòe ê kang-chok. Nā bô, góa ōe khì lí hia, chiong lí ê teng-tâi tùi goân-ūi sóa-khui.

6Put-kò, lí iáu ū chi̍t hāng khó-chhú ê sū, chiū-sī lí mā kap góa kâng-khoán oàn-hūn Nî-ko-la-tóng ê hêng-ûi.

7“‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.

“‘Tek-sèng ê lâng, góa beh hō͘ i chia̍h Siōng-tè ê Lo̍k-hn̂g tiong hit-châng oa̍h-miā-chhiū ê ké-chí.’”

Hō͘ Sū-múi-ná ê Kàu-hōe ê Phoe

8“Lí tio̍h siá-phoe hō͘ Sū-múi-ná ê kàu-hōe ê thiⁿ-sài, kóng,

“‘Khí-thâu--ê kap soah-bé--ê, sí ū koh-oa̍h Hit-ūi án-ni kóng:

9Góa chai lí ê hoān-lān kap sàn-chhiah; kî-si̍t lí sī hó-gia̍h. Góa chai lí ū siū-tio̍h chū-chheng Iû-thài-lâng ê lâng ê húi-pòng; kî-si̍t in m̄-sī Iû-thài-lâng, sī Sat-tàn ê chi̍p-thoân.

10M̄-bián kiaⁿ lí teh-beh siū ê khó͘-lān. Lí khòaⁿ, Mô͘-kúi teh-beh chiong lín tiong-kan kúi-nā lâng koaiⁿ-lo̍h kaⁿ, beh kā lín khó-giām, lín ōe siū khó͘-lān cha̍p ji̍t. Lí tio̍h chīn-tiong kàu sí, góa ōe sù lí oa̍h-miā ê hoa-koan.

11“‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.

“‘Tek-sèng ê lâng choa̍t-tùi bōe siū-tio̍h tē-jī piàn sí ê chai-hāi.’”

Hō͘ Pia̍t-ka-mô͘ ê Kàu-hōe ê Phoe

12“Lí tio̍h siá-phoe hō͘ Pia̍t-ka-mô͘ ê kàu-hōe ê thiⁿ-sài, kóng,

“‘Ū siang-bīn-lāi ê kiàm Hit-ūi án-ni kóng:

13Góa chai lí tòa tó-ūi, chiū-sī ū Sat-tàn ê chō-ūi hia. Lí ū kian-siú góa ê miâ, sīm-chì góa tiong-si̍t ê kiàn-chèng-jîn An-thê-phà tī lín tiong-kan, chiū-sī Sat-tàn tòa ê só͘-chāi, siū sat-hāi ê sî, lí mā bô hó͘-jīn tùi góa ê sìn-gióng.

14M̄-kú góa ū kúi-nā hāng tāi-chì beh kā lí chek-pī: In-ūi tī lí hia ū lâng chip-siú Pa-lân ê kà-sī, chit-ê Pa-lân ū kà Pa-le̍k khì ín-iú Í-sek-lia̍t ê kiáⁿ-sun, hō͘ in chia̍h chè ngó͘-siōng ê mi̍h, koh kiâⁿ kan-îm.

15Chhin-chhiūⁿ án-ni, lí hia mā ū lâng chip-siú Nî-ko-la-tóng ê kà-sī.

16Só͘-í, tio̍h hóe-kái. Nā bô, góa liâm-piⁿ ōe khì lí hia, ēng góa chhùi-lāi ê kiàm kap in kau-chiàn.

17“‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.

“‘Tek-sèng ê lâng góa beh chiong pó-chûn--khí-lâi ê má-ná hō͘ i, koh beh hō͘ i chi̍t tè pe̍h-chio̍h, chio̍h ê téng-bīn ū siá sin ê miâ; chit-ê miâ, niá-siū ê lâng í-gōa, bô lâng bat.’”

Hō͘ Chhui-ngá-chhui-lat ê Kàu-hōe ê Phoe

18“Lí tio̍h siá-phoe hō͘ Chhui-ngá-chhui-lat ê kàu-hōe ê thiⁿ-sài, kóng,

“‘Siōng-tè ê Kiáⁿ, chiū-sī ba̍k-chiu chhin-chhiūⁿ hé-iām, kha chhin-chhiūⁿ kng-liāng ê tâng Hit-ūi án-ni kóng:

19Góa chai lí ê hêng-ûi, lí ê thiàⁿ, sìn-sim, ho̍k-sāi, kap thun-lún; koh chai lí chòe-kūn ê só͘-chòe pí khí-thâu--ê khah hó.

20M̄-kú, ū chi̍t hāng tāi-chì góa beh kā lí chek-pī, chiū-sī lí iông-ún chū-chheng choh sian-ti ê hū-jîn-lâng Iâ-sé-phek; i kà-sī koh bê-he̍k góa ê po̍k-jîn khì hoān kan-îm koh chia̍h chè ngó͘-siōng ê mi̍h.

21Góa ū hō͘ i sî-kan thang hóe-kái, m̄-kú i m̄-khéng hóe-kái lī-khui îm-hēng.

22Khòaⁿ ah, góa beh hō͘ i kan-khó͘ tó-chhn̂g; hiah-ê kap i hoān kan-îm ê lâng nā bô hóe-kái, thêng-chí in kap i ê îm-hēng, góa mā beh hō͘ in siū tōa khó͘-lān.

23Góa beh thâi-sí hiah-ê tè i ê lâng. Án-ni lóng-chóng ê kàu-hōe chiū ōe chai góa sī kàm-chhat lâng ê sim-su ì-liām--ê, góa beh chiàu lín ta̍k-ê lâng ê hêng-ûi kā lín pò-èng.

24“‘Chóng-sī lín chiah-ê kî-tha ê Chhui-ngá-chhui-lat-lâng, lín bô siū chit-khoán kàu-tō, m̄ bat só͘-ūi Sat-tàn ê ò-pì ê lâng, góa kā lín kóng, góa bōe ke-thiⁿ pa̍t-khoán ê tāng-tàⁿ hō͘ lín.

25M̄-kú, lín tio̍h kian-siú lín í-keng ū--ê, ti̍t-kàu góa lâi.

26“‘Tek-sèng koh kè-sio̍k ūi-tio̍h góa chòe kang kàu lō͘-bé ê lâng, góa beh hō͘ i koân-pèng thang tī-lí bān-kok;

27i beh ēng thih-koáiⁿ tī-lí in, chhin-chhiūⁿ kòng-chhùi hûi-khì;

28góa mā ū án-ni tùi góa ê Pē niá-siū koân-pèng. Tek-sèng ê lâng, góa mā beh hō͘ i khé-bêng-chhiⁿ.

29“‘Ū hī-khang ê lâng lóng tio̍h thiaⁿ Sèng Sîn kā chiah-ê kàu-hōe kóng ê ōe.’”

Khé-sī-lio̍k 2 - 現代台語譯本羅馬字版(TTVR)-闽南语

Learn More About Us