Í-sài-a-su 66

Í-sài-a-su 66 - 現代台語譯本羅馬字版(TTVR)-闽南语

Siōng-tè Iau-kiû ê Kèng-pài

1Siōng Chú án-ni kóng:

Thiⁿ sī góa ê chō-ūi;

tōe sī góa ê kha-tiam.

Lín beh tī tó-ūi ūi-tio̍h góa khí kiong-tiān?

Tó-ūi ōe-tàng chòe góa an-hioh ê só͘-chāi?

2Chiah-ê it-chhè sī góa ê chhiú só͘ chō,

só͘-í, chiah-ê lóng sī góa--ê.

Siōng Chú án-ni soan-pò͘.

Góa beh khòaⁿ-kò͘--ê sī

khùn-khó͘, sim-lêng thòng-hóe,

thiaⁿ-tio̍h góa ê ōe chiū kiaⁿ-ùi ê lâng.

3Thâi gû hiàn chòe chè, mā thâi lâng;

hiàn iûⁿ-ko, mā kòng-tn̄g káu ê ām-kún;

hiàn sò͘-chè, mā hiàn ti ê huih;

sio jú-hiuⁿ, mā chàn-bí ngó͘-siōng;

chit-khoán lâng í-keng soán-tēng ka-kī ê lō͘,

in ê sim ì-ài thang iàm-ò͘ⁿ ê sū.

4Só͘-í, góa soán-tēng beh ge̍k-thāi in,

hō͘ kiaⁿ-hiâⁿ ê tāi-chì lîm-kàu in.

In-ūi góa kiò, bô lâng ìn;

góa kóng, in m̄ thiaⁿ.

In tian-tò chòe góa khòaⁿ-chòe siâ-ok ê sū,

soán-te̍k góa bô hoaⁿ-hí ê tāi-chì.

Siōng-tè ūi-tio̍h Sek-an Sin-oan

5Thiaⁿ-tio̍h Siōng Chú ê ōe chiū kiaⁿ-ùi ê lâng,

lín tio̍h thiaⁿ I ê ōe. I kóng:

Lín ka-kī ê hiaⁿ-tī oàn-hūn lín,

in-ūi góa ê miâ ê iân-kò͘ khì-sak lín.

In kóng, “Goān Siōng Chú tit-tio̍h êng-iāu,

hō͘ goán thang khòaⁿ-kìⁿ lín ê hoaⁿ-hí.”

Kî-si̍t, in chiah sī eng-kai siū lêng-jio̍k--ê.

6Thiaⁿ leh, siâⁿ-lāi ū soan-hoa ê siaⁿ!

Tùi sèng-tiān ū siaⁿ hoat-chhut!

Che sī Siōng Chú teh pò-èng I te̍k-jîn ê siaⁿ!

7Sèng-siâⁿ iáu-bē thàng-thiàⁿ chiū seng-sán;

Sek-an iáu-bē chhui-chūn chiū siⁿ-kiáⁿ.

8Siáⁿ-lâng bat thiaⁿ-tio̍h chit-khoán sū?

Siáⁿ-lâng bat khòaⁿ-kìⁿ chiah-ê tāi-chì?

Kiám ū kok-ka tī chi̍t ji̍t lāi chiū sán-seng?

Kiám ū bîn-cho̍k tī chi̍t-ba̍k-nih-kú chiū siⁿ--chhut-lâi?

M̄-kú Sek-an chi̍t-ē khai-sí chhui-chūn, kiáⁿ-jî chiū chhut-sì.

9Siōng Chú án-ni kóng:

Góa kì-jiân hō͘ lâng lîm-phûn, kiám ōe bô hō͘ eⁿ-á siⁿ--chhut-lâi?

Lí ê Siōng-tè án-ni mn̄g:

Góa sī hō͘ eⁿ-á chhut-sì--ê, kiám ōe kā bú-thai koaiⁿ--khí-lâi?

10Lín chiah-ê thiàⁿ-sioh Iâ-lō͘-sat-léng ê lâng,

tio̍h kap i chòe-hé hoaⁿ-hí, ūi-tio̍h i khoài-lo̍k.

Lín chiah-ê ūi-tio̍h i pi-siong ê lâng,

tio̍h kap i chòe-hé hoaⁿ-hí khèng-chiok.

11Lín thang tī i ê heng-chêng suh-lin tit-tio̍h boán-chiok, tit-tio̍h an-ùi;

tùi i chhiong-chiok ê lin tit-tio̍h iúⁿ-chhī lâi hoaⁿ-hí.

12Siōng Chú kóng,

“Góa beh hō͘ Iâ-lō͘-sat-léng hoân-êng, chhin-chhiūⁿ hô-liû ti̍t-ti̍t lâu;

góa beh hō͘ bān-kok ê châi-hù chhin-chhiūⁿ khoe-chúi kā lí im-móa.

Góa ōe kā lí phō tī heng-chêng hō͘ lí suh-lin,

tī kha-thâu-u téng kap lí sńg, kā lí lāng.

13Chhin-chhiūⁿ lāu-bú an-ùi i ê kiáⁿ,

góa mā beh an-ùi lín;

lín ōe tī Iâ-lō͘-sat-léng tit-tio̍h an-ùi.

14Lín ōe khòaⁿ--kìⁿ, sim chiū hoaⁿ-hí;

chhin-chhiūⁿ chháu tit-tio̍h lūn-te̍k bō͘-sēng, lín ōe ná ióng-chòng.

Lâng lóng ōe chai, góa Siōng Chú ê khùi-la̍t kap ho̍k-sāi góa ê lâng tông-chāi;

góa ê siū-khì ōe tùi góa ê te̍k-jîn hoat-chhut.”

15Khòaⁿ leh, Siōng Chú tī hé-tiong lâi-lîm,

I ê chiàn-chhia chhin-chhiūⁿ kńg-lê-á-hong sàu--lâi;

I tī tōa siū-khì tiong si-hêng I ê pò-èng,

tī hé-tiong chip-hêng I ê hêng-hoa̍t.

16Siōng Chú beh ēng hé kap to sím-phòaⁿ choân jîn-lūi;

chin chōe lâng ōe hō͘ Siōng Chú chhú-sí.

17Siōng Chú kóng, “Hiah-ê chiàu īⁿ-kàu ê gî-sek sèng-pia̍t ka-kī, kiat-chēng ka-kī, tè lâng ji̍p-khì hn̂g-lāi pài ngó͘-siōng, chia̍h ti-bah, niáu-chhú, thang iàm-ò͘ⁿ ê mi̍h ê lâng, lóng ōe chòe-chi̍t-ē bia̍t-bông.

18“Góa chai in ê chok-ûi kap ì-liām. Góa beh lâi lah, beh chiong bān-kok í-ki̍p kóng ta̍k-chióng gú-giân ê lâng lóng chi̍p óa--lâi; in ōe lâi, ōe khòaⁿ-kìⁿ góa ê êng-kng.

19Góa beh tī in tiong-kan chhāi chi̍t ê kì-hō, koh tùi in tiong-kan chhe tô-thoat ê lâng khì lia̍t-kok, chiū-sī Tha-si, Lī-pí-a, gâu siā-chìⁿ ê Lū-tí-a, Thó͘-pa, Hi-la̍h, koh kàu iáu m̄-bat thiaⁿ-tio̍h góa ê miâ, m̄-bat khòaⁿ-tio̍h góa ê êng-kng hiah-ê hn̄g-hn̄g ê hái-tó. In beh tī lia̍t-kok thoân-pò góa ê êng-kng.

20Siōng Chú án-ni kóng: In beh tùi lia̍t-kok chiong lín ê tông-pau chhōa--tò-lâi; ū-ê khiâ-bé, ū-ê chē chiàn-chhia, bé-chhia, ū-ê khiâ lô, lo̍k-tô, lâi góa ê sèng-soaⁿ Iâ-lō͘-sat-léng, chòe lé-mi̍h hiàn hō͘ Siōng Chú; tú chhin-chhiūⁿ Í-sek-lia̍t-lâng ēng chheng-khì ê khì-khū tóe chè-mi̍h hiàn tī Siōng Chú ê tiān.

21Góa mā beh chí-tēng in tiong-kan chi̍t-kóa lâng chòe chè-si, chòe Lī-bī-lâng.” Siōng Chú án-ni soan-pò͘.

22Siōng Chú kóng:

Góa beh chō ê sin-thiⁿ-sin-tōe ōe chiàu góa ê chí-ì kú-tn̂g chûn-chāi;

lín ê hō͘-tāi kap lín ê miâ mā ōe án-ni kú-tn̂g chûn-chāi.

23Múi ge̍h ê chhoe-it kap ta̍k-ê An-hioh-ji̍t,

só͘-ū ê lâng lóng ōe lâi góa bīn-chêng kèng-pài góa.

Siōng Chú án-ni soan-pò͘.

24Kèng-pài góa ê lâng chhut--khì, ōe khòaⁿ-kìⁿ pōe-poān góa ê lâng ê si-thé; chia̍h hiah-ê si-thé ê chiù-thâng bōe sí, sio in ê hé bōe hoa; só͘-ū ê lâng lóng ōe iàm-ò͘ⁿ in.

Í-sài-a-su 66 - 現代台語譯本羅馬字版(TTVR)-闽南语

Learn More About Us