Í-se-kiat-su 38

Í-se-kiat-su 38 - 現代台語譯本羅馬字版(TTVR)-闽南语

Ko-kek — Siōng Chú ê Kang-khū

1Siōng Chú tùi góa kóng,

2“Jîn-chú ah, lí tio̍h tùi Má-kok tōe-khu ê Ko-kek thoân-ta̍t góa ê sìn-sit; i sī Bí-siat kap Thó͘-pa chit nn̄g ê kok-ka ê thóng-tī-chiá.

3Góa — Chì-koân ê Siōng Chú án-ni kóng, ‘Bí-siat kap Thó͘-pa ê thóng-tī-chiá Ko-kek, góa beh kap lí choh-tùi.

4Góa beh ēng kau-á kau lí ê gê-chô, kā lí thoa hoan-thâu, hō͘ lí kap lí tòa-niá ê kun-tūi, chiàn-bé, bé-peng thâi-su thiat-thè. Lí ê kun-tūi lâng chōe, ū choân-thò ê bú-chong; in chhiú gia̍h tōa-sòe tún-pâi kap to-kiàm.

5Lí ê kun-tūi ū tùi Pho-su, Kó͘-si̍t, kap Hut chhiàⁿ--lâi ê chiàn-sū; in mā lóng the̍h tún-pâi, tì thâu-khoe.

6Lēng-gōa, Ko-bia̍t-lâng kap ke̍k pak-pêng Tô-ka-má-cho̍k ê kun-tūi, í-ki̍p chōe-chōe lâng mā tè lí lâi.

7Lí kap chū-chi̍p tī lí hia ê tāi-kun tio̍h chún-pī hó-sè; lí tio̍h chòe in ê chí-hui-koaⁿ.

8Kè chi̍t tōaⁿ sî-kan, góa beh chhe-phài lí tī chiong-lâi chhut-peng cheng-ho̍k Í-sek-lia̍t; i ê jîn-bîn bat thoat-lī to-kiàm ê chai-lān, tùi lia̍t-kok tńg--lâi, chū-chi̍p tī Í-sek-lia̍t pha-hng ê chèng-soaⁿ an-jiân khiā-khí.

9Lí kap lí ê tāi-kun, í-ki̍p chin chōe tè lí ê gōa-cho̍k-lâng, beh chhin-chhiūⁿ pō-hong sàu--lâi, chhin-chhiūⁿ o͘-hûn khàm-ba̍t chit-tè thó͘-tōe.’

10“Chì-koân ê Siōng Chú tùi Ko-kek án-ni kóng, ‘Hit-sî, lí ê sim beh tô͘-bô͘ pháiⁿ-sū.

11Lí siūⁿ-kóng: Góa beh chhim-ji̍p hit-tè bô siat-hông ê tōe, khì pêng-an seng-oa̍h ê jîn-bîn hia; in khiā-khí ê só͘-chāi bô chhiûⁿ, bô mn̂g, bô chhòaⁿ.

12Góa beh khì hia kong-kek í-chêng pha-hng, hiān-chāi ū lâng tòa ê tōe, kong-kek hiah-ê tùi lia̍t-kok tńg--lâi, chek-chū chin chōe cheng-siⁿ kap châi-pó, tòa tī choân-tōe tiong-sim ê jîn-bîn; tī hia chhiúⁿ-toa̍t in ê châi-bu̍t.’

13Sī-pa-lâng, Tí-tān-lâng, kap tùi Tha-si hù-kūn ta̍k siâⁿ-tìn lâi ê seng-lí-lâng beh mn̄g lí, ‘Lí siūⁿ-beh chhiúⁿ cheng-siⁿ, chhiúⁿ-toa̍t kim-gûn châi-pó sī--bô? Lí siūⁿ-beh chiong só͘-ū ê mi̍h-kiāⁿ lóng chhiúⁿ-chhiúⁿ--khì sī--bô?’

14“Só͘-í, jîn-chú ah, lí tio̍h tùi Ko-kek thoân-ta̍t góa ê sìn-sit, kóng: Chì-koân ê Siōng Chú án-ni kóng, ‘Lí bêng-bêng chai góa ê chú-bîn Í-sek-lia̍t pêng-an kè-ji̍t,

15kèng-jiân tùi ke̍k pak-pêng lí tòa ê só͘-chāi, chhōa kiông-béng ê tāi-kun khiâ chiàn-bé lâi.

16Ko-kek ah, lí lâi kong-táⁿ góa ê chú-bîn Í-sek-lia̍t; lí ê kun-tūi chhin-chhiūⁿ o͘-hûn khàm-ba̍t tōe-bīn. Kè chi̍t tōaⁿ sî-kan, góa beh chhōa lí khì chhim-lio̍k góa ê thó͘-tōe, thang hō͘ lia̍t-kok jīn-bat góa; góa mā beh thong-kè lí, tùi in chèng-si̍t góa sī sîn-sèng.

17Lí chiū-sī góa chá-chêng thong-kè góa ê po̍k-jîn, Í-sek-lia̍t ê chèng sian-ti só͘ ū-giân hit-ê lâng. Hit-sî, góa bat thong-kè góa ê po̍k-jîn — Í-sek-lia̍t ê chèng sian-ti thoân-ta̍t góa ê sìn-sit, góa beh chhōa lí lâi kong-táⁿ Í-sek-lia̍t.’ Chì-koân ê Siōng Chú án-ni soan-kò.”

Siōng Chú Hêng-hoa̍t Ko-kek

18“Chì-koân ê Siōng Chú kóng, ‘Ko-kek chhim-lio̍k Í-sek-lia̍t hit-ji̍t, góa beh hoat tōa siū-khì.

19Góa kui pak-tó͘ hé tōa siū-khì soan-kò: Tī hit-ji̍t, Í-sek-lia̍t beh ū tōa tōe-tāng.

20Hái--ni̍h ê hî, khong-tiong ê pe-chiáu, chhân-iá ê cháu-siù, tōe-chiūⁿ ê tōng-bu̍t, í-ki̍p só͘-ū ê lâng, lóng beh tī góa ê bīn-chêng phi̍h-phi̍h-chhoah. Koân-soaⁿ beh piak-li̍h, soaⁿ-khàm beh pang--khì, siâⁿ-chhiûⁿ beh tó-hoāi.

21Góa beh tī Í-sek-lia̍t chèng-soaⁿ ēng to-kiàm kong-kek Ko-kek; i ê kun-tūi beh hō͘-siōng chân-sat. Góa — Chì-koân ê Siōng Chú án-ni soan-kò.

22Góa beh ēng un-e̍k kap to-kiàm hêng-hoa̍t i. Góa koh beh lo̍h tōa-hō͘, piàⁿ peng-pha̍uh, kàng tōa-hé, liû-hông tī i só͘ tòa-niá ê kun-tūi kap tè i ê gōa-cho̍k-lâng sin-chiūⁿ,

23thong-kè chiah-ê, tùi lia̍t-kok hián-bêng góa ka-kī, í-ki̍p góa ê úi-tāi kap sîn-sèng. Hit-sî, in chiū chai góa sī Siōng Chú.’”

Í-se-kiat-su 38 - 現代台語譯本羅馬字版(TTVR)-闽南语

Learn More About Us