Iok-pek-kì 8 - 現代台語譯本羅馬字版(TTVR)-闽南语

1 Su-a-lâng Pí-le̍k-ta̍t ìn kóng:

2Chit-khoán tāi-chì lí beh kóng jōa kú?

Lí só͘ kóng ê ōe chhin-chhiūⁿ kông-hong!

3Siōng-tè kiám ōe oai-khiok chèng-ti̍t?

Choân-lêng-chiá kiám ōe oai-khiok kong-gī?

4Lí ê kiáⁿ-jî ū tek-chōe I,

I chiah chiàu in ê chōe-kò hō͘ in siū èng-tit ê pò-èng.

5Lí nā chhē-kiû Siōng-tè,

tùi Choân-lêng-chiá kiû-un,

6lí nā sûn-kiat chèng-ti̍t,

I ōe khí-lâi pang-chān lí,

kā lí koh-chài khí-chō pêng-an khiā-khí ê só͘-chāi.

7Lí khí-thâu sui-jiân bî-sòe,

kàu-bé ōe chin hoat-ta̍t.

8Lí khì mn̄g chêng sè-tāi ê lâng,

khòaⁿ in ū tùi lia̍t-chó͘ o̍h-tio̍h sím-mi̍h.

9Lán chā-hng chiah chhut-sì, m̄ chai pòaⁿ-hāng;

lán tī sè-kan ê ji̍t-chí put-kò chhin-chhiūⁿ iáⁿ;

10in kà-sī lí, kā lí kóng,

kóng-chhut in sim-lāi ê ōe.

11Bô thô͘-bê, pô͘-chháu kiám ōe seng-tióng?

Bô chúi, lô͘-úi kiám ōe tōa-châng?

12In iáu chíⁿ, iáu-bē koah--khí-lâi,

chiū pí kî-tha ê chháu khah chá ta--khì.

13Só͘-ū bōe-kì-tit Siōng-tè ê lâng ê kiat-kio̍k mā-sī án-ni;

bô kèng-ùi Siōng-tè ê lâng ê ǹg-bāng ōe bô--khì.

14In só͘ i-óa--ê sī chin khoài tn̄g ê si,

só͘ óa-khò--ê sī ti-tu-bāng.

15In óa-khò ti-tu-bāng, m̄-kú khò put chū,

khîⁿ-tiâu bāng, m̄-kú tòng bōe tiâu.

16In chhin-chhiūⁿ si̍t-bu̍t ū ji̍t chiò chiū chhiⁿ-chhùi,

tîn soan kah móa-hn̂g.

17In ê kun khûn tī chio̍h-thâu-tui,

chǹg-ji̍p chio̍h-thâu phāng.

18In nā hō͘ lâng khau--khí-lâi,

ōe hō͘ i ka-kī ê só͘-chāi hó͘-jīn,

kóng: Góa m̄ bat lín.

19In it-tēng ōe tī lō͘-piⁿ nōa--khì,

āu-lâi ū sin ê íⁿ tùi tōe--ni̍h koh puh--chhut-lâi.

20Khòaⁿ leh, Siōng-tè it-tēng bōe pàng-sak sûn-choân ê lâng,

mā bōe pang-chān chòe pháiⁿ ê lâng.

21I ōe hō͘ lí koh-chài chhiò-gī-gī,

hō͘ lí ê chhùi chhut hoaⁿ-hí ê siaⁿ.

22Oàn-hūn lí ê lâng ōe ēng kiàn-siàu chòe saⁿ chhēng;

pháiⁿ-lâng ê pò͘-pîⁿ ōe bô--khì.

Learn More About Us