Si-phian 63 - 現代台語譯本羅馬字版(TTVR)-闽南语

Tāi-pi̍t tī Iû-tāi khòng-iá ê sî chòe ê si.Khat-bō͘ Siōng-tè

1Siōng-tè ah, lí sī góa ê Siōng-tè, góa pek-chhiat tui-chhē lí;

chhin-chhiūⁿ tōe khòng-hān bô chúi, góa ê sim-sîn chhùi-ta khat-bō͘ lí;

góa ê jio̍k-thé him-bō͘ lí kàu beh hūn--khì.

2Só͘-í góa tī sèng-só͘ chhē lí,

ài khòaⁿ lí ê koân-lêng kap êng-kng.

3Góa ê chhùi-tûn beh siōng-chàn lí,

in-ūi lí ê chû-ài pí sìⁿ-miā khah hó.

4Góa beh chi̍t-sì-lâng chheng-chàn lí,

beh gia̍h-chhiú kiû-kiò lí ê miâ.

5Góa ê sim-sîn ōe boán-chiok, chhin-chhiūⁿ hióng-siū hong-sēng ê iàn-se̍k;

góa mā beh ēng hoaⁿ-hí ê chhùi-tûn chhiùⁿ-koa siōng-chàn lí.

6Góa tó tī bîn-chhn̂g kì-liām lí,

mî--sî ta̍k-kiⁿ mā siàu-liām lí.

7In-ūi lí ū pang-chān góa,

góa beh tī lí ê si̍t-kó͘-ē hoaⁿ-hí chhiùⁿ-koa.

8Góa tè lí tè-tiâu-tiâu;

lí ê chiàⁿ-chhiú hû-chhî góa.

9M̄-kú siàu-siūⁿ góa sìⁿ-miā ê lâng,

in ōe hām-lo̍h tī tōe-ē siōng-chhim ê só͘-chāi.

10In ōe hō͘ to-kiàm thâi,

hō͘ chhâi-lông chia̍h.

11Chóng-sī ông ōe in-ūi Siōng-tè lâi hoaⁿ-hí;

só͘-ū kí I chiù-chōa ê lâng ōe in-ūi I lâi khoa-kháu;

m̄-kú kóng pe̍h-chha̍t ê chhùi ōe siū that-ba̍t.

Learn More About Us