Í-sài-a-su 62

Í-sài-a-su 62 - 現代台語譯本羅馬字版(TTVR)-闽南语

Sek-an ê Sin-oan kap Chín-kiù

1Ūi-tio̍h Iâ-lō͘-sat-léng ê iân-kò͘, góa bōe tiām-tiām,

ūi-tio̍h Sek-an ê iân-kò͘, góa bōe chēng-chēng;

ti̍t-kàu i ê kong-gī chhin-chhiūⁿ kng hoat-chhut,

i ê chín-kiù chhin-chhiūⁿ hé-pé teh to̍h.

2 Iâ-lō͘-sat-léng ah, bān-kok lóng beh khòaⁿ-kìⁿ lí tek-sèng;

bān-ông beh khòaⁿ-kìⁿ lí ê êng-iāu.

Lâng beh ēng sin ê miâ chheng-ho͘ lí,

sī Siōng Chú pún-sin kā lí hō--ê.

3Lí sī Siōng Chú chhiú-tiong siōng súi ê hoa-koan,

sī lí ê Siōng-tè chhiú--ni̍h ê ông-koan.

4Lí bōe koh hō͘ lâng kiò-chòe “Siū khì-sak--ê”,

lí ê thó͘-tōe bōe koh kiò-chòe “Hong-hòe--ê”.

Lâng beh chheng-ho͘ lí chòe “Lí sī góa siōng ì-ài--ê”,

kā lí ê thó͘-tōe kiò-chòe “Ū kui-sio̍k--ê”.

In-ūi Siōng Chú ì-ài lí;

lí ê thó͘-tōe ōe ū kui-sio̍k.

5Chhin-chhiūⁿ siàu-liân-lâng chhōa siàu-lú,

lí ê chū-bîn mā ōe án-ni thiàⁿ-sioh lí;

chhin-chhiūⁿ sin-lông ì-ài sin-niû,

lí ê Siōng-tè mā ōe án-ni ì-ài lí.

6 Iâ-lō͘-sat-léng ah, góa ū phài siú-bōng ê lâng

tī lí ê siâⁿ-chhiûⁿ téng teh kò͘;

in mî-ji̍t lóng bōe chēng-chēng.

Kiû-kiò Siōng Chú ê lâng,

lín lóng m̄-thang hioh-khùn,

7hō͘ Siōng Chú bô thang hioh-khùn,

ti̍t-kàu I tiông-kiàn Iâ-lō͘-sat-léng,

hō͘ chit-ê siâⁿ tī choân-tōe siū chheng-chàn.

8Siōng Chú í-keng gia̍h I ê chiàⁿ-chhiú,

ēng I ū khùi-la̍t ê chhiú-kut li̍p-sè:

Góa choa̍t-tùi bōe koh chiong lí ê ngó͘-kok hō͘ tùi-te̍k chòe chia̍h-mi̍h,

gōa-kok-lâng mā bōe koh lim lí lô-khó͘ tit--lâi ê chiú.

9Chèng-choh ê lâng ōe-tàng chia̍h i só͘ chèng--ê,

koh chheng-chàn Siōng Chú;

siu-sêng phû-tô ê lâng ōe-tàng

tī góa sèng-tiān ê tiâⁿ lim-chiú.

10 Iâ-lō͘-sat-léng ê chū-bîn ah, tio̍h chhut--khì, chhut-khì siâⁿ-mn̂g gōa,

ūi-tio̍h tńg--lâi ê tông-pau khui-lō͘.

Tio̍h siu-chō chi̍t tiâu tōa-lō͘;

chiong chio̍h-thâu poaⁿ-khui,

ūi bān-bîn chhāi tōa-kî chòe kì-hō.

11Siōng Chú soan-pò͘ ê ōe í-keng thoân kàu thiⁿ-piⁿ-hái-kak;

tio̍h tùi Iâ-lō͘-sat-léng ê chū-bîn kóng,

“Khòaⁿ leh, lí ê Chín-kiù-chiá teh lâi lah;

kap I chòe-hé--ê, ū I só͘ tháu-pàng ê lâng,

kiâⁿ tī I thâu-chêng--ê, ū I kái-kiù ê chú-bîn.”

12Lâng beh kiò in chòe

“Siōng Chú só͘ kiù-sio̍k sèng ê chú-bîn”;

Iâ-lō͘-sat-léng beh kiò-chòe “Siū khòaⁿ-kò͘, bô siū khì-sak ê Siâⁿ”.

Í-sài-a-su 62 - 現代台語譯本羅馬字版(TTVR)-闽南语

Learn More About Us