Khé-sī-lio̍k 8

Khé-sī-lio̍k 8 - 現代台語譯本羅馬字版(TTVR)-闽南语

Tē-chhit Ê Hong-ìn kap Kim Hiuⁿ-lô͘

1Iûⁿ-ko khui tē-chhit ê hong-ìn ê sî, thiⁿ chēng-chēng iok pòaⁿ tiám-cheng kú.

2Āu-lâi góa ū khòaⁿ-kìⁿ chhit ê thiⁿ-sài khiā tī Siōng-tè bīn-chêng, in ū niá-siū chhit ki lat-pah.

3Koh ū chi̍t ê thiⁿ-sài lâi, chhiú the̍h kim hiuⁿ-lô͘ khiā tī chè-tôaⁿ chêng, niá-siū chin chōe hiuⁿ, thang kap chèng sìn-tô͘ ê kî-tó chòe-hé hiàn tī pó-chō chêng ê kim chè-tôaⁿ téng.

4Hiuⁿ ê ian kap sìn-tô͘ ê kî-tó tùi thiⁿ-sài ê chhiú chhèng kàu Siōng-tè bīn-chêng.

5Jiân-āu, thiⁿ-sài the̍h hiuⁿ-lô͘, tóe-móa chè-tôaⁿ téng ê hé, kā i hiat-lo̍h tōe, sûi-sî ū tân-lûi, hiáng-siaⁿ, sih-nà, kap tōe-tāng.

Chhit Ki Lat-pah

6Gia̍h chhit ki lat-pah ê chhit ê thiⁿ-sài chún-pī hó-sè beh pûn.

7Thâu chi̍t ê thiⁿ-sài pûn i ê lat-pah, sûi-sî ū pha̍uh kap hé, chham huih hiat-lo̍h tōe; tōe ê saⁿ-hūn-chi̍t sio--khì, chhiū-ba̍k ê saⁿ-hūn-chi̍t sio--khì, só͘-ū chhiⁿ-chhùi ê chháu lóng sio--khì.

8Tē-jī ê thiⁿ-sài pûn i ê lat-pah, sûi-sî ū chhin-chhiūⁿ hé teh sio ê tōa-soaⁿ hiat-lo̍h hái; hái ê saⁿ-hūn-chi̍t pìⁿ-chòe huih;

9hái--ni̍h ê oa̍h-mi̍h saⁿ-hūn-chi̍t sí--khì; chûn-chiah ê saⁿ-hūn-chi̍t sún-hoāi.

10Tē-saⁿ ê thiⁿ-sài pûn i ê lat-pah, sûi-sî ū chi̍t lia̍p tōa lia̍p chhiⁿ tùi thiⁿ-téng lak--lo̍h-lâi, chhin-chhiūⁿ teh to̍h ê hé-pé lak tī saⁿ-hūn-chi̍t ê kang-hô kap só͘-ū ê chúi-chôaⁿ.

11Chit-lia̍p chhiⁿ ê miâ kiò-chòe Khó͘-hiāⁿ. Saⁿ-hūn-chi̍t ê chúi pìⁿ khó͘, chin chōe lâng in-ūi chit-ê chúi sí--khì, in-ūi chúi pìⁿ khó͘.

12Tē-sì ê thiⁿ-sài pûn i ê lat-pah, ji̍t ê saⁿ-hūn-chi̍t, ge̍h ê saⁿ-hūn-chi̍t, chhiⁿ ê saⁿ-hūn-chi̍t lóng siū kong-kek, tì-kàu ji̍t, ge̍h, chhiⁿ ê saⁿ-hūn-chi̍t pìⁿ àm, ji̍t--sî saⁿ-hūn-chi̍t bô kng, mî--sî mā saⁿ-hūn-chi̍t bô kng.

13Āu-lâi góa khòaⁿ, ū thiaⁿ-kìⁿ chi̍t chiah tī khong-tiong teh pe ê eng-chiáu tōa-siaⁿ kiò kóng, “Chhám ah! Chhám ah! Tòa tī tōe-chiūⁿ ê lâng chhám ah! In-ūi kî-tha ê saⁿ ê thiⁿ-sài teh-beh pûn lat-pah lah.”

Khé-sī-lio̍k 8 - 現代台語譯本羅馬字版(TTVR)-闽南语

Learn More About Us