Si-phian 36 - 現代台語譯本羅馬字版(TTVR)-闽南语

Siōng Chú ê po̍k-jîn Tāi-pi̍t ê si, kau hō͘ sèng-ga̍k-tiúⁿ.Lâng ê Chōe-ok kap Siōng-tè ê Kong-gī

1Chōe tī pháiⁿ-lâng ê sim-tóe chhek-tōng;

i gán-tiong m̄ kiaⁿ Siōng-tè.

2Tùi i lâi khòaⁿ, chōe sī i ê khoa-kháu,

ka-kī siūⁿ-kóng Siōng-tè bōe hoat-kiàn, bōe iàm-ò͘ⁿ.

3I kóng ê ōe lóng sī chōe-ok kap kan-chà;

i bô koh-chài ū tì-hūi, mā bô hó ê hêng-ûi.

4I tī bîn-chhn̂g téng iáu-teh kè-bô͘ chōe-ok.

I koat-tēng beh kiâⁿ pháiⁿ-lō͘,

m̄ khì-sak pháiⁿ-tāi.

5Siōng Chú ah, lí ê chû-ài koân kàu tú-thiⁿ;

lí ê sìn-si̍t kàu kiong-chhong.

6Lí ê kong-gī chhin-chhiūⁿ ke̍k-koân ê soaⁿ;

lí ê phòaⁿ-toàn chhin-chhiūⁿ chhim-ian.

Siōng Chú ah, lâng kap cheng-siⁿ lí lóng koàn-kò͘.

7Siōng-tè ah, lí ê chû-ài ná hiah pó-pòe!

Sè-kan-lâng lóng lâi bih tī lí si̍t-kó͘ ê pó-hō͘-ē.

8In beh tī lí ê chhù hióng-siū hong-hù ê iàn-se̍k;

lí beh hō͘ in lim lí khoài-lo̍k ê hô-chúi.

9In-ūi oa̍h-miā ê goân-thâu chāi-tī lí;

tùi lí ê kng, goán khòaⁿ-kìⁿ kng.

10Goān lí kè-sio̍k si-lo̍h chû-ài hō͘ bat lí ê lâng,

si-lo̍h kong-gī hō͘ sim-lāi chèng-ti̍t ê lâng.

11M̄-thang iông-ún kiau-ngō͘ ê lâng ê kha thún-ta̍h góa;

m̄-thang iông-ún hiong-ok ê lâng ê chhiú kóaⁿ-tio̍k góa.

12Lí khòaⁿ, chòe pháiⁿ ê lâng í-keng tó--lo̍h-khì;

in siū chhia-tó, bōe-tàng koh khí--lâi.

Learn More About Us