Bîn-sò͘-kì 2

Bîn-sò͘-kì 2 - 現代台語譯本羅馬字版(TTVR)-闽南语

Ta̍k Chi-cho̍k Chat-iâⁿ ê Ūi-tì

1Siōng Chú koh hoan-hù Mô͘-se kap A-lûn, kóng,

2“Í-sek-lia̍t-lâng lóng tio̍h chiàu ka-kī chi-cho̍k ê tōa-kî kap chong-cho̍k ê kì-hō, tī hōe-bō͘ ê chiu-ûi ǹg hōe-bō͘ chat-iâⁿ.

3“Tang-pêng, ǹg ji̍t chhut ê hong-hiòng, chhāi Iû-tāi chi-cho̍k ê tōa-kî, Iû-tāi ê kun-tūi tī hia chat-iâⁿ; A-bí-ná-ta̍t ê kiáⁿ Ná-sūn chòe siú-léng,

4jîn-sò͘ chhit-bān sì-chheng la̍k-pah miâ.

5Tī in piⁿ--á chat-iâⁿ--ê sī Í-sat-ka chi-cho̍k, So͘-ap ê kiáⁿ Ná-thán-gia̍p chòe siú-léng,

6jîn-sò͘ gō͘-bān sì-chheng sì-pah miâ.

7Koh-lâi sī Se-pò͘-lûn chi-cho̍k, Hi-lûn ê kiáⁿ Í-lī-ap chòe siú-léng,

8jîn-sò͘ gō͘-bān chhit-chheng sì-pah miâ.

9Sio̍k Iû-tāi khu ê jîn-sò͘ chóng-kiōng cha̍p-poeh-bān la̍k-chheng sì-pah miâ. In choh-thâu chhut-hoat.

10“Lâm-pêng, chhāi Lū-piān chi-cho̍k ê tōa-kî, Lū-piān ê kun-tūi tī hia chat-iâⁿ, Sī-tiu-ní ê kiáⁿ Í-lī-siok chòe siú-léng,

11jîn-sò͘ kiōng sì-bān la̍k-chheng gō͘-pah miâ.

12Tī in piⁿ--á chat-iâⁿ--ê sī Se-biān chi-cho̍k, So͘-lī-sa-tāi ê kiáⁿ Sī-lō͘-bi̍t chòe siú-léng,

13jîn-sò͘ kiōng gō͘-bān káu-chheng saⁿ-pah miâ.

14Koh-lâi sī Ka-tek chi-cho̍k, Tiu-ní ê kiáⁿ Í-lī-ngá-sat chòe siú-léng,

15jîn-sò͘ kiōng sì-bān gō͘-chheng la̍k-pah gō͘-cha̍p miâ.

16Sio̍k Lū-piān khu ê jîn-sò͘ chóng-kiōng cha̍p-gō͘-bān chi̍t-chheng sì-pah gō͘-cha̍p miâ. In chòe tē-jī tōa-tūi chhut-hoat.

17“Hōe-bō͘ kap Lī-bī-lâng tio̍h tī chêng nn̄g tōa-tūi kap āu nn̄g tōa-tūi ê tiong-kan. In án-chóaⁿ chat-iâⁿ, chiū chiàu hit-ê chhù-sū khí-sin; ta̍k chi-cho̍k tio̍h tè in ka-kī chi-cho̍k ê tōa-kî chiân-chìn.

18“Sai-pêng, chhāi Í-hoat-liân chi-cho̍k ê tōa-kî, Í-hoat-liân ê kun-tūi tī hia chat-iâⁿ, A-bí-hut ê kiáⁿ Í-lī-sa-má chòe siú-léng,

19jîn-sò͘ kiōng sì-bān khòng gō͘-pah miâ.

20Tī in piⁿ--á-ê sī Má-ná-se chi-cho̍k, Pí-tāi-siok ê kiáⁿ Ka-má-lia̍t chòe siú-léng,

21jîn-sò͘ kiōng saⁿ-bān nn̄g-chheng nn̄g-pah miâ.

22Koh-lâi sī Piān-ngá-bín chi-cho̍k, Ki-to-nî ê kiáⁿ A-pí-tān chòe siú-léng,

23jîn-sò͘ kiōng saⁿ-bān gō͘-chheng sì-pah miâ.

24Sio̍k Í-hoat-liân khu, jîn-sò͘ chóng-kiōng cha̍p-bān poeh-chheng chi̍t-pah miâ. In chòe tē-saⁿ tōa-tūi chhut-hoat.

25“Pak-pêng, chhāi Tān chi-cho̍k ê tōa-kî, Tān ê kun-tūi tī hia chat-iâⁿ, A-bí-sa-tāi ê kiáⁿ A-hi-í-siā chòe siú-léng,

26jîn-sò͘ kiōng la̍k-bān nn̄g-chheng chhit-pah miâ.

27Tī in piⁿ--á-ê sī A-siat chi-cho̍k, Gô-lân ê kiáⁿ Phà-kiat chòe siú-léng,

28jîn-sò͘ kiōng sì-bān chi̍t-chheng gō͘-pah miâ.

29Koh-lâi sī Ná-hut-tha-lī chi-cho̍k, Í-lâm ê kiáⁿ A-hi-la chòe siú-léng,

30jîn-sò͘ kiōng gō͘-bān saⁿ-chheng sì-pah miâ.

31Sio̍k Tān hit-khu, jîn-sò͘ chóng-kiōng cha̍p-gō͘-bān chhit-chheng la̍k-pah miâ. Chit tōa-tūi tio̍h tè in ê tōa-kî chòe-āu chhut-hoat.”

32Í-siōng sī Í-sek-lia̍t-lâng chiàu in ê chong-cho̍k, tī iâⁿ-lāi chiàu in ê pō͘-tūi thóng-kè ê jîn-sò͘, chóng-kiōng la̍k-cha̍p-bān saⁿ-chheng gō͘-pah gō͘-cha̍p miâ.

33M̄-kú Lī-bī-lâng bô sǹg chāi-lāi, sī chiàu Siōng Chú tùi Mô͘-se ê bēng-lēng.

34 Í-sek-lia̍t-lâng chiàu in ê chong-cho̍k, ka-cho̍k, tè in ta̍k chi-cho̍k ê tōa-kî chat-iâⁿ, chhut-hoat, lóng chiàu Siōng Chú tùi Mô͘-se ê bēng-lēng.

Bîn-sò͘-kì 2 - 現代台語譯本羅馬字版(TTVR)-闽南语

Learn More About Us