Chim-giân 30

Chim-giân 30 - 現代台語譯本羅馬字版(TTVR)-闽南语

1Ē-bīn sī Ngá-ki ê kiáⁿ A-kó͘-ní kà-sī ê ōe, i tùi Í-thiat kap O͘-kah án-ni kóng,

2“Góa sī chèng-lâng tiong siōng gû-gōng--ê,

liân it-poaⁿ-lâng ê tì-sek to bô.

3Góa bô o̍h-tio̍h tì-hūi,

mā bô Chì-sèng ê Siōng-tè ê tì-sek.

4Siáⁿ-lâng bat chiūⁿ-thiⁿ koh lo̍h--lâi?

Siáⁿ-lâng bat ēng chhiú la̍k-tio̍h hong?

Siáⁿ-lâng bat ēng saⁿ pau chúi?

Siáⁿ-lâng bat kài-tēng tōe ê ke̍k-thâu?

I ê miâ kiò sím-mi̍h, I kiáⁿ ê miâ kiò sím-mi̍h, lí chai--bô?

5Siōng-tè ê ōe ta̍k-kù lóng keng-kè thoàn-liān;

só͘-ū óa-khò I ê lâng, I chòe in ê tún-pâi.

6I ê ōe, lí m̄-thang ke-thiⁿ,

chiah bián siū chek-pī, phòaⁿ-chòe kóng pe̍h-chha̍t.

7“Góa tùi lí kiû nn̄g hāng tāi-chì;

tī góa sí í-chêng m̄-thang bô hō͘ góa.

8Kiû lí hō͘ hu-ké kap pe̍h-chha̍t lī-khui góa hn̄g-hn̄g;

kiû lí hō͘ góa bô sàn-chhiah mā bô hó-gia̍h,

sù góa su-iàu ê bí-niû,

9chiah bián góa pá-chiok m̄ jīn lí, kóng Siōng Chú sī siáⁿ-lâng;

chiah bián góa sàn-chhiah soah thau-the̍h,

tì-kàu siat-to̍k góa ê Siōng-tè ê miâ.

10“M̄-thang tùi chú-lâng kóng i lô͘-po̍k ê pháiⁿ-ōe,

chiah bián i kā lí chiù-chó͘, lí soah siū chek-hoa̍t.

11“Ū chi̍t-kóa lâng chiù-chó͘ in ê lāu-pē,

mā bô kā lāu-bú chiok-hok.

12Ū chi̍t-kóa lâng khòaⁿ ka-kī chòe chheng-khì,

m̄-kú bô sóe-tû ka-kī ê ù-òe.

13Ū chi̍t-kóa lâng ba̍k-thâu-koân,

ba̍k-sîn kiau-ngō͘.

14Ū chi̍t-kóa lâng ê gê chhin-chhiūⁿ kiàm, khí chhin-chhiūⁿ to,

beh thun-chia̍h tōe-chiūⁿ ê khùn-khó͘-lâng kap sè-kan ê sàn-chhiah-lâng.

15“Gô͘-khî ū nn̄g ê cha-bó͘-kiáⁿ put-sî hoah kóng, ‘Hō͘ góa, hō͘ góa.’

Bōe ti-chiok--ê ū saⁿ hāng,

liân bōe kóng ‘Kàu-gia̍h lah’ ū sì hāng:

16Im-hú, bōe hoâi-īn ê thai,

khah chōe chúi mā bô-kàu ê tōe, kap bōe kóng ‘Kàu-gia̍h’ ê hé.

17Thí-chhiò lāu-pē,

biáu-sī, m̄ thiaⁿ-thàn lāu-bú,

chit-khoán lâng ê ba̍k-chiu ōe hō͘ soaⁿ-kok tiong ê o͘-a tok--khì,

ōe hō͘ eng-chiáu ê kiáⁿ chia̍h--khì.

18“Góa siūⁿ bōe chhut ê kî-biāu ū saⁿ hāng,

liân góa m̄ bat--ê ū sì hāng:

19Eng-chiáu tī khong-tiong ê lō͘,

chôa tī chio̍h-pôaⁿ téng ê lō͘,

chûn tī hái-tiong ê lō͘,

lâm lú kau-ha̍p ê lō͘.

20Îm-hū ê lō͘ mā oh liáu-kái:

I chia̍h-liáu chiū chhit-chhùi,

kóng ‘Góa bô chòe pháiⁿ’.

21“Hō͘ tāi-tōe iô-tāng--ê ū saⁿ hāng,

liân tam-tng bōe khí--ê ū sì hāng:

22Lô͘-po̍k chòe ông,

gōng-lâng tiùⁿ kàu pá,

23bô lâng-iân ê lú-chú chhut-kè,

lú-pī chhú-tāi lú-chú-lâng.

24“Tōe-chiūⁿ ū sì hāng bî-sòe ê tōng-bu̍t,

m̄-kú ke̍k ū tì-sek:

25Káu-hiā sui-jiân jio̍k-siáu,

m̄-kú ōe-hiáu tī joa̍h-thiⁿ chún-pī chia̍h-mi̍h;

26chio̍h-hoan sui-jiân bô ióng-chòng,

m̄-kú ōe-hiáu tī chio̍h-phāng choh-siū;

27chháu-meh sui-jiân bô ông,

m̄-kú ōe-hiáu cho͘-tūi chhut--khì;

28siān-lâng-á sui-jiân lâng ēng chhiú lia̍h ōe tio̍h,

m̄-kú tiàm tī ông-kiong.

29“Kiâⁿ-lō͘ ui-hong--ê ū saⁿ hāng,

liân kha-pō͘ ui-hong--ê ū sì hāng:

30Sai, iá-siù tiong tē-it béng--ê,

tú-tio̍h sím-mi̍h to bōe siám-pī;

31la̍h-káu, soaⁿ-iûⁿ-káng,

í-ki̍p ū kun-peng pó-hō͘ ê kun-ông.

32“Lí nā chū-ko chū-tāi khám-khám-á chòe, á-sī kè-bô͘ pháiⁿ-tāi,

tio̍h ēng chhiú ng chhùi.

33Ká gû-lin ōe chhut lin-iû,

phah-tio̍h phīⁿ ōe lâu-huih;

chhin-chhiūⁿ án-ni, tōa siū-khì ōe khí saⁿ-chiⁿ.”

Chim-giân 30 - 現代台語譯本羅馬字版(TTVR)-闽南语

Learn More About Us