Hô-se-a-su 7

Hô-se-a-su 7 - 現代台語譯本羅馬字版(TTVR)-闽南语

1Góa siūⁿ-beh i-hó Í-sek-lia̍t ê sî,

Í-hoat-liân ê chōe-kò lō͘-hiān,

Sat-má-lī-a ê chōe-ok po̍k-lō͘,

in-ūi in chòe tāi-chì hu-ké,

chhim-ji̍p chhù-lāi thau-the̍h,

tī gōa-bīn kong-jiân chhiúⁿ-kiap.

2In bô siūⁿ-kóng góa ōe-kì-tit in it-chhè ê chōe-ok;

in só͘ hoān ê chōe-ok kā in tîⁿ-tiâu-tiâu,

góa lóng khòaⁿ-hiān-hiān.

Kiong-têng Lōe-loān

3Siōng Chú kóng:

In chòe pháiⁿ, hō͘ kun-ông hoaⁿ-hí;

in khi-phiàn, hō͘ koaⁿ-oân khoài-lo̍k.

4In lóng kiâⁿ îm-loān, chhin-chhiūⁿ iām-jia̍t ê hé-lô͘,

teh thèng-hāu mī-oân hoat--khí-lâi,

hang-piáⁿ ê lâng m̄-bián koh lā hé hō͘ iām.

5Tī lán ê ông hí-khèng ê ji̍t,

koaⁿ-oân lim lia̍t-chiú, chùi kah m̄-chai-lâng,

ông kap pōe-poān-chiá ak-chhiú.

6In chō-hoán ê sim chhin-chhiūⁿ hé-lô͘,

kui-mî ûn-ûn-á to̍h, thiⁿ chi̍t-ē kng chiū po̍k-hoat.

7In sim-kông-hé-jia̍t,

kā thóng-tī-chiá chi̍t-ê chi̍t-ê siau-bia̍t;

kun-ông lóng tó--lo̍h-khì,

m̄-kú bô lâng kiû-kiò góa.

8 Í-hoat-liân kap gōa-cho̍k chham-chhap;

in sī bô péng-pêng ê piáⁿ.

9Gōa-cho̍k-lâng kā in ê khùi-la̍t suh ta--khì, in lóng m̄ chai;

in í-keng hoat pe̍h thâu-mn̂g, ka-kī mā m̄ chai.

10 Í-sek-lia̍t ê kiau-ngō͘ chèng-bêng in ka-kī ū-chōe;

sui-jiân tú-tio̍h chiah-ê sū,

in iáu-kú m̄ kui-ǹg Siōng Chú — in ê Siōng-tè,

mā bô chhē-kiû I.

11 Í-hoat-liân chhin-chhiūⁿ hún-chiáu gōng-gōng m̄ bat pòaⁿ-hāng;

in liâm-piⁿ kiû-kiò Ai-ki̍p, liâm-piⁿ khì óa A-su̍t.

12In khì tâu-khò ê sî, góa beh ēng bāng pha tī in téng-bīn,

chhin-chhiūⁿ teh lia̍h khong-tiong ê chiáu, kā in bāng--lo̍h-lâi;

góa beh chiàu in ê pháiⁿ hêng-ûi kā in hêng-hoa̍t.

13In chhám ah, in-ūi in lī-khui góa.

In ōe siū húi-bia̍t, in-ūi in pōe-poān góa.

Góa beh kái-kiù in, m̄-kú in môa-phiàn góa, kū-choa̍t góa.

14In bô sêng-sim tùi góa kî-kiû,

kan-ta tī bîn-chhn̂g téng ai-ai-kiò;

in chū-chi̍p kèng-pài, kî-kiû ngó͘-kok kap sin-chiú,

kî-si̍t sī teh pōe-poān góa.

15Góa thoàn-liān in, hō͘ in chhiú-kut ū-la̍t;

in kèng-jiân tô͘-bô͘ pháiⁿ-tāi hoán-khòng góa.

16In it-ti̍t khì pài pa̍t-ê sîn-bêng, m̄ kui-ǹg Chì-koân-chiá;

in chhin-chhiūⁿ lēng--khì ê keng bô lō͘-ēng;

in ê siú-léng kóng-ōe kiau-ngō͘ bú-bān, ōe sí tī to-ē;

chit-ê sū ōe chiâⁿ-chòe Ai-ki̍p-lâng ê chhiò-pìⁿ.

Hô-se-a-su 7 - 現代台語譯本羅馬字版(TTVR)-闽南语

Learn More About Us