Chim-giân 14

Chim-giân 14 - 現代台語譯本羅馬字版(TTVR)-闽南语

1Tì-hūi ê hū-jîn-lâng kiàn-li̍p ka-kī ê ka-têng;

gû-gōng ê hū-jîn-lâng chhin-chhiú thiah-húi.

2Chòe sū chèng-ti̍t ê lâng kèng-ùi Siōng Chú;

chòe tāi-chì oai-chhoa̍h ê lâng biáu-sī I.

3Gōng-lâng kóng-ōe ka-kī siū chek-hoa̍t;

tì-hūi ê lâng ê ōe pó-hō͘ ka-kī.

4Bô gû keng-choh chiū bô ngó͘-kok;

gû ū-la̍t thó͘-sán chiū jú chōe.

5Sêng-si̍t ê chèng-jîn bōe kóng pe̍h-chha̍t;

hu-ké ê chèng-jîn móa-chhùi hô͘-soat.

6Chū-ko chū-tāi ê lâng chhē tì-hūi, chhē bōe tio̍h;

chhong-bêng ê lâng chin kín tit-tio̍h tì-sek.

7Tio̍h lī-khui gōng-lâng,

in-ūi tùi i kóng ê ōe chhē bōe tio̍h tì-sek.

8Thong-ta̍t ê lâng ê tì-hūi hō͘ i liáu-kái tio̍h kiâⁿ ê lō͘;

gōng-lâng ê gōng tì-kàu kiâⁿ bê-lō͘.

9Gōng-lâng khòaⁿ hoān-chōe chòe kún-chhiò;

chèng-ti̍t ê lâng hun-hióng Siōng-tè ê un-hūi.

10Lâng ê kan-khó͘, chí-ū ka-kī ê sim chai;

i ê hoaⁿ-hí, gōa-lâng bōe-tàng hun-hióng.

11Pháiⁿ-lâng ê chhù ōe tó-hoāi;

chèng-ti̍t-lâng ê pò͘-pîⁿ ōe heng-ōng.

12Ū chi̍t tiâu lō͘ khòaⁿ--khí-lâi chiàⁿ koh ti̍t,

kàu-bé thàng kàu sí-bông.

13Lâng teh chhiò ê sî sim iáu ū iu-būn;

khoài-lo̍k ê kiat-kio̍k ōe pìⁿ-chòe pi-siong.

14Pháiⁿ-lâng it-tēng siū pò-èng;

hó-lâng it-tēng tit pò-siúⁿ.

15Gōng-ti̍t ê lâng ta̍k-hāng lóng sìn;

thong-ta̍t ê lâng pō͘-pō͘ kín-sīn.

16Tì-hūi ê lâng sū-sū kín-sīn, oán-lī pháiⁿ-tāi;

gōng-lâng kiau-ngō͘ hòng-sù.

17Khoài siū-khì ê lâng chòe tāi-chì gû-gōng;

khúi-chà ê lâng hō͘ lâng oàn-hūn.

18Gōng-ti̍t ê lâng sêng-chiap gû-gōng chòe sán-gia̍p;

thong-ta̍t ê lâng tit-tio̍h tì-sek chòe hoa-koan.

19Pháiⁿ-lâng phak-lo̍h tī hó-lâng ê bīn-chêng;

chōe-jîn phak-lo̍h tī gī-lâng ê mn̂g-kháu.

20Sàn-chhiah-lâng liân chhù-piⁿ to iàm-chiān;

hó-gia̍h-lâng pêng-iú chin chōe.

21Khòaⁿ-khin chhù-piⁿ ê lâng ū chōe;

lîn-bín sàn-chhiah ê lâng ū hok-khì.

22Kè-bô͘ pháiⁿ-tāi ōe kiâⁿ-ji̍p bê-lō͘;

kè-bô͘ hó-sū ōe tit-tio̍h lâng ê chin-sêng lîn-bín.

23Ta̍k-khoán ê phah-piàⁿ lóng ū lī-ek;

khong-tâm ōe tì-kàu sàn-chhiah.

24Tì-hūi ê lâng ê châi-hù sī in ê hoa-koan;

gōng-lâng ê gōng kàu-bé mā-sī gōng.

25Kóng si̍t-ōe choh-chèng kiù lâng ê sìⁿ-miā;

choh gūi-chèng sī ēng khúi-chà hāi lâng.

26Kèng-ùi Siōng Chú ū kian-kò͘ ê óa-khò;

i ê kiáⁿ-jî ū tô-siám ê só͘-chāi.

27Kèng-ùi Siōng Chú sī oa̍h-miā ê chúi-chôaⁿ,

hō͘ lâng bián hām-lo̍h sí-bông ê lô-bāng.

28Peh-sìⁿ chōe, kok-ông ū êng-kng;

jîn-bîn chió, jîn-kun chiū soe-pāi.

29Bōe khoài siū-khì sī tōa chhong-bêng;

bô nāi-sim--ê hián-chhut gû-gōng.

30Sim pêng-chēng hō͘ sin-thé kiān-khong;

oàn-tò͘ hō͘ kut-thâu hiú-nōa.

31Ap-pek sàn-chhiah-lâng sī siat-to̍k chhòng-chō in ê Chú;

hó khoán-thāi bô-chîⁿ-lâng sī chun-kèng Chú.

32Pháiⁿ-lâng ōe in-ūi só͘ chòe ê pháiⁿ bia̍t-bông;

gī-lâng kàu sí iáu ū óa-khò.

33Tì-hūi ài tiàm tī chhong-bêng-lâng ê sim-lāi;

gōng-lâng ê sim-lāi chhē bô tì-hūi.

34Kong-gī hō͘ kok-ka kiông-sēng;

chōe-ok hō͘ jîn-bîn siū lêng-jio̍k.

35Ông ì-ài ēng tì-hūi pān tāi-chì ê koaⁿ-oân,

chek-hoa̍t sit-chit ê jîn-sîn.

Chim-giân 14 - 現代台語譯本羅馬字版(TTVR)-闽南语

Learn More About Us