Si-phian 103

Si-phian 103 - 現代台語譯本羅馬字版(TTVR)-闽南语

Tāi-pi̍t ê si.Siōng-tè ê Chû-ài

1Góa ê sim-sîn ah, tio̍h chheng-chàn Siōng Chú!

Tio̍h ēng choân-pō͘ ê sim-sîn o-ló I ê sèng-miâ!

2Góa ê sim-sîn ah, tio̍h chheng-chàn Siōng Chú!

M̄-thang bōe-kì-tit I it-chhè ê un-hūi.

3I sià-bián lí lóng-chóng ê chōe,

i-hó lí it-chhè ê pīⁿ.

4I kiù lí thoat-lī sí-bông ê hām-khiⁿ,

ēng chû-pi kap jîn-ài chòe hoa-koan sù hō͘ lí.

5I ēng ta̍k-khoán hó-mi̍h hō͘ lí chi̍t-sì-lâng boán-chiok,

hō͘ lí hôe-ho̍k siàu-liân chhin-chhiūⁿ eng-chiáu hiah-ni̍h ióng-chòng.

6Siōng Chú chip-hêng kong-gī;

I ūi-tio̍h it-chhè siū ap-chè ê lâng sin-oan.

7I ēng I ê tō-lō͘ chí-sī Mô͘-se,

ēng I ê chok-ûi chí-sī Í-sek-lia̍t-lâng.

8Siōng Chú ū chû-pi, ū jîn-ài,

bōe khoài siū-khì, ū hong-sēng ê chû-ài.

9I bōe kú-tn̂g chek-pī,

bōe éng-oán khǹg siū-khì.

10I bōe chiàu lán ê chōe-kò chek-hoa̍t lán,

mā bōe chiàu lán ê chōe-gia̍t pò-èng lán.

11Thiⁿ lī-khui tōe ū jōa koân,

I ê chû-ài tùi kèng-ùi I ê lâng mā hiah-ni̍h tōa.

12Tang lī-khui sai ū jōa hn̄g,

I hō͘ lán ê chōe-kò lī-khui lán mā hiah-ni̍h hn̄g.

13Lāu-pē án-chóaⁿ thiàⁿ-sioh ka-kī ê kiáⁿ-jî,

Siōng Chú mā ōe án-ni thiàⁿ-sioh kèng-ùi I ê lâng.

14In-ūi I chai-iáⁿ lán siū-chō ê pún-chit;

I ōe-kì-tit lán put-kò sī thô͘-hún.

15Lâng leh, in ê sìⁿ-miā chhin-chhiūⁿ chháu;

in chhin-chhiūⁿ iá-hoe seng-tióng bō͘-sēng,

16hong chi̍t-ē chhe chiū siau-sit;

bô lâng ōe koh khòaⁿ--tio̍h.

17M̄-kú Siōng Chú éng-oán thiàⁿ-sioh kèng-ùi I ê lâng;

I ēng kong-gī tùi-thāi in ê kiáⁿ-kiáⁿ-sun-sun,

18chiū-sī hiah-ê chun-siú I ê iok,

tiong-si̍t chun-hêng I lu̍t-lē ê lâng.

19Siōng Chú tī thiⁿ-téng siat-li̍p pó-chō;

I ê chú-koân phó͘-ki̍p bān-iú.

20Ū tōa koân-lêng ê thiⁿ-sài,

thiaⁿ-thàn Siōng-tè ê ōe, chip-hêng I bēng-lēng ê sù-chiá ah,

lín lóng tio̍h chheng-chàn Siōng Chú!

21Só͘-ū ê thian-kun, chip-hêng I chí-ì ê chhe-sài ah,

lín lóng tio̍h chheng-chàn Siōng Chú!

22Tī I chiáng-koân ta̍k só͘-chāi só͘-ū ê pī-chō-bu̍t ah,

lín lóng tio̍h chheng-chàn Siōng Chú!

Góa ê sim-sîn ah, tio̍h chheng-chàn Siōng Chú!

Si-phian 103 - 現代台語譯本羅馬字版(TTVR)-闽南语

Learn More About Us