Si-phian 88

Si-phian 88 - 現代台語譯本羅馬字版(TTVR)-闽南语

Khó-la hō͘-tāi ê si-koa, chiū-sī Í-su-la-lâng Hi-bān kà-sī ê si, kau hō͘ sèng-ga̍k-tiúⁿ; tiāu, ēng “Mâ-hap-la Lī-àm-ngô͘”.Kî-kiû Pang-chān

1Siōng Chú, chín-kiù góa ê Siōng-tè ah,

góa mî-ji̍t tī lí ê bīn-chêng kiû-kiò.

2Goān góa ê kî-tó ta̍t-kàu lí bīn-chêng;

kiû lí àⁿ hī-khang thiaⁿ góa ê kî-kiû.

3In-ūi góa keng-le̍k chin chōe hoān-lān;

góa ê sìⁿ-miā biān-lîm sí-bông.

4Góa kap beh lo̍h Im-hú ê lâng siâng-khoán,

lóng bô khùi-la̍t, bô lâng pang-chān.

5Góa hō͘ lâng tàn tī sí-lâng tiong-kan,

chhin-chhiūⁿ siū thâi ê lâng tó tī bōng-lāi,

bô koh hō͘ lí kì--teh,

bô koh tit-tio̍h lí ê pang-chān.

6Lí kā góa hiat tī Chhim-khiⁿ,

tī o͘-àm ê Chhim-ian.

7Lí ê siū-khì tāng-tāng teh góa;

lí ēng hái-éng tùi sì-bīn im-ba̍t góa.

8Lí hō͘ góa ê ti-kí lī-khui góa hn̄g-hn̄g,

hō͘ in iàm-ò͘ⁿ góa.

Góa siū koaiⁿ-kìm, bōe-tit chhut--khì.

9Góa in-ūi iu-siong ba̍k-chiu hoe.

Siōng Chú ah, góa ta̍k-ji̍t kiû-kiò lí;

góa ǹg lí gia̍h-chhiú kî-tó.

10Lí kiám beh kiâⁿ kî-sū hō͘ sí-lâng khòaⁿ?

Im-hûn kiám ōe khí-lâi chheng-chàn lí?

11Lâng kiám ōe tī bōng-lāi kóng-khí lí ê chû-ài?

Lâng kiám ōe tī bia̍t-bông ê só͘-chāi kóng-khí lí ê sìn-si̍t?

12Tī o͘-àm ê só͘-chāi, lí ê kî-sū kiám ū lâng khòaⁿ ōe tio̍h?

Tī bô kì-e̍k ê só͘-chāi, lí ê kong-gī kiám ū lâng ōe chai?

13Siōng Chú ah, góa ū tùi lí kî-kiû;

chá-khí-sî góa ê kî-tó ōe thàu kàu lí ê bīn-chêng.

14Siōng Chú ah, lí sī-án-chóaⁿ khì-sak góa?

Sī-án-chóaⁿ bīn oa̍t-cháu m̄ khòaⁿ góa?

15Góa tùi siàu-liân siū-khó͘, hiám-hiám sí;

góa siū-tio̍h lí ê chek-hoa̍t tì-kàu sim hun-loān.

16Lí ê tōa siū-khì kā góa teh-chhùi;

lí ēng kiaⁿ-hiâⁿ kā góa húi-bia̍t.

17Chiah-ê tāi-chì chhin-chhiūⁿ tōa-chúi kui-ji̍t ûi góa,

tùi sì-bīn ûi-khùn góa.

18Lí chiong góa ê chhin-iú keh-khui hn̄g-hn̄g;

o͘-àm soah pìⁿ-chòe góa î-it ê tâng-phōaⁿ.

Si-phian 88 - 現代台語譯本羅馬字版(TTVR)-闽南语

Learn More About Us