Si-phian 53 - 現代台語譯本羅馬字版(TTVR)-闽南语

Tāi-pi̍t kà-sī ê si, kau hō͘ sèng-ga̍k-tiúⁿ; tiāu, ēng “Mâ-hap-la”.Lâng ê Siâ-ok(Si 14)

1Gōng-lâng sim-lāi kóng, “Bô Siōng-tè.”

In lóng hú-pāi, chòe khó-ò͘ⁿ ê tāi-chì,

bô kah chi̍t ê chòe hó.

2Siōng-tè tùi thiⁿ àⁿ lo̍h-lâi khòaⁿ sè-kan-lâng,

beh khòaⁿ ū bêng-lí, ū chhē-kiû Siōng-tè ê lâng á bô.

3In ta̍k-ê lâng lóng kiâⁿ bê-lō͘, pîⁿ-pîⁿ pìⁿ-chòe ù-òe;

bô lâng chòe hó, liân chi̍t ê to bô.

4Chòe pháiⁿ ê lâng kiám lóng m̄ chai?

In thun-chia̍h góa ê chú-bîn chhin-chhiūⁿ teh chia̍h-pn̄g;

in bô kiû-kiò Siōng-tè.

5In tī m̄-bián kiaⁿ-hiâⁿ ê sî tōa kiaⁿ-hiâⁿ;

in-ūi Siōng-tè ū chiong pau-ûi kong-kek lí ê lâng ê kut-thâu iā-sòaⁿ;

in ōe kiàn-siàu sit-pāi, in-ūi Siōng-tè khì-sak in.

6Goān Í-sek-lia̍t ê chín-kiù tùi Sek-an chhut!

Goān Siōng-tè chhōa I siū-lia̍h ê chú-bîn tò-tńg--lâi!

Hit-sî, Í-sek-lia̍t ōe hoaⁿ-hí,

Ngá-kok ōe khoài-lo̍k!

Learn More About Us