Si-phian 86 - 現代台語譯本羅馬字版(TTVR)-闽南语

Tāi-pi̍t ê kî-tó.Kiû Chú Si-un Pó-hō͘

1Siōng Chú ah, kiû lí àⁿ hī-khang thiaⁿ góa, ìn góa,

in-ūi góa khùn-khó͘ sàn-chhiah.

2Kiû lí pó-chûn góa ê sìⁿ-miā, in-ūi góa sìn-khò lí.

Góa ê Siōng-tè ah, lí ê po̍k-jîn óa-khò lí; kiû lí chín-kiù góa.

3Chú ah, kiû lí lîn-bín góa,

in-ūi góa kui-ji̍t kiû-kiò lí.

4Chú ah, kiû lí hō͘ lí ê po̍k-jîn sim-sîn hoaⁿ-hí,

in-ūi góa gióng-bōng lí, tùi lí kî-tó.

5Chú ah, lí liông-siān, hoaⁿ-hí sià-bián;

lí sù hong-sēng ê chû-ài hō͘ só͘-ū kiû-kiò lí ê lâng.

6Siōng Chú ah, kiû lí àⁿ hī-khang thiaⁿ góa ê kî-tó,

àⁿ-lo̍h thiaⁿ góa khún-kiû ê siaⁿ.

7Góa tī hoān-lān ê ji̍t kiû-kiò lí,

in-ūi lí ōe ìn góa.

8Chú ah, chiah-ê sîn-bêng bô chi̍t ê ōe-tàng kap lí saⁿ-pí;

in ê só͘-chòe mā bōe-tàng kap lí pí.

9Chú ah, lí só͘ chō ê bān-bîn lóng ōe lâi kàu lí ê bīn-chêng phak-pài;

in ōe êng-iāu lí ê miâ.

10In-ūi lí úi-tāi, chòe kî-biāu ê sū;

chí-ū lí sī Siōng-tè.

11Siōng Chú ah, kiû lí chiong lí ê tō-lō͘ chí-sī góa,

góa beh chiàu lí ê chin-lí lâi kiâⁿ;

kiû lí hō͘ góa ēng choan-it ê sim kèng-ùi lí ê miâ.

12Chú — góa ê Siōng-tè ah, góa beh choân-sim chheng-chàn lí;

góa beh éng-oán êng-iāu lí ê miâ.

13Lí si-lo̍h hō͘ góa ê chû-ài hiah-ni̍h tōa,

ū kiù góa ê sìⁿ-miā bián lo̍h Im-hú siōng-chhim ê só͘-chāi.

14Siōng-tè ah, kiau-ngō͘ ê lâng khí-lâi kong-kek góa;

kui-tīn kiông-pō ê lâng siàu-siūⁿ góa ê sìⁿ-miā;

in bô chiong lí khǹg tī gán-tiong.

15Chú ah, lí sī jîn-chû un-tián ê Siōng-tè,

bô khoài siū-khì, koh ū hong-sēng ê chû-ài kap sìn-si̍t.

16Kiû lí oa̍t kè-lâi khòaⁿ góa, khó-lîn góa,

chiong lí ê khùi-la̍t sù hō͘ lí ê po̍k-jîn,

kiù lí lú-pī ê kiáⁿ.

17Kiû lí hián-sī un-thāi góa ê chèng-kù,

hō͘ oàn-hūn góa ê lâng khòaⁿ--tio̍h lâi kiàn-siàu,

in-ūi Siōng Chú lí ū pang-chān góa, an-ùi góa.

Learn More About Us