Iok-su-a-kì 11

Iok-su-a-kì 11 - 現代台語譯本羅馬字版(TTVR)-闽南语

Phah-pāi Pak-pêng ê Liân-kun

1 Hā-só-ông Iâ-pin thiaⁿ-tio̍h chit-ê tāi-chì, chiū phài lâng khì kìⁿ Má-tùn-ông Iok-pa, Sin-lûn-ông, kap Ap-soah-ông;

2koh kàu pak-pêng ê soaⁿ-khu, Ka-lī-lī-ô͘ lâm-pêng ê A-la-pa Soaⁿ-kok, soaⁿ-po͘, kap sai-pêng To-ní ê soaⁿ-tōe, kìⁿ hiah-ê ông.

3I koh khì kìⁿ Iok-tàn-hô tang-pêng kap sai-pêng ê Ka-lâm-lâng, í-ki̍p tòa tī soaⁿ-khu ê A-mô͘-lī-lâng, Hek-lâng, Pí-lī-sé-lâng, kap Iâ-pò͘-su-lâng, í-ki̍p Hek-bûn soaⁿ-kha Bí-su-pa-tōe ê Hi-bī-lâng.

4Chiah-ê ông kap in ê kun-peng lóng chhut--lâi, lâng-gia̍h chōe kah chhin-chhiūⁿ hái-piⁿ ê soa; koh ū chin chōe chiàn-bé kap chiàn-chhia.

5In lóng lâi Bí-lûn khoe-piⁿ chū-chi̍p, chòe-hé chat-iâⁿ, beh kap Í-sek-lia̍t-lâng kau-chiàn.

6Siōng Chú kā Iok-su-a kóng, “M̄-bián kiaⁿ in. Bîn-á-chài chha-put-to chit-ê sî, góa beh chiong in lóng kau hō͘ Í-sek-lia̍t-lâng, kā in thâi-sí. Lí tio̍h chām-tn̄g in ê bé ê kha-kun, ēng hé sio in ê chiàn-chhia.”

7Iok-su-a kap lóng-chóng ê chiàn-sū lâi kàu Bí-lûn khoe-piⁿ, kā in tu̍t-kek.

8Siōng Chú chiong in kau tī Í-sek-lia̍t-lâng ê chhiú. Í-sek-lia̍t-lâng kong-kek in, kā in jip kàu Se-tùn tōa-siâⁿ, kàu Bí-su-lī-hut Má-im, ti̍t-kàu tang-pêng ê Bí-su-pa pêng-goân, thâi-sí in, liân chi̍t ê to bô lâu--teh.

9Iok-su-a chiū chiàu Siōng Chú ê bēng-lēng tùi-thāi in, chām-tn̄g in ê bé ê kha-kun, ēng hé sio in ê chiàn-chhia.

10Āu-lâi, Iok-su-a oa̍t tńg-lâi kong-chhú Hā-só, ēng to thâi-sí Hā-só ê ông; kè-khì, Hā-só sī chiah-ê kok ê thâu.

11Í-sek-lia̍t-lâng ēng to thâi-sí hit siâⁿ-lāi ê chū-bîn, thiat-tóe kā in châu-bia̍t; só͘-ū ōe chhoán-khùi--ê bô lâu chi̍t ê oa̍h--teh, koh pàng-hé sio Hā-só.

12 Iok-su-a cheng-ho̍k só͘-ū ê siâⁿ, lia̍h in ê ông, ēng to thâi-sí in, thiat-tóe kā in châu-bia̍t, sī chiàu Siōng Chú ê po̍k-jîn Mô͘-se só͘ bēng-lēng--ê.

13Hiah-ê khí tī soaⁿ-lûn-á téng ê siâⁿ, Hā-só í-gōa, Í-sek-lia̍t-lâng bô kā in pàng-hé sio; chí-ū Hā-só hō͘ Iok-su-a sio--khì.

14Í-sek-lia̍t-lâng tùi hiah-ê siâⁿ chhiúⁿ ê mi̍h kap cheng-siⁿ, lóng chhú chòe ka-kī ê; m̄-kú in ēng to thâi-sí só͘-ū ê lâng, ōe chhoán-khùi--ê liân chi̍t ê to bô lâu--teh.

15Siōng Chú án-chóaⁿ bēng-lēng I ê po̍k-jîn Mô͘-se, Mô͘-se chiàu án-ni bēng-lēng Iok-su-a, Iok-su-a chiū chiàu án-ni chòe; Siōng Chú bēng-lēng Mô͘-se--ê, Iok-su-a bô chi̍t hāng bô chiàu án-ni chòe.

Iok-su-a Chiàm-léng ê Thó͘-tōe

16Án-ni, Iok-su-a chiàm-léng hit-ê tōe-khu, pau-koat soaⁿ-khu, lâm-pêng choân-tōe, Ko-san choân-tōe kap soaⁿ-po͘, A-la-pa Soaⁿ-kok, Í-sek-lia̍t ê soaⁿ-tōe kap pêng-goân;

17tùi Se-ní ê Hap-la-soaⁿ, chiūⁿ kàu Hek-bûn soaⁿ-kha Lê-pa-lūn Soaⁿ-kok ê Pa-le̍k Ka-tek, koh lia̍h hit tōe-khu só͘-ū ê ông, kā in thâi-sí.

18Iok-su-a kap chiah-ê ông kau-chiàn chin kú;

19Ki-piàn ê Hi-bī-lâng í-gōa, bô chi̍t ê siâⁿ kap Í-sek-lia̍t-lâng tēng hô-pêng tiâu-iok, só͘-í Í-sek-lia̍t-lâng ēng bú-le̍k chiàm-léng chiah-ê tōe.

20In-ūi Siōng Chú hō͘ hiah-ê siâⁿ ê lâng sim ngī, kap Í-sek-lia̍t-lâng kau-chiàn, hō͘ in siū châu-bia̍t, bô siū lîn-bín; chiàu Siōng Chú bēng-lēng Mô͘-se ê ōe, in lóng oân-choân siū siau-bia̍t.

21Āu-lâi, Iok-su-a siau-bia̍t tòa tī Hi-pek-lûn, Tí-phek, kap A-ná-pek soaⁿ-khu, í-ki̍p Iû-tāi kap Í-sek-lia̍t soaⁿ-khu ê A-la̍p-lâng; Iok-su-a chiong in kap in ê siâⁿ lóng húi-bia̍t.

22Tī Í-sek-lia̍t-lâng khiā-khí ê só͘-chāi, A-la̍p-cho̍k ê lâng, liân chi̍t ê to bô lâu--teh, m̄-kú tī Ka-sat, Ka-te̍k, kap A-si̍t-tu̍t iáu ū chhun chi̍t-kóa.

23Án-ni, Iok-su-a cheng-ho̍k hit-ê choân-tōe, tú chiàu Siōng Chú èng-ún Mô͘-se ê ōe; koh chiong hit-ê tōe pun hō͘ Í-sek-lia̍t ta̍k chi-cho̍k, ta̍k chong-cho̍k chòe ke-gia̍p. Tùi án-ni, choân-kéng thài-pêng, bô koh ū chiàn-cheng.

Iok-su-a-kì 11 - 現代台語譯本羅馬字版(TTVR)-闽南语

Learn More About Us