Chim-giân 4

Chim-giân 4 - 現代台語譯本羅馬字版(TTVR)-闽南语

Tì-hūi ê Hó-chhù

1Góa ê kiáⁿ-jî ah, tio̍h thiaⁿ lāu-pē ê kà-sī;

tio̍h choan-sim ha̍k-si̍p chiah ōe bêng-pe̍k.

2In-ūi góa ēng hó ê tō-lí hō͘ lín;

m̄-thang pàng-sak góa ê kàu-tō.

3Góa mā bat chòe goán lāu-pē ê sòe-kiáⁿ,

sī goán lāu-bú siōng-thiàⁿ ê ko͘-kiáⁿ.

4Lāu-pē ū kà-sī góa, kóng,

“Lí tio̍h kì-tiâu góa ê ōe,

chun-siú góa ê bēng-lēng chiū ōe tit-tio̍h sìⁿ-miā.

5Tio̍h chhē-kiû tì-hūi, chhē-kiû chhong-bêng;

m̄-thang bōe-kì--tit, m̄-thang pàng-sak góa só͘ kóng ê ōe.

6M̄-thang khì-sak tì-hūi, i ōe pó-hō͘ lí;

tio̍h ì-ài tì-hūi, i ōe chiàu-kò͘ lí.

7Tì-hūi siōng tiōng-iàu, tio̍h phah-piàⁿ chhē;

tio̍h hù-chhut lí it-chhè só͘ ū--ê lâi tùi-ōaⁿ chhong-bêng.

8Lí chun-tiōng tì-hūi, i ōe ko-kú lí;

lí thiàⁿ-sioh i, i ōe hō͘ lí chun-êng.

9Tì-hūi ōe ēng hoa-koan tì tī lí ê thâu-khak,

chiong êng-kng ê ông-koan sù hō͘ lí.”

10Góa ê kiáⁿ ah, tio̍h thiaⁿ, tio̍h niá-siū góa ê ōe,

lí chiū ōe tn̂g-hè-siū.

11Góa ū chí-sī lí tì-hūi ê lō͘,

ín-chhōa lí kiâⁿ chèng-ti̍t ê tō-lō͘.

12Lí kiâⁿ ê sî, bōe tú-tio̍h chó͘-gāi;

lí cháu, mā bōe tak--tio̍h poa̍h-tó.

13Tio̍h chhî-siú kà-sī, m̄-thang pàng-sang;

tio̍h kín-sīn kò͘-siú, in-ūi tì-hūi sī lí ê sìⁿ-miā.

14Pháiⁿ-lâng ê lō͘ m̄-thang kiâⁿ;

siâ-ok ê lâng ê lō͘ m̄-thang ji̍p.

15Tio̍h siám-pī, m̄-thang tùi hia kè;

tio̍h oa̍t-cháu, hiòng-chêng kiâⁿ.

16Pháiⁿ-lâng nā bô hāi lâng bōe-khùn--tit,

nā bô hō͘ lâng poa̍h-tó khùn bōe lo̍h-bîn.

17In-ūi in ēng siâ-ok chòe pn̄g chia̍h,

ēng kiông-pō chòe chiú lim.

18Gī-lâng ê lō͘ chhin-chhiūⁿ thàu-chá ê kng,

jú chiò jú kng, chiò kàu tiong-tàu.

19Pháiⁿ-lâng ê lō͘ chhin-chhiūⁿ mî--sî o͘-o͘-àm-àm,

lâng tak--tio̍h poa̍h-tó mā m̄ chai sī-án-chóaⁿ.

20Góa ê kiáⁿ ah, tio̍h chù-ì thiaⁿ góa ê kà-sī,

àⁿ hī-khang thiaⁿ góa kóng ê ōe.

21Tio̍h put-sî chù-ì, m̄-thang hut-lio̍k;

tio̍h kì-tiâu tī sim-lāi.

22Chhē--tio̍h ê lâng tit-tio̍h sìⁿ-miā,

kui seng-khu lóng ióng-kiāⁿ.

23Tio̍h chīn-la̍t pó-siú lí ê sim,

in-ūi sim sī sìⁿ-miā ê kun-goân.

24Lí ê chhùi m̄-thang khi-phiàn;

lí ê chhùi-tûn m̄-thang oai-khiok sī-hui.

25Lí ê ba̍k-chiu tio̍h khòaⁿ-ti̍t-ti̍t;

tio̍h chù-ba̍k khòaⁿ thâu-chêng.

26Lí kiâⁿ ê lō͘ tio̍h siu hō͘ pîⁿ;

lí ê tō-lō͘ chiū lóng pîⁿ-tháⁿ hó-kiâⁿ.

27M̄-thang phian-chó-phian-iū;

tio̍h hō͘ lí ê kha lī-khui siâ-ok.

Chim-giân 4 - 現代台語譯本羅馬字版(TTVR)-闽南语

Learn More About Us