Hi-pek-lâi-su 7

Hi-pek-lâi-su 7 - 現代台語譯本羅馬字版(TTVR)-闽南语

Chè-si Be̍k-ki-sé-tek

1Chit-ūi Be̍k-ki-sé-tek sī Sat-léng-ông, mā-sī Chì-koân Siōng-tè ê chè-si. A-pek-la-hán thâi-sí hiah-ê ông tńg--lâi ê sî, Be̍k-ki-sé-tek ū kā i gêng-chiap koh kā i chiok-hok.

2A-pek-la-hán ū chiong i só͘ tit--tio̍h ê cha̍p-hūn-chi̍t hō͘ i. Tē-it, Be̍k-ki-sé-tek chit-ê miâ ê ì-sù sī “Chèng-gī ê ông”, i koh sī Sat-léng-ông, chiū-sī “Hô-pêng-ông”.

3I bô pē bô bú, bô sè-hē, bô chhut-sì ê ji̍t-chí, mā bô sìⁿ-miā ê kiat-sok. I kap Siōng-tè ê Kiáⁿ kâng-khoán; i kè-sio̍k choh chè-si ti̍t-kàu éng-oán.

4Lín khòaⁿ, chit-ê lâng jōa úi-tāi! Sian-chó͘ A-pek-la-hán to tio̍h chiong chiàn-lī-phín ê cha̍p-hūn-chi̍t hō͘ i.

5Ū tam-tng chè-si-chit ê Lī-bī ê kiáⁿ-sun, sui-jiân kap kî-tha Í-sek-lia̍t jîn-bîn lóng sī A-pek-la-hán ê kiáⁿ-sun, pîⁿ-pîⁿ sī hiaⁿ-tī, iáu-kú hōng bēng-lēng chiàu Lu̍t-hoat tùi jîn-bîn siu cha̍p-hūn-chi̍t.

6Be̍k-ki-sé-tek m̄-sī sio̍k Lī-bī ê sè-hē, m̄-kú i ū tùi A-pek-la-hán chiap-siū cha̍p-hūn-chi̍t, koh kā tit-tio̍h Siōng-tè èng-ún ê A-pek-la-hán chiok-hok.

7Sī-sòe siū sī-tōa chiok-hok sī lí-só͘-tong-jiân.

8Chi̍t hong-bīn, chiah-ê siu cha̍p-hūn-chi̍t--ê lóng sī ōe sí ê lâng; lēng-gōa chi̍t hong-bīn, hit-ūi siu cha̍p-hūn-chi̍t--ê, Sèng-keng ū chèng-si̍t i iáu-teh oa̍h.

9Án-ni mā thang kóng, tùi lâng siu cha̍p-hūn-chi̍t ê Lī-bī í-keng thong-kè A-pek-la-hán tùi Be̍k-ki-sé-tek la̍p cha̍p-hūn-chi̍t.

10In-ūi Be̍k-ki-sé-tek gêng-chiap A-pek-la-hán ê sî, Lī-bī iáu tī i ê sian-chó͘ A-pek-la-hán ê seng-khu lāi.

11 Í-sek-lia̍t-lâng ê Lu̍t-hoat sī kun-kù Lī-bī ê chè-si chè-tō͘ pan-hoat--ê, chit-ê chè-tō͘ nā ōe-tàng hō͘ lâng oân-choân, ná ū su-iàu m̄-sī chiàu A-lûn ê pan-chhù, sī chiàu Be̍k-ki-sé-tek pan-chhù siat-li̍p ê lēng-gōa chi̍t ê chè-si?

12Kì-jiân chè-si chè-tō͘ kái-piàn, Lu̍t-hoat mā tio̍h kái-piàn.

13In-ūi chiah-ê sū só͘ chí Hit-ūi sī sio̍k pa̍t-ê chi-cho̍k; chit-ê chi-cho̍k m̄-bat ū lâng tī chè-tôaⁿ chêng sū-hōng.

14Lán ê Chú bêng-bêng sī Iû-tāi chi-cho̍k ê kiáⁿ-sun; koan-hē chit-ê chi-cho̍k, Mô͘-se m̄-bat kóng-khí chè-si ê sū.

Lēng-gōa Chi̍t Ūi Chhin-chhiūⁿ Be̍k-ki-sé-tek ê Chè-si

15Taⁿ, góa teh kóng ê tāi-chì koh-khah chheng-chhó, in-ūi ū lēng-gōa chi̍t ūi chhin-chhiūⁿ Be̍k-ki-sé-tek ê chè-si í-keng chhut-hiān.

16I choh Chè-si m̄-sī kun-kù lâng ê tiâu-lē kui-chek, sī kun-kù bōe húi-bia̍t ê oa̍h-miā ê koân-lêng.

17In-ūi Sèng-keng ū án-ni choh-chèng:

Chiàu Be̍k-ki-sé-tek ê pan-chhù,

lí éng-oán choh chè-si.

18Chi̍t hong-bīn, kū ê tiâu-lē in-ūi bô-la̍t, bô lō͘-ēng, soah siū hòe-bô,

19in-ūi Mô͘-se ê Lu̍t-hoat sím-mi̍h tāi-chì to bô hoat-tō͘ sêng-choân. Lēng-gōa chi̍t hong-bīn, ū chi̍t ê khah hó ê ǹg-bāng í-keng chún-pī hó-sè, hō͘ lán thang thong-kè chit-ê ǹg-bāng chhin-kūn Siōng-tè.

20Koh chit-ê ǹg-bāng ū keng-kè soan-sè. Lī-bī hē-thóng ê chè-si bô keng-kè soan-sè;

21chí-ū chit-ūi Iâ-so͘ choh Chè-si ê sî ū keng-kè soan-sè; I ê Siōng-tè tùi I kóng:

Chú ū soan-sè,

bōe kái-piàn sim-ì;

lí éng-oán choh chè-si.

22Chiū-sī in-ūi án-ni, Iâ-so͘ chiâⁿ-chòe koh-khah hó ê iok ê pó-chèng.

23 Lī-bī hē-thóng ê chè-si ū chin chōe, in-ūi sí ê chó͘-gāi in bōe-tàng kè-sio̍k chòe;

24chí-ū Iâ-so͘ m̄-bián chiong chè-si-chit kau hō͘ pa̍t-lâng, in-ūi I éng-oán oa̍h--teh.

25Án-ni, thong-kè I lâi kàu Siōng-tè bīn-chêng ê lâng, I ōe-tàng kiù in kàu-tóe, in-ūi I éng-oán oa̍h--teh teh thòe in kî-tó.

26Chit-khoán Tōa-chè-si tú-tú ha̍h lán ê su-iàu; I sèng-kiat, bô siâ-ok, bô lâ-sâm, tùi chōe-jîn tiong siū hun-pia̍t--chhut-lâi, ko-seng kàu pí thiⁿ khah koân.

27I bô su-iàu chhin-chhiūⁿ kî-tha ê tōa-chè-si ta̍k-ji̍t tio̍h seng ūi-tio̍h ka-kī, āu-lâi ūi-tio̍h jîn-bîn ê chōe hiàn-chè. I hiàn pún-sin chòe chè-mi̍h, chi̍t piàn chiū oân-sêng.

28Mô͘-se ê Lu̍t-hoat jīm-bēng bô oân-choân ê lâng choh tōa-chè-si; m̄-kú ū Lu̍t-hoat í-āu, Siōng-tè ēng soan-sè jīm-bēng I ê Kiáⁿ éng-oán choh oân-choân ê Tōa-chè-si.

Hi-pek-lâi-su 7 - 現代台語譯本羅馬字版(TTVR)-闽南语

Learn More About Us