Iok-pek-kì 26 - 現代台語譯本羅馬字版(TTVR)-闽南语

1 Iok-pek ìn Pí-le̍k-ta̍t kóng:

2Bô khùi-la̍t--ê, lí ū kā i pang-chān jōa-chōe?

Chhiú-kut nńg--ê, lí án-chóaⁿ kā i kái-kiù?

3Lí án-chóaⁿ kà-sī bô tì-hūi ê lâng,

lâi chèng-si̍t lí ū jōa-chōe hó ê kè-chhek?

4Lí tùi tó-ūi tit-tio̍h lêng-kám,

khò siáⁿ-lâng teh kóng chiah-ê ōe?

5Im-hûn thòng-khó͘ phi̍h-phi̍h-chhoah,

tī chúi-ē kap tī chúi-lāi khiā-khí--ê mā án-ni.

6Tī Siōng-tè ê bīn-chêng Im-kan lō͘-hiān,

bia̍t-bông ê só͘-chāi bô khàm-kòa.

7I thí-khui kiong-chhong tī hūn-tūn ê téng-bīn,

kiàn-li̍p tāi-tōe, kā i tiàu tī khang-hu ê téng-bīn.

8I ēng ba̍t-hûn pau chúi,

chúi ê tāng-liōng mā bōe hō͘ ba̍t-hûn piak-li̍h.

9I chiong ge̍h-niû khàm--khí-lâi,

ēng hûn pho͘ tī hit téng-bīn.

10I tī chúi-bīn ōe kài-hān,

ōe kng kap àm ê kau-kài.

11Thiⁿ ê thiāu iô-choah,

in-ūi I ê chek-pī tio̍h-kiaⁿ.

12I ēng lêng-le̍k chè-ap tōa-hái,

ēng kè-tì phah-pāi hái-koài La-hap-pek.

13I pûn-khùi hō͘ thiⁿ chheng-chhái,

ēng chhiú chām-tn̄g teh tô-cháu ê tōa-chôa.

14Chiah-ê put-kò sī I só͘ chòe ê chi̍t sió pō͘-hūn,

lán thiaⁿ--tio̍h-ê sī I sòe-sòe ê siaⁿ,

chóng-sī I tōa koân-lêng ê chok-ûi chhin-chhiūⁿ teh tân tōa-lûi,

siáⁿ-lâng ōe-tàng liáu-kái?

Learn More About Us