Thê-to-su 3

Thê-to-su 3 - 現代台語譯本羅馬字版(TTVR)-闽南语

Ki-tok-tô͘ ê Hêng-ûi

1Tio̍h thê-chhíⁿ tāi-ke ho̍k-chiông chip-chèng-chiá kap tong-koân-chiá, thang chún-pī hó-sè chòe ta̍k-hāng hó-sū.

2Tio̍h khǹg in m̄-thang húi-pòng pa̍t-lâng, m̄-thang oan-ke; tio̍h hô-khì iú-siān, ēng un-hô ê thài-tō͘ tùi-thāi só͘-ū ê lâng.

3In-ūi lán ka-kī í-chêng mā-sī bô tì-sek, pōe-ge̍k, kiâⁿ bê-lō͘, choh chióng-chióng chêng-io̍k kap hióng-lo̍k ê lô͘-lē, tī ok-to̍k kap oàn-tò͘ tiong teh tō͘-ji̍t, hō͘-siōng oàn-hūn, pí-chhú iàm-ò͘ⁿ.

4M̄-kú lán ê Kiù-chú Siōng-tè

chû-pi jîn-ài hián-bêng ê sî,

5I ū chín-kiù lán;

m̄-sī in-ūi lán ka-kī ū hó hêng-ûi,

sī in-ūi I ū lîn-bín,

thong-kè hō͘ lâng têng-sin chhut-sì ê sóe-lé

kap Sèng Sîn ê keng-sin chín-kiù lán;

6thong-kè lán ê Kiù-chú Iâ-so͘ Ki-tok

Siōng-tè ū chiong Sèng Sîn hong-hong-hù-hù kā lán koàn-ak,

7hō͘ lán thang khò I ê un-tián chheng-chòe gī,

sêng-siū só͘ ǹg-bāng éng-oán ê oa̍h-miā.

8Chit-kù ōe thang siong-sìn.

Góa ài lí te̍k-pia̍t kiông-tiau chiah-ê sū, thang hō͘ sìn Siōng-tè ê lâng choân-sim chòe hó-sū; chiah-ê sū lóng chin hó, koh tùi lâng ū lī-ek.

9Tio̍h siám-pī gû-gōng ê cheng-lūn, cho̍k-phó͘, hun-cheng, kap Lu̍t-hoat ê cheng-chip, in-ūi chiah-ê lóng bô lō͘-ēng, bô kè-ta̍t.

10Chè-chō hun-cheng ê lâng, kā i kéng-kò chi̍t nn̄g piàn í-āu chiū m̄-thang koh kap i lâi-óng.

11Lí chai, chit-khoán lâng í-keng pāi-hoāi; i kè-sio̍k hoān-chōe sī teh kā ka-kī tēng-chōe.

Chòe-āu ê Chí-sī

12Góa chhe A-thê-má á-sī Chhui-ki-kó͘ khì lí hia ê sî, tio̍h kóaⁿ-kín lâi Nî-ko-pho-lí chhē góa, in-ūi góa í-keng koat-tēng beh tī hia kè tang-thiⁿ.

13Tio̍h chīn só͘-ōe pang-chān Se-la̍p lu̍t-su kap A-pho-lô lú-thêng ê su-iàu, hō͘ in thang an-sim chhut-hoat.

14Tio̍h hoan-hù lán ka-kī ê lâng ha̍k-si̍p chòe hó-sū lâi kiong-kip si̍t-chè ê su-iàu, chiah bián chòe bô lō͘-ēng ê lâng.

15Só͘-ū kap góa tī chia ê lâng beh kā lí chhéng-an. Chhiáⁿ thòe goán kā hiah-ê tâng-sìn ê hó pêng-iú chhéng-an.

Goān Siōng-tè ê un-tián kap lín tāi-ke tông-chāi!

Thê-to-su 3 - 現代台語譯本羅馬字版(TTVR)-闽南语

Learn More About Us