Iâ-lī-bí-su 40

Iâ-lī-bí-su 40 - 現代台語譯本羅馬字版(TTVR)-闽南语

Iâ-lī-bí kap Ki-tāi-lī Chòe-hé

1 Pa-pí-lûn-ông ê sī-ōe-tiúⁿ Nî-pò͘-sat-la-tàn tī La-má kā Iâ-lī-bí pàng--chhut-khì í-āu, Siōng Chú ū tùi Iâ-lī-bí kóng-ōe. Iâ-lī-bí hō͘ lâng ēng liān-á liān--teh, kap hiah-ê Iâ-lō͘-sat-léng-lâng, í-ki̍p Iû-tāi-lâng chòe-hé beh hō͘ lâng lia̍h-khì Pa-pí-lûn.

2 Nî-pò͘-sat-la-tàn kiò Iâ-lī-bí lâi, tùi i kóng, “Siōng Chú — lí ê Siōng-tè bat kéng-kò beh kàng chai-hō hō͘ chit-ê só͘-chāi.

3Taⁿ, Siōng Chú kó-jiân chiàu I só͘ kóng--ê chòe. Che sī in-ūi lín tek-chōe Siōng Chú, bô thiaⁿ-thàn I ê ōe, chiah-ê tāi-chì chiah ōe lîm-kàu lín.

4Taⁿ góa chiong liān tī lí ê chhiú ê liān-á pak--khí-lâi. Lí nā khòaⁿ kap góa chòe-hé khì Pa-pí-lûn hó, chiū lâi-khì, góa ōe hó-hó-á kā lí chiàu-kò͘; nā bô ài khì, chiū m̄-bián khì. Lí khòaⁿ, thó͘-tōe chiah khoah, lí ài khì tó-ūi, chiū thang khì.”

5 Iâ-lī-bí iáu-bē lī-khui í-chêng, Nî-pò͘-sat-la-tàn koh kā i kóng, “Lí mā ōe-ēng-tit tò-khì Sa-hoan ê sun, A-hi-kam ê kiáⁿ Ki-tāi-lī hia; Pa-pí-lûn-ông í-keng chí-phài i tī-lí Iû-tāi ta̍k siâⁿ-tìn. Lí thang tòa tī lín ê tông-pau tiong-kan. Á-sī, lí khòaⁿ tó-ūi khah tú-hó, chiū thang khì hia.” Sī-ōe-tiúⁿ chiū sàng lé-mi̍h kap niû-si̍t hō͘ Iâ-lī-bí, hō͘ i chū-iû lī-khui.

6Iâ-lī-bí chiū khì Bí-su-pa, khì A-hi-kam ê kiáⁿ Ki-tāi-lī hia, kap i chòe-hé tòa tī chhun--lo̍h-lâi ê tông-pau tiong-kan.

Ki-tāi-lī Siū Chí-phài Chòe Séng-tiúⁿ(2 Ông 25.22-24)

7Tī iá-gōa, hiah-ê bô tâu-hâng Pa-pí-lûn ê kun-koaⁿ kap in ê pō͘-hā, thiaⁿ-tio̍h Pa-pí-lûn-ông chí-phài A-hi-kam ê kiáⁿ Ki-tāi-lī chòe hit tōe-khu ê séng-tiúⁿ, tī-lí bô lia̍h-khì Pa-pí-lûn ê ta-po͘-lâng, cha-bó͘-lâng, gín-á, kap hit só͘-chāi hui-siông sàn-chhiah ê lâng,

8chiū lâi Bí-su-pa kìⁿ Ki-tāi-lī. Chiah-ê kun-koaⁿ pau-koat Nî-thàm-ngá ê kiáⁿ Í-si̍t-má-lī, Ka-lī-a ê kiáⁿ Iok-hap-lân kap Iok-ná-tan, Tan-hō͘-be̍k ê kiáⁿ Se-lâi-ngá, Nî-tô-hoat-lâng Í-húi ê kiáⁿ-jî, Má-ka-lâng Iâ-sat-nî-a, í-ki̍p in ê pō͘-hā.

9Sa-hoan ê sun, A-hi-kam ê kiáⁿ Ki-tāi-lī tùi hiah-ê kun-koaⁿ kap in ê pō͘-hā chiù-chōa, kóng, “M̄-bián kiaⁿ ho̍k-sāi Pa-pí-lûn-lâng. Chòe lín tòa tiàm chit-ê só͘-chāi, hō͘ Pa-pí-lûn-ông koán, lín chiū ōe pêng-an bô-sū.

10Góa leh, góa ōe tòa tī Bí-su-pa, sū-hāu hiah-ê lâi lán chia ê Pa-pí-lûn-lâng. M̄-kú lín, lín tio̍h chek-chū chi̍t-kóa chiú, iû, kap joa̍h-thiⁿ ê ké-chí, siu tiàm khì-khū lāi-bīn, koh tòa tī lín chiàm ê siâⁿ-tìn.”

11Hiah-ê tī Mô͘-ap, A-bûn, Í-tong tōe-khu, kap ta̍k-kok ê Iû-tāi-lâng, thiaⁿ-tio̍h Pa-pí-lûn-ông bô châu-bia̍t só͘-ū ê Iû-tāi-lâng, koh phài Sa-hoan ê sun, A-hi-kam ê kiáⁿ Ki-tāi-lī chòe séng-tiúⁿ,

12in chiū tùi hō͘ lâng kóaⁿ--khì ê ta̍k só͘-chāi tńg--lâi, lâi Iû-tāi-tōe ê Bí-su-pa, khì Ki-tāi-lī hia. In lóng ū siu-khǹg chin chōe chiú kap joa̍h-thiⁿ ê ké-chí.

Ki-tāi-lī Siū Àm-sat(2 Ông 25.25-26)

13 Ka-lī-a ê kiáⁿ Iok-hap-lân kap hiah-ê tī iá-gōa ê kun-koaⁿ lâi Bí-su-pa kìⁿ Ki-tāi-lī,

14tùi i kóng, “A-bûn-ông Pa-lī-su ū phài Nî-thàm-ngá ê kiáⁿ Í-si̍t-má-lī lâi beh thâi lí, lí kiám chai?” A-hi-kam ê kiáⁿ Ki-tāi-lī m̄ sìn in ê ōe.

15Ka-lī-a ê kiáⁿ Iok-hap-lân tī Bí-su-pa su-hā tùi Ki-tāi-lī kóng, “Chhiáⁿ ún-chún góa khì thâi Nî-thàm-ngá ê kiáⁿ Í-si̍t-má-lī, it-tēng bô lâng ōe chai-iáⁿ chit-ê tāi-chì. Ná thang hō͘ i kā lí thâi-sí. Lí nā sí, só͘-ū kui-óa lâi lí chia ê Iû-tāi-lâng chiū ōe sì-sòaⁿ, chhun--lo̍h-lâi ê Iû-tāi-lâng kiám m̄-sī lóng ōe bia̍t-bông?”

16A-hi-kam ê kiáⁿ Ki-tāi-lī kā Ka-lī-a ê kiáⁿ Iok-hap-lân kóng, “Lí m̄-thang chòe chit-khoán tāi-chì. Lí só͘ kóng koan-hē Í-si̍t-má-lī ê ōe bô-iáⁿ.”

Iâ-lī-bí-su 40 - 現代台語譯本羅馬字版(TTVR)-闽南语

Learn More About Us