Lō͘-ka Hok-im 5

Lō͘-ka Hok-im 5 - 現代台語譯本羅馬字版(TTVR)-闽南语

Iâ-so͘ Ho͘-tiàu Bûn-tô͘(Thài 4.18-22; Khó 1.16-20)

1Ū chi̍t piàn, Iâ-so͘ khiā tī Kek-nî-sat-le̍k ô͘-piⁿ, ū chi̍t tīn lâng khoeh óa-khì beh thiaⁿ Siōng-tè ê ōe.

2I khòaⁿ-tio̍h nn̄g chiah chûn thêng tī ô͘-piⁿ, lia̍h-hî--ê lī-khui chûn teh sóe-bāng.

3Kî-tiong chi̍t chiah sī Se-bûn ê; Iâ-so͘ chiūⁿ hit-chiah chûn, kiò i kò sió-khóa lī-khui hōaⁿ, jiân-āu chē--lo̍h-khì, tùi chûn-téng kà-sī chèng-lâng.

4Iâ-so͘ kóng soah, tùi Se-bûn kóng, “Kā chûn kò-khì chhim ê só͘-chāi, pha-bāng lo̍h-khì lia̍h-hî.”

5 Se-bûn ìn kóng, “Lāu-su, goán piàⁿ kui-mî lia̍h lóng bô, m̄-kú lí to teh kóng ah, góa chiū lâi lo̍h-bāng.”

6In chi̍t-ē pàng--lo̍h-khì, bāng-tio̍h chin chōe hî, bāng soah kiông-beh phòa--khì.

7In ia̍t-chhiú kiò pa̍t-chiah chûn ê tâng-phōaⁿ lâi tàu-kha-chhiú. In chiū lâi, chiong hî tóe tī nn̄g chiah chûn, tóe kàu móa-móa soah kiông-beh tîm--lo̍h-khì.

8Se-bûn Pí-tek chi̍t-ē khòaⁿ--tio̍h, chiū kūi lo̍h-khì Iâ-so͘ ê kha-chêng, kóng, “Chú ah, chhiáⁿ lī-khui góa! Góa sī chi̍t ê ū-chōe ê lâng.”

9 Se-bûn kap i ê tâng-phōaⁿ in-ūi lia̍h-tio̍h hiah chōe hî chin tio̍h-kiaⁿ.

10Se-bûn ê tâng-phōaⁿ Se-pì-thài ê kiáⁿ Ngá-kok kap Iok-hān mā chin tio̍h-kiaⁿ. Iâ-so͘ kā Se-bûn kóng, “M̄-bián kiaⁿ, tùi taⁿ í-āu, lí ōe tit-tio̍h lâng.”

11In thoa chûn óa-hōaⁿ liáu-āu, chiong it-chhè pàng--leh, khì tè Iâ-so͘.

Iâ-so͘ I-hó Bâ-hong Pīⁿ-lâng(Thài 8.1-4; Khó 1.40-45)

12Ū chi̍t piàn Iâ-so͘ tī chi̍t ê siâⁿ, tī hia ū chi̍t ê lâng kui seng-khu jiám-tio̍h bâ-hong. I khòaⁿ-tio̍h Iâ-so͘ chiū phak lo̍h-khì kî-kiû kóng, “Chú ah, lí nā khéng, ōe-tàng hō͘ góa chheng-khì.”

13Iâ-so͘ chhun-chhiú kā i bong, kóng, “Góa khéng, hō͘ lí chheng-khì!” I ê bâ-hong sûi-sî bô--khì.

14Iâ-so͘ bēng-lēng i, kóng, “M̄-thang kā lâng kóng; tio̍h khì hō͘ chè-si giām, koh chiàu Mô͘-se ê kui-tēng, ūi-tio̍h lí ū tit-tio̍h chheng-khì hiàn chè-mi̍h, thang tùi chèng-lâng chèng-bêng.”

15Iâ-so͘ ê miâ-siaⁿ ná thoân ná khoah; kui tōa-tīn lâng chū-chi̍p lâi beh thiaⁿ tō-lí, koh kiû I hō͘ in ê pīⁿ tit-tio̍h i-hó.

16M̄-kú Iâ-so͘ thè-khì phian-phiah ê só͘-chāi kî-tó.

Iâ-so͘ I-hó Poàn-sin-put-sūi ê Lâng(Thài 9.1-8; Khó 2.1-12)

17Ū chi̍t ji̍t, Iâ-so͘ teh kà-sī lâng ê sî, ū Hoat-lī-sài-phài ê lâng kap lu̍t-hoat-kàu-su tī hia teh chē. In sī tùi Ka-lī-lī kap Iû-thài ta̍k chng-siā, í-ki̍p Iâ-lō͘-sat-léng lâi--ê. Chú ê koân-lêng kap Iâ-so͘ tông-chāi, hō͘ I ōe-tàng i-hó pīⁿ-lâng.

18Hit-sî, ū lâng ēng chhn̂g kng chi̍t ê poàn-sin-put-sūi ê lâng lâi, siūⁿ-beh kng ji̍p-khì hē tī Iâ-so͘ ê bīn-chêng;

19m̄-kú in-ūi lâng chin chōe, chhē bô lō͘ thang kng--ji̍p-khì, chiū peh-khì chhù-téng, thiah chhù-hiā, chiong hit-ê poàn-sin-put-sūi--ê liân chhn̂g lūi lo̍h-khì chèng-lâng ê tiong-kan, hē tī Iâ-so͘ ê bīn-chêng.

20Iâ-so͘ khòaⁿ-kìⁿ in ê sìn-sim, chiū kóng, “Pêng-iú ah, lí ê chōe sià-bián lah.”

21Hiah-ê keng-ha̍k-kàu-su kap Hoat-lī-sài-phài ê lâng gī-lūn kóng, “Chit-ê teh siat-to̍k Siōng-tè ê sī siáⁿ-lâng? Siōng-tè í-gōa, sím-mi̍h-lâng ōe-tàng sià-chōe?”

22Iâ-so͘ chai-iáⁿ in teh chit-būn sím-mi̍h, chiū tùi in kóng, “Sī-án-chóaⁿ lín sim-lāi teh chit-būn?

23Kóng ‘Lí ê chōe sià-bián lah’, á-sī kóng ‘Khí-lâi kiâⁿ’, tó chi̍t hāng khah kán-tan?

24Put-kò góa beh hō͘ lín chai Jîn-chú tī tōe-chiūⁿ ū sià-chōe ê koân-pèng.” Iâ-so͘ tùi hit-ê poàn-sin-put-sūi ê lâng kóng, “Góa kā lí kóng, khí--lâi, giâ lí ê chhn̂g, tńg-khì lín tau!”

25Hit-ê lâng sûi-sî tī chèng-lâng ê bīn-chêng peh--khí-lâi, giâ i só͘ tó ê chhn̂g tńg-khì in tau, ná kiâⁿ ná kui êng-kng hō͘ Siōng-tè.

26Chèng-lâng lóng chin tio̍h-kiaⁿ, kui êng-kng hō͘ Siōng-tè, sim-lāi chhiong-móa kèng-ùi kóng, “Goán kin-á-ji̍t ū khòaⁿ-tio̍h kî-biāu ê tāi-chì!”

Iâ-so͘ Ho͘-tiàu Lī-bī(Thài 9.9-13; Khó 2.13-17)

27Chiah-ê tāi-chì í-āu, Iâ-so͘ chhut--khì, khòaⁿ-tio̍h chi̍t ê ba̍uh-sè--ê, miâ kiò-chòe Lī-bī, chē tī sè-koan, chiū tùi i kóng, “Lâi tè góa!”

28Lī-bī chiū pàng-sak it-chhè, khí-lâi tè I.

29 Lī-bī tī in tau ūi-tio̍h Iâ-so͘ pān tōa iàn-se̍k. Ū chi̍t tōa-tīn ba̍uh-sè--ê í-ki̍p kî-tha ê lâng kap in chòe-hé chē-toh chia̍h-pn̄g.

30Ū chi̍t-kóa Hoat-lī-sài-phài ê lâng kap sio̍k in ê keng-ha̍k-kàu-su tùi Iâ-so͘ ê bûn-tô͘ bâi-oàn, kóng, “Sī-án-chóaⁿ lín kap ba̍uh-sè--ê í-ki̍p chōe-jîn chòe-hé lim-chia̍h?”

31Iâ-so͘ ìn kóng, “Kiān-khong--ê bô su-iàu i-seng, phòa-pīⁿ--ê chiah ū su-iàu.

32Góa lâi, m̄-sī beh chio gī-lâng, sī beh chio chōe-jîn hóe-kái.”

Kìm-chia̍h ê Būn-tôe(Thài 9.14-17; Khó 2.18-22)

33Āu-lâi in tùi Iâ-so͘ kóng, “Iok-hān ê bûn-tô͘ siông-siông kìm-chia̍h kî-tó, Hoat-lī-sài-phài ê bûn-tô͘ mā-sī án-ni, m̄-kú lí ê bûn-tô͘ ia̍h-chia̍h-ia̍h-lim.”

34Iâ-so͘ tùi in kóng, “Sin-lông iáu kap hun-iàn ê lâng-kheh chòe-hé ê sî, lín kiám ōe hō͘ lâng-kheh kìm-chia̍h?

35Ji̍t-chí teh-beh kàu, sin-lông ōe hō͘ lâng tùi in tiong-kan lia̍h--khì, tī hiah-ê ji̍t in chiū ōe kìm-chia̍h.”

36Iâ-so͘ koh ēng chi̍t ê phì-jū kā in kóng, “Bô lâng thiah sin-saⁿ lâi pó͘ kū-saⁿ, nā án-ni chòe, m̄-nā sin-saⁿ thiah-phòa, thiah--khí-lâi hit-tè sin-pò͘ kap kū-saⁿ mā bōe ha̍h.

37Mā bô lâng chiong sin-chiú ji̍p tī kū phê-tē. Nā án-ni chòe, sin-chiú ōe kā phê-tē piak-phòa, chiú lâu--chhut-lâi, phê-tē mā pháiⁿ--khì.

38Sin-chiú tio̍h ji̍p tī sin phê-tē.

39Bô lâng lim kū-chiú liáu-āu ài lim sin-chiú, lâng lóng ōe kóng ‘Iáu-sī kū-chiú khah hó.’”

Lō͘-ka Hok-im 5 - 現代台語譯本羅馬字版(TTVR)-闽南语

Learn More About Us