Sin-bēng-kì 22

Sin-bēng-kì 22 - 現代台語譯本羅馬字版(TTVR)-闽南语

1Lín nā khòaⁿ-tio̍h tông-pau ê gû á-sī iûⁿ bê-lō͘, m̄-thang tìⁿ bô khòaⁿ--tio̍h, it-tēng tio̍h hō͘ i tò-tńg-khì lín ê tông-pau hia.

2Lín ê tông-pau nā lī lín chin hn̄g, á-sī lín m̄ bat--i, chiū tio̍h khan tńg-khì lín tau, lâu tī lín hia, thèng-hāu lín ê tông-pau lâi chhē, chiah hêng i.

3Lín ê tông-pau nā phah-m̄-kìⁿ lû, á-sī saⁿ, á-sī kî-tha ê mi̍h-kiāⁿ, m̄-thang tìⁿ-chòe bô khòaⁿ--tio̍h; lín nā khioh--tio̍h, lóng tio̍h chiàu án-ni chòe.

4Lín nā khòaⁿ-tio̍h tông-pau ê lû á-sī gû tī lō͘--ni̍h poa̍h-tó, m̄-thang tìⁿ bô khòaⁿ--tio̍h, it-tēng tio̍h pang-chān chú-lâng kā cheng-siⁿ giú--khí-lâi.

5Hū-jîn-lâng m̄-thang chhēng ta-po͘-lâng ê saⁿ, ta-po͘-lâng mā m̄-thang chhēng hū-jîn-lâng ê saⁿ; só͘-ū án-ni chòe ê lâng, sī Siōng Chú — lín ê Siōng-tè iàm-ò͘ⁿ--ê.

6Lín nā tī lō͘--ni̍h khòaⁿ-tio̍h chiáu-á-siū, bô-lūn tī chhiū-téng á-sī tī thô͘-kha, lāi-bīn ū chiáu-á-kiáⁿ á-sī chiáu-á-nn̄g, chiáu-bú teh áⁿ chiáu-á-kiáⁿ á-sī pū-nn̄g, lín m̄-thang lia̍h chiáu-á-kiáⁿ sòa lia̍h chiáu-bú;

7lín thang lia̍h chiáu-á-kiáⁿ, m̄-kú it-tēng tio̍h pàng chiáu-bú khì; án-ni lín chiū thang hióng-siū hok-khì, chia̍h tn̂g-hè-siū.

8Lín nā khí sin-chhù, tio̍h tī chhù-téng chòe lân-kan, chiah bián ū lâng tùi hia poa̍h--lo̍h-lâi siak-sí, lín chiū tio̍h sêng-tam chek-jīm.

9M̄-thang tī phû-tô-hn̂g iā tē-jī chióng chéng-chí; nā án-ni chòe, phû-tô kap só͘ iā chéng-chí ê siu-sêng lóng kui sèng-só͘, bōe-tàng ka-kī ēng.

10M̄-thang ēng gû kap lû kòa kâng chi̍t ê taⁿ lôe-chhân.

11M̄-thang chhēng iûⁿ-mn̂g kap iù-môa ha̍p chòe-hé chit ê saⁿ.

12Lín moa ê gōa-saⁿ, tio̍h tī sì kak-thâu chòe chhiu.

Chhú-lí Hun-in Kiù-hun ê Tiâu-lē

13Lâng nā chhōa-bó͘, kap i tâng-pâng, āu-lâi bô ài i,

14kā i húi-pòng, phò-hoāi i ê miâ-siaⁿ, kóng, “Góa chhōa chit-ê cha-bó͘, kap i tâng-pâng, hoat-kiàn i m̄-sī chāi-sek-lú.”

15Cha-bó͘ gín-á ê pē-bú tio̍h the̍h cha-bó͘-kiáⁿ chāi-sek-lú ê chèng-kù chhut--lâi, tòa-khì hit-ê siâⁿ kóng-tiûⁿ ê tiúⁿ-ló hia;

16cha-bó͘ gín-á ê lāu-pē tio̍h tùi tiúⁿ-ló kóng, “Góa chiong góa ê cha-bó͘-kiáⁿ hō͘ chit-ê lâng choh-bó͘, i bô ài i.

17I húi-pòng góa ê cha-bó͘-kiáⁿ, kóng ‘Góa hoat-kiàn lí ê cha-bó͘-kiáⁿ m̄-sī chāi-sek-lú’. Lín khòaⁿ, che sī goán cha-bó͘-kiáⁿ chāi-sek-lú ê chèng-kù.” Pē-bú chiū chiong hit-tè pò͘ pâi tī hit-ê siâⁿ tiúⁿ-ló ê bīn-chêng.

18Hit-ê siâⁿ ê tiúⁿ-ló tio̍h kā hit-ê lâng lia̍h-lâi chhú-hoa̍t;

19mā tio̍h kā i hoa̍t chi̍t-chheng chi̍t-pah sì-cha̍p kong-khek ê gûn, kau hō͘ cha-bó͘ gín-á ê lāu-pē; in-ūi i ū phò-hoāi Í-sek-lia̍t ê chāi-sek-lú ê miâ-siaⁿ; cha-bó͘ gín-á iû-goân chòe i ê bó͘, hit-ê lâng chi̍t-sì-lâng bōe-ēng-tit kā i lî-hun.

20Chit-ê lâng khòng-kò--ê nā-sī sū-si̍t, cha-bó͘ gín-á bô chāi-sek-lú ê chèng-kù,

21in tio̍h lia̍h hit-ê cha-bó͘ gín-á khì in lāu-pē ê chhù ê mn̂g-kháu, siâⁿ-lāi ê lâng tio̍h ēng chio̍h-thâu kā i tìm-sí; in-ūi i tī Í-sek-lia̍t chòe kiàn-siàu ê sū, tī in lāu-pē ê ke kiâⁿ îm-loān; án-ni chiū tùi lín tiong-kan tû-khì hit-ê siâ-ok ê sū.

22Nā ū lâng kap pa̍t-lâng ê bó͘ khùn, hit-ê ta-po͘ kap hit-ê hū-jîn-lâng lóng tio̍h hō͘ sí; án-ni chiū tùi Í-sek-lia̍t ê tiong-kan tû-khì hit-ê siâ-ok ê sū.

23Nā ū chāi-sek-lú í-keng kap lâng tēng-hun, ū ta-po͘-lâng tī siâⁿ-lāi tú-tio̍h i, kap i khùn,

24lín tio̍h lia̍h chit nn̄g ê lâng khì kóng-tiûⁿ, ēng chio̍h-thâu kā in tìm-sí; in-ūi chit-ê cha-bó͘ gín-á tī siâⁿ-lāi bô hoah-kiù-lâng, chit-ê ta-po͘-lâng lêng-jio̍k pa̍t-lâng ê bó͘. Án-ni, lín chiū tùi lín tiong-kan tû-khì hit-ê siâ-ok ê sū.

25Nā ū ta-po͘-lâng tī iá-gōa tú-tio̍h í-keng tēng-hun ê cha-bó͘ gín-á, kā i kiông-kan; kan-ta hit-ê kā i kiông-kan ê lâng tio̍h sí.

26M̄-kú m̄-thang pān hit-ê cha-bó͘ gín-á, in-ūi i bô eng-kai sí. Chit-ê ta-po͘-lâng chòe ê tāi-chì sī chhin-chhiūⁿ lâng khí-lâi kong-kek i ê chhù-piⁿ, kā i thâi-sí kâng-khoán;

27i tī iá-gōa tú-tio̍h hit-ê í-keng tēng-hun ê cha-bó͘ gín-á, cha-bó͘ gín-á sui-jiân hoah-kiù-lâng, mā bô lâng kiù i.

28Nā ū ta-po͘-lâng tú-tio̍h iáu-bē tēng-hun ê chāi-sek-lú, kā i lia̍h--teh, kiông-kan, hō͘ lâng hoat-kiàn,

29hit-ê kā i kiông-kan ê ta-po͘-lâng tio̍h the̍h gō͘-pah chhit-cha̍p kong-khek ê gûn, kau hō͘ cha-bó͘ gín-á ê lāu-pē, koh tio̍h chhōa i chòe bó͘, chi̍t-sì-lâng bōe-ēng-tit kā i lî-hun, in-ūi hit-ê ta-po͘-lâng í-keng kā i lêng-jio̍k.

30Lâng m̄-thang chhōa lāu-pē ê bó͘, phah lâ-sâm i ê lāu-pē ê bîn-chhn̂g.

Sin-bēng-kì 22 - 現代台語譯本羅馬字版(TTVR)-闽南语

Learn More About Us