Khé-sī-lio̍k 13

Khé-sī-lio̍k 13 - 現代台語譯本羅馬字版(TTVR)-闽南语

Nn̄g Chiah Siù

1Āu-lâi, góa ū khòaⁿ-kìⁿ chi̍t chiah siù tùi hái--ni̍h khí--lâi; i ū cha̍p ki kak, chhit ê thâu; cha̍p ki kak ū tì cha̍p téng ông-koan; ta̍k-ê thâu-khak téng lóng ū pòng-to̍k Siōng-tè ê miâ-hō.

2Góa só͘ khòaⁿ--kìⁿ hit-chiah siù chhin-chhiūⁿ pà; i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Hit-chiah ok-lêng chiong ka-kī ê lêng-le̍k, ông-chō, kap tōa koân-pèng kau hō͘ hit-chiah siù.

3Siù ê chi̍t ê thâu-khak chhin-chhiūⁿ ū siū-tio̍h tì-miā ê tāng-siong, m̄-kú i ê tì-miā-siong ū tit-tio̍h i-hó. Thong sè-kài ê lâng lóng kám-kak chin hi-kî, khì tè tī siù ê āu-bīn.

4In lóng pài hit-chiah ok-lêng, in-ūi ok-lêng ū chiong i ê koân-pèng kau hō͘ siù; in mā pài siù, kóng, “Siáⁿ-lâng ōe-tàng kap chit-chiah siù saⁿ-pí? Siáⁿ-lâng ōe-tàng kap i kau-chiàn?”

5Āu-lâi, chit-chiah siù ū tit-tio̍h chi̍t ê kóng tōa-ōe kap siat-to̍k ê chhùi; i tit-tio̍h ún-chún thang chip-hêng koân-pèng sì-cha̍p-jī ge̍h-ji̍t kú.

6I khui-chhùi siat-to̍k Siōng-tè, siat-to̍k I ê miâ kap I ê pò͘-pîⁿ, chiū-sī hiah-ê tah pò͘-pîⁿ tī thiⁿ-téng ê lâng.

7I mā tit-tio̍h ún-chún thang kong-kek sìn-tô͘, kā in cheng-ho̍k; i koh tit-tio̍h koân thang tī-lí ta̍k-ê cho̍k-kûn, ta̍k-ê bîn-cho̍k, ta̍k-ê pang-kok, kap kóng ta̍k-khoán gú-giân ê lâng.

8Só͘-ū tòa tī tōe-chiūⁿ ê lâng, tùi chhòng-chō sè-kài í-lâi, in ê miâ bô kì tī siū thâi Iûⁿ-ko ê oa̍h-miā-chheh--ê, lóng ōe pài hit-chiah siù.

9Ū hī-khang--ê lóng tio̍h thiaⁿ:

10Hit-ê eng-kai siū lia̍h--ê tio̍h siū lia̍h;

hit-ê eng-kai siū sat-hāi--ê tio̍h siū to sat-hāi.

In-ūi án-ni, sìn-tô͘ tio̍h ū nāi-sim kap sìn-sim.

11Āu-lâi, góa koh khòaⁿ-kìⁿ ū chi̍t chiah siù tùi tōe--ni̍h khí--lâi; i ū nn̄g ki kak chhin-chhiūⁿ iûⁿ ê kak, kóng-ōe chhin-chhiūⁿ ok-lêng.

12I tī thâu chi̍t chiah siù ê bīn-chêng chip-hêng thâu chi̍t chiah siù ê koân-pèng. I kiò tōe kap tòa tī tōe-chiūⁿ ê lâng khì pài thâu chi̍t chiah siù, chiū-sī siū-tio̍h tì-miā-siong koh tit-tio̍h i-hó hit-chiah siù.

13I kiâⁿ tōa kî-chek, tī lâng ê bīn-chêng kiò hé tùi thiⁿ kàng-lo̍h tōe;

14koh ēng siū ún-chún tī siù ê bīn-chêng kiâⁿ ê kî-chek lâi bê-he̍k tōe-chiūⁿ ê lâng, hoan-hù in tio̍h kā hit-chiah siū to-siong iáu oa̍h--teh ê siù chō chi̍t chō siōng.

15I koh siū ún-chún chiong oa̍h-khì pûn ji̍p-khì siù ê siōng, hō͘ siù ê siōng ōe kóng-ōe, koh sat-hāi só͘-ū bô pài siù ê siōng ê lâng.

16I mā kiông-pek chèng-lâng, bô-lūn tōa-sòe, hó-gia̍h sàn-chhiah, chū-iû--ê choh lô͘-lē--ê, tī in ka-kī ê chiàⁿ-chhiú á-sī thâu-hia̍h khàm-ìn chòe kì-hō.

17Bô khàm siù ê miâ, á-sī bô tāi-piáu i ê miâ ê sò͘-jī--ê, chiū bōe-tàng bóe-bōe.

18Tùi chit-ê tāi-chì tio̍h ū tì-hūi. Chhong-bêng ê lâng tio̍h sǹg-chhut siù ê sò͘-jī, in-ūi sò͘-jī tāi-piáu chi̍t ê lâng ê miâ, chit-ê sò͘-jī sī la̍k-pah la̍k-cha̍p-la̍k.

Khé-sī-lio̍k 13 - 現代台語譯本羅馬字版(TTVR)-闽南语

Learn More About Us