Chim-giân 8

Chim-giân 8 - 現代台語譯本羅馬字版(TTVR)-闽南语

Chheng-chàn Tì-hūi

1Tio̍h thiaⁿ, Tì-hūi teh kiò,

chhong-bêng teh chhut-siaⁿ.

2Tì-hūi tī lō͘-piⁿ koân ê só͘-chāi,

khiā tī si̍p-jī-lō͘-kháu.

3Tì-hūi tī siâⁿ-mn̂g-kháu,

tī lâng teh chhut-ji̍p ê só͘-chāi tōa-siaⁿ hoah,

4“Chèng-lâng ah, góa kiò lín;

sè-kan-lâng ah, góa tùi lín kóng.

5Gōng-ti̍t ê lâng ah, tio̍h ha̍k-si̍p cheng-bêng;

gû-gōng ê lâng ah, tio̍h tui-kiû chhong-bêng.

6Tio̍h thiaⁿ, góa beh kóng ke̍k-hó ê sū,

beh lūn chèng-ti̍t ê tāi-chì.

7Góa ê chhùi kóng chin-si̍t;

góa ê chhùi-tûn iàm-ò͘ⁿ siâ-ok.

8Góa só͘ kóng ê ōe lóng kong-chèng,

bô oan-khiau, bô oai-khiok.

9Bêng-lí ê lâng lóng ōe liáu-kái;

ū tì-sek ê lâng lóng khòaⁿ-chòe chèng-khak.

10Chiap-siū góa ê koán-kàu pí tit-tio̍h gûn khah hó;

tit-tio̍h tì-sek pí tit-tio̍h sûn-kim khah hó.

11In-ūi tì-hūi pí âng-pó-chio̍h khah hó;

lâng só͘ ì-ài--ê lóng bōe-tàng kap i pí.

12“Góa sī Tì-hūi, hō͘ lâng cheng-bêng,

hō͘ lâng ū tì-sek gâu kè-ōe.

13Kèng-ùi Siōng Chú chiū tio̍h iàm-ò͘ⁿ siâ-ok;

kiau-ngō͘, chū-tāi, siâ-ok ê hêng-ûi,

í-ki̍p oai-khiok sī-hui lóng sī góa só͘ iàm-ò͘ⁿ.

14Góa ū chhek-lio̍k kap chin ê tì-sek;

góa chhong-bêng, ū lêng-le̍k.

15Kun-ông khò góa lâi thóng-tī;

thóng-tī-chiá thong-kè góa tēng kong-pêng ê hoat-lu̍t.

16Ông-chhin kùi-cho̍k, sè-chiūⁿ ê sím-phòaⁿ-koaⁿ,

lóng khò góa lâi chiáng-koân.

17Thiàⁿ góa--ê, góa mā thiàⁿ i;

khún-chhiat chhē góa--ê, ōe chhē--tio̍h.

18Hó-gia̍h kap chun-kùi sī góa só͘ sù;

kú-tn̂g ê hù-jū kap hoân-êng mā-sī góa só͘ sù.

19Góa hō͘ lâng ê ké-chí pí kim, pí sûn-kim khah hó;

góa hō͘ lâng ê siu-sêng pí sûn ê gûn khah hó.

20Góa kiâⁿ kong-gī ê lō͘,

kiâⁿ kong-pêng ê tō-lō͘,

21hō͘ thiàⁿ góa ê lâng tit-tio̍h châi-hù,

hō͘ in ê châi-pó móa-móa.

22“Tī chhòng-chō ê khí-thâu, Siōng Chú seng chō góa;

chū-kó͘ í-lâi, góa sī I thâu chi̍t ê chhòng-chō--ê.

23Tī siōng khí-thâu, tī chhòng-chō sè-kài í-chêng,

tùi ke̍k kó͘-chá, I chō góa.

24Góa chhut-sì ê sî iáu-bē ū chhim-ian,

mā iáu-bē ū hái-iûⁿ.

25Góa chhut bú-thai ê sî, tōa-soaⁿ iáu-bē siū-chō,

sió-soaⁿ mā iáu-bē hêng-sêng.

26Hit-sî tāi-tōe kap chhân-iá iáu-bē chhòng-chō,

liân tōe-chiūⁿ thâu chi̍t pé thô͘-hún mā iáu-bē ū.

27I an-tì kiong-chhong,

tī hái-bīn ōe tōe-pêng-sòaⁿ,

hit-sî góa í-keng tī hia.

28I tī khong-tiong pò͘-tì hûn-chhái,

hō͘ chhim-ian ê chúi-chôaⁿ chhèng--chhut-lâi,

29kā hái tēng kài-hān, hō͘ hái-chúi bōe pôaⁿ kè-kài,

kā tāi-tōe hē tōe-ki,

hit-sî góa í-keng tī hia.

30Hit-sî, góa tī I sin-piⁿ chòe sai-hū-thâu,

ta̍k-ji̍t hō͘ I hoaⁿ-hí.

Góa put-sî tī I bīn-chêng hoaⁿ-hí khoài-lo̍k,

31ì-ài I hō͘ lâng khiā-khí ê sè-kài,

hoaⁿ-hí I chhòng-chō ê sè-kan-lâng.

32“Taⁿ, góa ê kiáⁿ-jî, tio̍h thiaⁿ-thàn góa;

chun-hêng góa tō-lō͘ ê lâng chin ū hok-khì!

33Tio̍h thiaⁿ kà-sī lâi tit-tio̍h tì-hūi,

m̄-thang kū-choa̍t.

34Thiaⁿ-thàn góa ê lâng chin ū hok-khì!

In ta̍k-ji̍t tī góa ê mn̂g-kháu teh tán,

tī góa ê mn̂g-piⁿ teh thèng-hāu.

35Chhē-tio̍h góa ê lâng chiū-sī chhē-tio̍h sìⁿ-miā;

i ōe tùi Siōng Chú tit-tio̍h un-hūi.

36Chhē bô tio̍h góa ê lâng ōe bia̍t-bông;

oàn-hūn góa ê lâng ka-kī chhē sí.”

Chim-giân 8 - 現代台語譯本羅馬字版(TTVR)-闽南语

Learn More About Us