Iok-pek-kì 38

Iok-pek-kì 38 - 現代台語譯本羅馬字版(TTVR)-闽南语

Siōng Chú Ìn-tap Iok-pek

1Hit-sî Siōng Chú tùi kńg-lê-á-hong tiong-kan ìn Iok-pek:

2Lí sī siáⁿ-lâng,

káⁿ ēng bû-ti ê ōe hō͘ góa ê chí-ì bū-bū bô-bêng?

3Tio̍h chún-pī hó-sè, chòe chi̍t ê tāi-tiōng-hu;

góa mn̄g lí, lí tio̍h ìn góa.

4Góa hē tāi-tōe ê tōe-ki, hit-sî lí tī tó-ūi?

Lí nā chai, kóng lâi thiaⁿ-khòaⁿ leh.

5Sī sím-mi̍h-lâng koat-tēng tāi-tōe ê tōa sòe?

Sī sím-mi̍h-lâng ēng chîn-sòaⁿ niû tāi-tōe, lí chai bô?

6Tāi-tōe ê tōe-ki kiàn-li̍p tī sím-mi̍h téng-bīn,

tiōng-iàu ê ki-chio̍h sī sím-mi̍h-lâng an-tì--ê, lí kiám chai?

7Hit-sî, thàu-chá ê chhiⁿ-sîn chòe-hé chhiùⁿ-koa,

Siōng-tè ê chèng sù-chiá mā lóng hoan-ho͘.

8Tōa-hái tùi tōe ê bú-thai chhiong--chhut-lâi ê sî,

siáⁿ-lâng ēng mn̂g kā i koaiⁿ--khí-lâi?

9Góa ēng hûn chòe saⁿ kā i chhēng,

ēng ba̍t-hûn chòe pò͘ kā i pau.

10Góa kā hái siat-tēng kài-hān,

kā i siat mn̂g kap mn̂g-chhòaⁿ,

11kóng: Lí kàu chia bōe-ēng-tit pôaⁿ--kè;

lí chhiong-kông ê éng kàu chia ûi-chí.

12Lí kiám bat bēng-lēng ji̍t-thâu khí--lâi,

hō͘ lê-bêng chai i ê chit-hūn,

13kah i khiú tōe ê sì-kak-thâu,

chiong pháiⁿ-lâng kóaⁿ--chhut-khì?

14Án-ni, tōe-bīn chiū oân-choân kái-koan,

hián-chhut ta̍k-khoán ê hêng-thé, to-iūⁿ ê sek-chhái.

15Pháiⁿ-lâng bōe tit-tio̍h kng,

gia̍h-koân tián-ui ê chhiú-kut siū kòng-tn̄g.

16Lí kiám bat ji̍p-khì kàu hái ê goân-thâu,

bat kiâⁿ-kè chhim-ian ò-pì ê só͘-chāi?

17Lâng kiám bat pò lí Sí-bông ê ji̍p-kháu?

Lí kiám bat khòaⁿ-tio̍h Im-hú ê mn̂g?

18Tāi-tōe jōa khoah lí kiám bat chhek-liōng--kè?

Nā bat, chòe lí kóng.

19Lí kiám chai kng tùi tó-ūi lâi,

àm tòa tó-ūi,

20thang chhōa in tńg-khì in tau?

Lí kiám chai khì in chhù ê lō͘?

21Lí eng-kai chai, in-ūi hit-sî lí í-keng chhut-sì,

chit-chūn lí í-keng chin lāu lah!

22Lí kiám bat ji̍p-khì seh ê chhng-khò͘,

kiám bat khòaⁿ-tio̍h pha̍uh ê khò͘-pâng?

23Chiah-ê lóng sī góa ūi-tio̍h hoān-lān ê sî,

ūi-tio̍h sio-thâi kap chiàn-cheng ê ji̍t chún-pī--ê.

24Sih-nà tùi sím-mi̍h só͘-chāi siā--chhut-khì?

Tang-hong tùi tó-ūi sàu-kè tāi-tōe?

25Siáⁿ-lâng kā tōa-hō͘ khui chúi-lō͘,

kā lûi-tiān koat-tēng lō͘-sòaⁿ?

26Siáⁿ-lâng hō͘ hō͘ lo̍h tī khòng-iá,

lo̍h tī bô lâng khiā-khí ê só͘-chāi,

27hō͘ pha-hng hong-hòe ê thó͘-tōe tit-tio̍h chhiong-chiok ê hō͘-chúi,

hō͘ chhiⁿ-chháu puh-gê hoat-íⁿ?

28Hō͘-chúi kiám ū lāu-pē?

Lō͘-chúi siáⁿ-lâng siⁿ--ê?

29Peng tùi siáⁿ-lâng ê thai chhut--lâi?

Thiⁿ-téng ê sng siáⁿ-lâng siⁿ--ê?

30Siáⁿ-lâng hō͘ chúi pìⁿ-chòe chhin-chhiūⁿ chio̍h-thâu hiah-ni̍h tēng,

hō͘ chhim-ian ê piáu-bīn kiat-peng?

31Lí kiám ōe-tàng kā Báu-chhiⁿ pa̍k--khí-lâi,

kā Chham-chhiⁿ ê tòa tháu-khui?

32Lí kiám ōe-tàng hō͘ chhiⁿ-sîn chiàu kùi-choeh chhut-hiān,

tòa Pak-táu kap i ê chhiⁿ-kûn chhut--lâi?

33Lí kiám chai thiⁿ ê tēng-lu̍t,

kiám ōe hō͘ i ū koân thang koán-hat tōe?

34Lí kiám ōe-tàng chhut tōa-siaⁿ bēng-lēng hûn,

hō͘ tōa-chúi im-ba̍t lí?

35Lí kiám ōe-tàng kiò sih-nà siā--chhut-khì,

hō͘ in kóng “Goán tī chia, chhiáⁿ chí-sī”?

36Siáⁿ-lâng hō͘ âng-lō͘-chiáu ū tì-hūi chai Nî-lô-hô sím-mi̍h sî ōe hoàn-lām,

hō͘ koe-kak-á ū chhong-bêng chai sím-mi̍h sî ōe lo̍h-hō͘?

37Siáⁿ-lâng ū tì-hūi thang sǹg hûn ê sò͘-bo̍k,

ōe-tàng chiong thiⁿ ê chúi lóng piàⁿ-khang,

38hō͘ thô͘-hún pìⁿ-chòe lō͘-kô͘-bê,

hō͘ thô͘ kiat kui-oân?

39-40Sai-á-kiáⁿ tī tōng-lāi khut-teh tán,

tī bih ê só͘-chāi bâi-ho̍k ê sî,

lí kiám ōe-tàng thòe sai-bú lia̍h chia̍h-mi̍h,

hō͘ in chia̍h kàu pá?

41Sòe-chiah o͘-a bô thang chia̍h pe-lâi-pe-khì,

tùi Siōng-tè ai-kiû ê sî,

siáⁿ-lâng ōe-tàng ūi-tio̍h in chún-pī chia̍h-mi̍h?

Iok-pek-kì 38 - 現代台語譯本羅馬字版(TTVR)-闽南语

Learn More About Us