Lī-bī-kì 25

Lī-bī-kì 25 - 現代台語譯本羅馬字版(TTVR)-闽南语

An-hioh-nî(Sin 15.1-11)

1Siōng Chú tī Se-nāi-soaⁿ hoan-hù Mô͘-se

2tùi Í-sek-lia̍t-lâng soan-pò͘: Lín chìn-ji̍p góa siúⁿ-sù lín hit-ê tōe liáu-āu, thó͘-tōe tī tē-chhit nî tio̍h ūi Siōng Chú siú an-hioh, bōe-ēng-tit chèng-choh.

3La̍k nî kú, chhân-hn̂g thang chèng-choh, phû-tô-hn̂g thang siu-chéng, chhut-sán thang siu-sêng.

4Tē-chhit nî, thó͘-tōe tio̍h oân-choân hioh-khùn, ūi Siōng Chú siú an-hioh-nî; chhân-hn̂g m̄-thang chèng-choh, phû-tô-hn̂g m̄-thang siu-chéng.

5Ka-kī hoat ê ngó͘-kok m̄-thang siu-koah, bô siu-chéng--kè ê phû-tô-chhiū mā m̄-thang siu-sêng; chit-nî sī thó͘-tōe ê an-hioh-nî.

6An-hioh-nî thó͘-tōe ê chhut-sán lóng beh hō͘ lí kap lí ê po̍k-jîn, lú-pī, chhiàⁿ-kang, kià-ku tī lín hia ê gōa-cho̍k-lâng,

7kap cheng-siⁿ, í-ki̍p tī lí ê thó͘-tōe ê cháu-siù chòe chia̍h-mi̍h.

Un-hūi ê Nî

8Lí tio̍h sǹg chhit ê chhit nî, chiū-sī chhit ê an-hioh-nî, chóng-kiōng sì-cha̍p-káu nî.

9Hit-nî ê chhit-ge̍h chhoe-cha̍p, chiū-sī Sio̍k-chōe-ji̍t, lí tio̍h phài lâng tī choân-tōe pûn sàu-kak.

10Lín tio̍h kā tē-gō͘-cha̍p nî hun-pia̍t-choh-sèng, tī choân-tōe ǹg só͘-ū ê chū-bîn soan-pò͘ chū-iû; chit-nî sī Un-hūi ê Nî. Lín bóe--lâi ê thó͘-tōe tio̍h hêng hō͘ goân-chú, bóe--lâi ê lô͘-lē tio̍h hō͘ i tńg-khì i ka-kī ê ka-têng.

11Tē-gō͘-cha̍p nî beh chòe lín Un-hūi ê Nî, m̄-thang chèng-choh; tōe ka-kī hoat--ê, m̄-thang siu-koah; bô siu-chéng ê phû-tô-chhiū, m̄-thang siu-sêng.

12In-ūi hit-nî sī Un-hūi ê Nî, lín tio̍h kā i hun-pia̍t-choh-sèng; lín thang chia̍h thó͘-tōe ka-kī chhut ê thó͘-sán.

13Chit-ê Un-hūi ê Nî, lín ta̍k-ê lâng bóe--lâi ê thó͘-tōe tio̍h hêng hō͘ goân-chú.

14Lín tông-pau ê tiong-kan hō͘-siōng bóe-bōe thó͘-tōe, m̄-thang sio-phiⁿ.

15Nā tùi tông-pau bóe, Un-hūi ê Nî kè-liáu ê nî-sò͘ thang kiám--khí-lâi; bōe-chú tio̍h chiàu lī ē chi̍t piàn Un-hūi ê Nî iáu ū kúi nî thang siu-sêng ê nî-sò͘ bōe hō͘ lí.

16Nî-sò͘ jú chōe kè-siàu jú koân, nî-sò͘ jú chió kè-siàu jú kē, sī chiàu siu-sêng ê chóng-gia̍h bōe.

17Lín m̄-thang sio-phiⁿ, chí-ū tio̍h kèng-ùi lín ê Siōng-tè. Góa sī Siōng Chú — lín ê Siōng-tè.

An-hioh-nî ê Chia̍h-mi̍h

18Lín tio̍h chhiat-si̍t chun-hêng góa ê kui-lē kap bēng-lēng, chiū ōe-tàng tī hit-ê tōe an-ku-lo̍k-gia̍p.

19Tōe mā ōe chhut thó͘-sán, hō͘ lín chia̍h kàu pá, tī hit-ê tōe kú-tn̂g khiā-khí.

20Nā ū lâng kóng, “Goán tī tē-chhit nî bô chèng-choh, bô siu-sêng, án-ni beh chia̍h sím-mi̍h?”

21Góa it-tēng ōe tī tē-la̍k nî sù hok-khì hō͘ lín, hō͘ lín tī chit-nî ū saⁿ nî ê siu-sêng.

22Tē-poeh nî lín tio̍h chèng-choh, m̄-kú iáu ū kū ê siu-sêng thang chia̍h. Kàu tē-káu nî, lín siu-sêng ê sî mā iáu-teh chia̍h kū ê bí-niû.

Sio̍k-hôe Thó͘-tōe kap Chhù ê Tiâu-lē

23Thó͘-tōe m̄-thang éng-oán bōe-tn̄g, in-ūi tōe sī góa--ê; lín tī góa ê bīn-chêng sī chhut-gōa-lâng, sī kià-ku--ê.

24Lín tit-tio̍h chòe sán-gia̍p ê choân-pō͘ thó͘-tōe, tio̍h ún-chún lâng ōe-tàng sio̍k-hôe.

25Lí ê chhin-cho̍k nā ū lâng sàn-chhiah, bōe i chi̍t-pō͘-hūn ê thó͘-tōe, i ê chì-chhin tio̍h kā i bōe--chhut-khì ê thó͘-tōe sio̍k-hôe.

26Nā bô chì-chhin thang kā thó͘-tōe sio̍k-hôe, i ka-kī āu-lâi nā koh ū chîⁿ, ū-kàu thang sio̍k-hôe,

27chiū tio̍h kè-sǹg bōe--chhut-khì ê nî-sò͘, chiong kàu ē chi̍t piàn Un-hūi ê Nî só͘ chhun nî-sò͘ ê chîⁿ-gia̍h hêng hō͘ bóe-chú, i ka-kī chiū thang sio̍k-hôe i ê sán-gia̍p.

28Hit-ê lâng nā bōe-tàng sio̍k-hôe i ka-kī ê thó͘-tōe, bōe--chhut-khì ê thó͘-tōe iû-goân lâu tī bóe--khì ê lâng ê chhiú; Un-hūi ê Nî kàu, thó͘-tōe tio̍h kau--chhut-khì, hêng hō͘ goân-lâi ê tōe-chú.

29Lēng-gōa, nā ū lâng bōe siâⁿ-chhiûⁿ lāi ê chhù, chi̍t nî lāi i ū koân thang kā chhù sio̍k-hôe.

30Chi̍t nî lāi nā bô sio̍k-hôe, hit-keng chhù chiū éng-oán kui bóe-chú kap i ê kiáⁿ-sun; tī Un-hūi ê Nî mā bōe-tàng sio̍k-hôe.

31M̄-kú tī bô siâⁿ-chhiûⁿ chng-siā ê chhù, kap chng-siā ê thó͘-tōe kâng-khoán thang sio̍k-hôe; kàu Un-hūi ê Nî, bóe ê lâng tio̍h hêng hō͘ goân-lâi ê tōe-chú.

32Lī-bī-lâng tī in chòe sán-gia̍p ê siâⁿ ê chhù, put-koán-sî lóng ōe-tàng sio̍k-hôe.

33Nā ū lâng bóe Lī-bī-lâng ê siâⁿ ê chhù, Lī-bī-lâng bô sio̍k-hôe, kàu Un-hūi ê Nî tio̍h hêng hō͘ Lī-bī-lâng, in-ūi he sī in tī Í-sek-lia̍t-lâng tiong pun--tio̍h ê sán-gia̍p.

34M̄-kú Lī-bī-lâng ê siâⁿ chiu-ûi ê chháu-tiûⁿ m̄-thang bōe, in-ūi he sī in éng-oán ê sán-gia̍p.

Chîⁿ Chioh Hō͘ Sàn-chhiah-lâng ê Tiâu-lē

35Lí ê tông-pau nā pìⁿ sàn-chhiah, bōe-tàng ka-kī seng-oa̍h, lí tio̍h kiong-kip i, chhin-chhiūⁿ teh pang-chān gōa-cho̍k-lâng kap kià-ku--ê, hō͘ i kap lí chòe-hé seng-oa̍h.

36M̄-thang kā i the̍h lī-sek, koh-khah m̄-thang the̍h tāng-lī; tio̍h kèng-ùi lí ê Siōng-tè, hō͘ lí ê tông-pau kap lí chòe-hé seng-oa̍h.

37Lí chioh i chîⁿ m̄-thang kā i the̍h lī-sek, lí chioh i bí-niû mā m̄-thang the̍h khah ke.

38Góa sī Siōng Chú — lín ê Siōng-tè, ū chhōa lín chhut Ai-ki̍p, chiong Ka-lâm-tōe siúⁿ-sù lín, koh beh chòe lín ê Siōng-tè.

Sio̍k-hôe Lô͘-lē ê Tiâu-lē

39Lí ê tông-pau nā sàn kah chiong ka-kī bōe hō͘ lí, m̄-thang hō͘ i chhin-chhiūⁿ lô͘-lē ho̍k-sāi lí.

40I tòa lí hia, lí tio̍h tùi-thāi i chhin-chhiūⁿ tùi-thāi chhiàⁿ-kang kap kià-ku--ê siâng-khoán, hō͘ i ho̍k-sāi lí kàu Un-hūi ê Nî.

41Hit-sî i thang lī-khui, kap i ê kiáⁿ-jî chòe-hé tò-khì i ê pún-ke, tò-khì in chó͘-sian ê thó͘-tōe hia.

42In-ūi in sī góa ê po̍k-jîn, sī góa tùi Ai-ki̍p-tōe chhōa--chhut-lâi--ê, m̄-thang kā i bōe chòe lô͘-lē.

43M̄-thang chân-jím koán-hat i, tio̍h kiaⁿ-ùi lí ê Siōng-tè.

44Lí nā su-iàu lâm lú lô͘-lē, ōe-tàng tùi chiu-ûi ê kok-ka bóe,

45mā ōe-tàng bóe kià-ku tī lín tiong-kan ê gōa-cho̍k-lâng, á-sī in ê ka-koàn tī lín hia siⁿ ê kiáⁿ-jî; in beh chòe lí ê ke-gia̍p.

46Lín thang lâu in chòe lín ê kiáⁿ-sun ê ke-gia̍p, hō͘ in chi̍t-sì-lâng chòe lô͘-lē ho̍k-sāi lín ê kiáⁿ-sun; m̄-kú lín ê tông-pau Í-sek-lia̍t-lâng, lín m̄-thang chân-jím tùi-thāi in.

47Tòa tī lín chia ê gōa-cho̍k-lâng nā pìⁿ hó-gia̍h, m̄-kú lí ê tông-pau pìⁿ sàn-chhiah, chiong ka-kī bōe hō͘ hiah-ê gōa-cho̍k-lâng á-sī in ê ka-cho̍k,

48hō͘ lâng bóe--khì chit-ê lâng ū sio̍k-hôe ê koân-lī. I ê hiaⁿ-tī ōe-tàng kā i sio̍k-hôe,

49i ê a-chek a-peh, á-sī chek-peh hiaⁿ-tī, á-sī chhin-chiâⁿ mā thang kā i sio̍k-hôe; i ka-kī nā ū-kàu chîⁿ chiū thang sio̍k-hôe ka-kī.

50I tio̍h kap bóe-chú sǹg-siàu, tùi bōe ka-kī hit-nî khí sǹg kàu Un-hūi ê Nî, khòaⁿ nî-sò͘ ê chōe-chió, chiàu chhiàⁿ-kang ê kang-chu kap bóe-chú sǹg.

51-52I tio̍h chiàu só͘ chhun nî-sò͘ ê chōe-chió, sǹg sio̍k-hôe ê kè-chîⁿ hêng hō͘ bóe-chú.

53Bóe-chú m̄-thang chân-jím koán-hat i, tio̍h tùi-thāi i chhin-chhiūⁿ tùi-thāi ta̍k-nî chhiàⁿ ê kang-lâng kâng-khoán.

54Chit-ê lâng nā bōe-tàng chiàu án-ni siū-sio̍k, kàu Un-hūi ê Nî, i kap i ê kiáⁿ-jî chiū thang chū-iû lī-khui.

55Í-sek-lia̍t-lâng sī góa ê po̍k-jîn, sī góa tùi Ai-ki̍p-tōe kā in chhōa--chhut-lâi--ê. Góa sī Siōng Chú — lín ê Siōng-tè.

Lī-bī-kì 25 - 現代台語譯本羅馬字版(TTVR)-闽南语

Learn More About Us