Nî-hi-bí-kì 1

Nî-hi-bí-kì 1 - 現代台語譯本羅馬字版(TTVR)-闽南语

1Ē-bīn sī Hap-ka-lī-a ê kiáⁿ Nî-hi-bí ê ōe:

Nî-hi-bí Koan-sim Iâ-lō͘-sat-léng

A-ta̍t-sih-se choh Pho-su hông-tè tē-jī-cha̍p nî Ki-su-liû-ge̍h, góa tī Pho-su ê kiaⁿ-siâⁿ Su-san.

2Ū chi̍t ji̍t, góa chi̍t ê hiaⁿ-tī Hap-ná-nî, kap kúi-nā ê tùi Iû-tāi lâi ê lâng lâi chhē góa; góa tùi in thàm-thiaⁿ hiah-ê liû-hòng Pa-pí-lûn tò-tńg--khì ê Iû-thài-lâng, kap Iâ-lō͘-sat-léng ê chêng-hêng.

3In kā góa kóng, “Hiah-ê liû-hòng tò-tńg--khì ê lâng, tī Iû-tāi-séng hia tú-tio̍h tōa chai-lān, siū lêng-jio̍k, koh Iâ-lō͘-sat-léng ê siâⁿ-chhiûⁿ siū thiah-húi, siâⁿ-mn̂g hō͘ hé sio--khì.”

4Góa thiaⁿ-tio̍h chiah-ê ōe chiū chē--lo̍h-lâi, thî-khàu, ai-siong kúi-nā ji̍t; tī thiⁿ-téng ê Siōng-tè bīn-chêng kìm-chia̍h kî-tó, kóng,

5“Siōng Chú, tī thiⁿ-téng chì-tōa thang kiaⁿ-ùi ê Siōng-tè ah, lí tùi hiah-ê thiàⁿ lí, chun-siú lí kài-bēng ê lâng siú-iok si jîn-ài.

6Khún-kiû lí àⁿ hī-khang thiaⁿ, khui ba̍k-chiu khòaⁿ, thiaⁿ lí ê po̍k-jîn chit-chūn ūi-tio̍h Í-sek-lia̍t-lâng mî-ji̍t tī lí bīn-chêng ê kî-tó, jīn goán Í-sek-lia̍t-lâng pōe-poān lí ê chōe; góa kap góa ê chó͘-sian lóng ū chōe.

7Goán ok-ì hoán-khòng lí, bô chun-siú lí thong-kè lí ê po̍k-jîn Mô͘-se só͘ pan-pò͘ ê kài-bēng, kui-lē, bēng-lēng.

8Kiû lí ōe-kì-tit lí tùi lí ê po̍k-jîn Mô͘-se èng-ún ê ōe, kóng, ‘Lín nā tùi góa bô tiong-si̍t, góa chiū beh chiong lín hun-sòaⁿ khì lia̍t-kok;

9m̄-kú lín nā kui-ǹg góa, chun-hêng góa ê kài-bēng, lín chiū-sī siū kóaⁿ-sòaⁿ khì thiⁿ-piⁿ-hái-kak, góa mā beh tùi hia kā lín chū-chi̍p óa--lâi, chhōa lín kàu góa só͘ kéng-soán hō͘ lâng lâi kèng-pài góa ê só͘-chāi.’

10“In sī lí ê po̍k-jîn, lí ê chú-bîn, sī lí ēng tōa khùi-la̍t, tōa koân-lêng ê chhiú kiù-sio̍k--ê.

11Chú ah, kiû lí àⁿ hī-khang thiaⁿ lí ê po̍k-jîn kap hiah-ê ì-ài kèng-ùi lí ê miâ ê po̍k-jîn ê kî-tó; koh kiû lí hō͘ lí ê po̍k-jîn kin-á-ji̍t heng-thong, tùi ông tit-tio̍h un-tián.”

Hit-sî, góa chòe ông ê chiú-chèng.

Nî-hi-bí-kì 1 - 現代台語譯本羅馬字版(TTVR)-闽南语

Learn More About Us