Iok-pek-kì 6

Iok-pek-kì 6 - 現代台語譯本羅馬字版(TTVR)-闽南语

1 Iok-pek ìn Í-lī-hoat kóng:

2Góa ê iu-būn nā keng-kè chhìn-tāng,

góa só͘-ū ê chai-hāi nā hē tī thian-phêng,

3it-tēng pí hái--ni̍h ê soa khah tāng;

só͘-í góa nā kóng kè-thâu, m̄-thang kám-kak kî-koài.

4Choân-lêng-chiá ê chìⁿ siā-tio̍h góa,

góa kui-ê lâng khip-tio̍h chìⁿ ê to̍k.

Siōng-tè ê khióng-pò͘ pâi-tīn kong-kek góa.

5Iá-lû ū chháu thang chia̍h, kiám ōe chhut-siaⁿ?

Gû ū chhiⁿ-chháu, kiám ōe háu?

6Chia̍h-mi̍h bô chham iâm, kiám ōe-chia̍h--tit?

Nn̄g-chheng kiám ū chu-bī?

7Chiah-ê mi̍h-kiāⁿ hō͘ góa bô ūi-kháu, khòaⁿ--tio̍h chiū siūⁿ-beh thò͘,

góa bô ài kā kha̍p--tio̍h.

8Goān góa tit-tio̍h só͘ kiû--ê;

góa só͘ ì-ài--ê, goān Siōng-tè hō͘ góa.

9Goān Siōng-tè kā góa teh-chhùi,

hē-chhiú choa̍t góa ê sìⁿ-miā.

10Án-ni, góa chiū tit-tio̍h an-ùi,

tī ke̍k-tōa ê thòng-khó͘ tiong iáu ōe hoaⁿ-hí tiô-thiàu,

in-ūi góa bô ûi-pōe Chì-sèng ê Siōng-tè ê ōe.

11Góa ū sím-mi̍h khùi-la̍t, hō͘ góa iáu-teh ǹg-bāng?

Góa ū sím-mi̍h bo̍k-te̍k, hō͘ góa iáu-teh thun-lún?

12Góa ê khùi-la̍t kiám ū chio̍h-thâu hiah-ni̍h kian-tēng?

Góa ê seng-khu kiám sī tâng chòe--ê?

13Góa só͘-ū ê chu-goân lóng ēng-chīn,

iáu ū sím-mi̍h khùi-la̍t thang pang-chān ka-kī?

14Lâng choa̍t-bāng ê sî, pêng-iú nā bô ēng jîn-chû tùi-thāi i,

chiū-sī bô kèng-ùi Choân-lêng-chiá.

15Góa ê tâng-phōaⁿ chhut-bōe góa, chhin-chhiūⁿ khoe-lâu,

chhin-chhiūⁿ chúi lâu-liáu ta--khì ê khoe-tóe;

16peng iûⁿ--khì, khoe-chúi chiū lô-lô;

seh iûⁿ--khì, khoe-chúi chiū tiòng--khí-lâi;

17thiⁿ-khì sio-joa̍h, peng iûⁿ--khì;

khoe-chúi lâu-liáu-liáu, hô-chhn̂g ta-khok-khok;

18iân khoe teh kiâⁿ ê siong-tūi soah bê-lō͘,

kiâⁿ kàu phian-phiah ê só͘-chāi chiū sí--khì.

19 Thê-má ê siong-tūi teh chhē chúi;

Sī-pa ê seng-lí-lâng teh thèng-hāu khoe-lâu.

20In ê ǹg-bāng lóng lo̍k-khong,

kàu-ūi chin sit-bāng.

21Taⁿ lín tùi góa mā-sī án-ni,

khòaⁿ-tio̍h góa tú--tio̍h ê chai-lān chiū kiaⁿ.

22Góa kiám bat kóng: Chhiáⁿ lín sàng mi̍h-kiāⁿ hō͘ góa,

ēng lín ê châi-sán thòe góa sàng hóe-lō͘?

23Á-sī kóng: Kái-kiù góa thoat-lī tùi-te̍k ê chhiú,

sio̍k-hôe góa thoat-lī ap-pek góa ê lâng ê chhiú?

24Chhiáⁿ lín kà-sī góa, góa ōe tiām-tiām-thiaⁿ,

hō͘ góa bêng-pe̍k góa tó-ūi chòe m̄-tio̍h.

25Sêng-si̍t ê ōe jōa-á-ni̍h ū-la̍t!

M̄-kú lín ê chí-chek sī teh chí-chek sím-mi̍h?

26Choa̍t-bāng ê lâng kóng ê ōe kiám m̄-sī chhin-chhiūⁿ hong,

lín ná teh chí-chek góa kóng ê ōe?

27Lín sīm-chì thiu-chhiam pun ko͘-jî,

ēng pêng-iú chòe siong-phín bóe-bōe.

28Lín kā góa khòaⁿ chheng-chhó,

góa kiám ōe tng lín ê bīn kóng pe̍h-chha̍t?

29Lín chim-chiok siūⁿ, m̄-thang bô kong-tō.

Koh siūⁿ-khòaⁿ leh, góa ê li̍p-tiûⁿ chèng-khak.

30Góa kiám ū kóng m̄-tio̍h?

Góa kiám bōe-hiáu hun-pia̍t sī-hui?

Iok-pek-kì 6 - 現代台語譯本羅馬字版(TTVR)-闽南语

Learn More About Us