Si-phian 28 - 現代台語譯本羅馬字版(TTVR)-闽南语

Tāi-pi̍t ê si.Kiû Pang-chān ê Kî-tó

1Siōng Chú ah, góa kiû-kiò lí;

góa ê chio̍h-pôaⁿ ah, m̄-thang m̄ chhap góa.

Lí nā tùi góa chēng-chēng,

góa chiū chhin-chhiūⁿ ji̍p bōng-khòng-khang ê lâng.

2Góa kiû-kiò lí, ǹg lí ê Chì-sèng-só͘ gia̍h-chhiú kî-tó ê sî,

kiû lí thiaⁿ góa khún-kiû ê siaⁿ.

3M̄-thang chiong góa kap pháiⁿ-lâng, í-ki̍p choh-ok ê lâng chòe-chi̍t-ē siau-bia̍t;

in kap chhù-piⁿ kóng hô-pêng ê ōe, m̄-kú sim im-hiám.

4Goān lí chiàu in ê só͘-chòe, chiàu in só͘ kiâⁿ ê pháiⁿ-tāi pò-èng in.

Goān lí chiàu in ê chhiú ê só͘-chòe pò-èng in,

chiàu in eng-kai siū--ê kā in chhú-hoa̍t.

5In-ūi in biáu-sī Siōng Chú ê chok-ûi, kap I ê chhiú só͘ chòe--ê;

I ōe húi-hoāi in, bōe kā in tiông-kiàn.

6Siōng Chú eng-kai siū chheng-chàn,

in-ūi I ū thiaⁿ góa khún-kiû ê siaⁿ.

7Siōng Chú sī góa ê khùi-la̍t, góa ê tún-pâi;

góa óa-khò I.

Siōng Chú pang-chān góa, góa ê sim tōa hoaⁿ-hí;

góa beh ēng si-koa chheng-chàn I.

8Siōng Chú sī I chú-bîn ê khùi-la̍t,

sī I soán-li̍p ê ông tit-kiù ê pī-lān-só͘.

9Kiû lí kái-kiù lí ê chú-bîn, sù-hok hō͘ chòe lí sán-gia̍p ê chú-bîn;

kiû lí chòe in ê bo̍k-chiá éng-oán hû-chhî in.

Learn More About Us