Si-phian 2 - 現代台語譯本羅馬字版(TTVR)-闽南语

Siōng Chú Soán-li̍p ê Ông

1Lia̍t-kok sī-án-chóaⁿ teh chō siaⁿ-sè?

Bān-bîn sī-án-chóaⁿ kè-ōe khang-khang ê im-bô͘?

2Tōe-chiūⁿ ê kun-ông teh pâi-tīn, thóng-tī-chiá tàu-tīn kè-bô͘,

beh tùi-khòng Siōng Chú kap I soán-li̍p ê ông.

3In kóng, “Lán lâi kòng-chhùi ap-chè lán ê taⁿ,

chhoah-tn̄g khún-pa̍k lán ê soh.”

4Siōng Chú chē tī thiⁿ-téng teh chhiò,

teh thí-chhiò in ê im-bô͘.

5I siū-khì kā in kéng-kò,

hoat sèng-tē hō͘ in kiaⁿ-hiâⁿ.

6I kóng, “Tī góa ê sèng-soaⁿ Sek-an,

góa í-keng siat-li̍p só͘ kéng-soán--ê choh-ông.”

7Ông kóng, “Góa beh soan-kò Siōng Chú ê sèng-chí.

I kā góa kóng, ‘Lí sī góa ê kiáⁿ, góa kin-á-ji̍t siⁿ lí.

8Tùi góa kiû, góa chiū chiong lia̍t-kok hō͘ lí chòe léng-thó͘,

chiong choân-tōe hō͘ lí chòe sán-gia̍p.

9Lí beh ēng thih-koáiⁿ kā in kòng,

chhin-chhiūⁿ kòng-chhùi hûi-khì.’”

10Chèng kun-ông ah, tio̍h kín-sīn!

Thóng-tī-chiá ah, tio̍h chiap-siū kéng-kài!

11Tio̍h ēng kèng-ùi ho̍k-sāi Siōng Chú,

ēng kiaⁿ-hiâⁿ khut-ho̍k tī I kha-ē,

12chiah bián I khí sèng-tē, hō͘ lín tī lō͘-tiong bia̍t-bông,

in-ūi I ōe sûi-sî hoat siū-khì.

Chhē Siōng Chú chòe pī-lān-só͘ ê lâng chin ū hok-khì!

Learn More About Us