Si-phian 95 - 現代台語譯本羅馬字版(TTVR)-闽南语

O-ló ê Koa

1Lâi ah, lán lâi chhiùⁿ-koa o-ló Siōng Chú!

Lán lâi chheng-chàn chín-kiù lán ê pó-hō͘-chiá!

2Lán tio̍h ēng kám-siā lâi kàu I ê bīn-chêng!

Tio̍h tùi I chhiùⁿ hoaⁿ-hí ê koa!

3In-ūi Siōng Chú sī úi-tāi ê Siōng-tè,

sī iâⁿ-kè it-chhè sîn-bêng ê tōa Kun-ông.

4I thóng-hat tōe ke̍k-chhim ê só͘-chāi;

ke̍k-koân ê soaⁿ-hong mā tī I chhiú-lāi.

5I chhòng-chō hái-iûⁿ, tōa-hái sio̍k I;

I mā chhin-chhiú chhòng-chō lio̍k-tōe.

6Lâi ah, lán lâi kiok-kiong kèng-pài I!

Lán lâi kūi-pài chhòng-chō lán ê Siōng Chú!

7In-ūi I sī lán ê Siōng-tè;

lán sī I bo̍k-ióng ê iûⁿ-kûn,

sī I chiàu-kò͘ ê chú-bîn.

Kin-á-ji̍t, lín eng-kai tio̍h thiaⁿ I ê ōe.

8Lín m̄-thang ngī-sim, chhin-chhiūⁿ tī Bí-lī-pa ê sî,

chhin-chhiūⁿ tī khòng-iá ê Má-sat hit chi̍t ji̍t.

9Hit-sî, lín ê chó͘-sian khó-giām góa;

sui-jiân in ū khòaⁿ-tio̍h góa ê chok-ûi, iáu-kú chhì-thàm góa.

10Sì-cha̍p nî kú, góa thó-ià hit sè-tāi ê lâng.

Góa kóng, “In sī sim-sîn bô-tiāⁿ ê chú-bîn;

in m̄ bat góa ê tō-lō͘.”

11Só͘-í, góa tī siū-khì tiong li̍p-sè, kóng,

“In choa̍t-tùi bōe-tàng chìn-ji̍p góa ê thó͘-tōe an-hioh.”

Learn More About Us