Nî-hi-bí-kì 2

Nî-hi-bí-kì 2 - 現代台語譯本羅馬字版(TTVR)-闽南语

Nî-hi-bí Tńg-khì Iâ-lō͘-sat-léng

1 A-ta̍t-sih-se-ông tē-jī-cha̍p nî Nî-sàn-ge̍h, ū chiú pâi tī ông ê bīn-chêng, góa chiū hōng chiú hō͘ i. Góa pêng-siông-sî tī i ê bīn-chêng m̄-bat ū iu-būn ê bīn-sek.

2I mn̄g góa kóng, “Lí bô phòa-pīⁿ, bīn-sek ná chiah pháiⁿ-khòaⁿ? Lí it-tēng sim-chêng bô hó.” Góa chiū chin kiaⁿ.

3Góa tùi ông kóng, “Goān hông-siōng bān-sòe! Góa ê bīn-sek ōe chiah-ni̍h pháiⁿ-khòaⁿ, sī in-ūi an-chòng goán chó͘-sian ê siâⁿ pha-hng, siâⁿ-mn̂g lóng hō͘ hé sio--khì.”

4I mn̄g góa kóng, “Lí ài-beh kiû sím-mi̍h?”

Tùi án-ni, góa tùi thiⁿ-téng ê Siōng-tè kî-tó.

5Góa chiū tùi ông kóng, “Hông-siōng nā khòaⁿ-chòe hó, lí ê po̍k-jîn nā tùi lí tit-tio̍h un-tián, kiû lí chhe góa khì Iû-tāi, khì an-chòng goán lia̍t-chó͘ ê siâⁿ, hō͘ góa thang tiông-kiàn hit-ê siâⁿ.”

6Hit-sî ông-hō͘ chē tī ông ê piⁿ--á. Ông kā góa kóng, “Lí beh khì jōa kú? Sím-mi̍h sî ōe tò--lâi?” I hoaⁿ-hí chhe góa khì, góa chiū kap i iok-tēng chi̍t ê kî-hān.

7Góa koh tùi i kóng, “Hông-siōng nā khòaⁿ-chòe hó, chhiáⁿ hoat chiàu-su hō͘ góa tòa-khì kau hō͘ Hô-se-séng hiah-ê séng-tiúⁿ, chún góa kè-kéng khì Iû-tāi;

8koh hoat chi̍t hong chiàu-su hō͘ koán-lí hông-ka chhiū-nâ ê A-sat, kah i hō͘ góa chhâ-liāu, thang chòe siu-kiàn sèng-tiān piⁿ pó-lúi ê mn̂g, siâⁿ-chhiûⁿ, kap góa só͘ beh tòa ê chhù ê lō͘-ēng.” I ún-chún góa ê chhéng-kiû, in-ūi góa ê Siōng-tè si-un ê chhiú pang-chān góa.

9Ông phài kúi-nā ê kun-koaⁿ kap bé-peng hō͘-sàng góa khì. Góa kàu Hô-se-séng hiah-ê séng-tiúⁿ hia, chiong chiàu-su kau hō͘ in.

10Hô-lûn-lâng Chham-pa-la, kap koaⁿ-oân A-bûn-lâng To-pí-ngá thiaⁿ-kìⁿ ū lâng lâi beh ūi Í-sek-lia̍t-lâng cheng-chhú koân-ek, chiū chin bô hoaⁿ-hí.

11Góa kàu Iâ-lō͘-sat-léng, tī hia saⁿ ji̍t.

12Āu-lâi, góa pòaⁿ-mî khí--lâi, ū kúi ê lâng kap góa chòe-hé chhut--khì. Góa ê Siōng-tè kám-tōng góa ê sim beh ūi Iâ-lō͘-sat-léng chòe ê sū, góa lóng bô kā lâng kóng; góa khiâ ê cheng-siⁿ í-gōa, bô tòa pa̍t-chiah chòe-hé khì.

13Góa thàu-mî tùi Soaⁿ-kok-mn̂g chhut--khì, keng-kè Liông-chôaⁿ kàu Pùn-sò-mn̂g, koan-chhat Iâ-lō͘-sat-léng ê siâⁿ-chhiûⁿ, khòaⁿ-tio̍h siâⁿ-chhiûⁿ siū thiah-húi, siâⁿ-mn̂g hō͘ hé sio--khì.

14Góa koh khì kàu Chôaⁿ-mn̂g kap Ông-tî; m̄-kú hia bô só͘-chāi hō͘ góa khiâ ê cheng-siⁿ kè--khì.

15Góa chiū thàu-mî iân khoe chiūⁿ--khì, koan-chhat siâⁿ-chhiûⁿ, jiân-āu chiàu goân-lō͘, keng-kè Soaⁿ-kok-mn̂g tò--lâi.

16Hiah-ê koaⁿ-tiúⁿ m̄ chai góa khì tó-ūi, chòe sím-mi̍h tāi-chì; góa iáu-bē kā Iû-thài ê jîn-bîn, chè-si, kùi-cho̍k, koaⁿ-tiúⁿ, kap kî-tha beh chham-ú chit-ê kang-chok ê lâng kóng.

17Āu-lâi góa kā in kóng, “Lán só͘ tú--tio̍h ê chai-lān, Iâ-lō͘-sat-léng án-chóaⁿ pha-hng, siâⁿ-mn̂g hō͘ hé sio--khì, lín lóng ū khòaⁿ--tio̍h. Lâi! Lán lâi tiông-kiàn Iâ-lō͘-sat-léng ê siâⁿ-chhiûⁿ, chiah bián lán koh siū lêng-jio̍k.”

18Góa koh kā in kóng góa ê Siōng-tè ê chhiú án-chóaⁿ pang-chān góa, kap ông tùi góa kóng sím-mi̍h ōe.

In chiū kóng, “Lán khí-lâi tiông-kiàn!” Tùi án-ni, in kian-kiông--khí-lâi, chòe chit-ê hó ê kang-thêng.

19M̄-kú, Hô-lûn-lâng Chham-pa-la kap koaⁿ-oân A-bûn-lâng To-pí-ngá, í-ki̍p A-la-pek-lâng Ki-siān thiaⁿ--kìⁿ, chiū thí-chhiò goán, khòaⁿ-khin goán, kóng, “Lín sī teh chòe sím-mi̍h? Sī beh pōe-poān ông sī--bô?”

20Góa ìn in kóng, “Thiⁿ-téng ê Siōng-tè ōe hō͘ goán sêng-kong. Goán sī I ê po̍k-jîn, beh khí-lâi tiông-kiàn; lín tī Iâ-lō͘-sat-léng bô-hūn, bô-koân, bô lâng ōe kā lín kì-liām.”

Nî-hi-bí-kì 2 - 現代台語譯本羅馬字版(TTVR)-闽南语

Learn More About Us